Градоначалникот на Бутел, Дарко Костовски, по една и пол година признава дека направил грешка што ја поддржал градоначалничката на Скопје, Данела Арсовска, и лично се залагал да добие глас повеќе во вториот круг од изборите. Во интервју за „Макфакс“ вели дека Арсовска сега, кога ја изгубила поддршката, се пресметува лично со него, па реализира проекти што не се приоритет за граѓаните. Објаснува како улица, за која многумина и не знаат каде се наоѓа, стана главна тема во медиумите и доведе до обвинувања за манипулации, узурпирање државно земјиште, лаги и протести.

Иако улицата Боца Иванова, за која се планира булеварско решение, а за која Град Скопје најави почеток на изградбата, е предвидена и во детаљниот урбанистички план (ДУП) и во Генералниот урбанистички план (ГУП), градоначалникот Костовски ги поддржа граѓаните, кои бараат поместување на трасата.

„Ниту ГУП ниту ДУП не се библија и може да се променат. ГУП-от е Устав, но не е библија. Уставот се менува некогаш, ако е потребно“, вели градоначалникот.

Во интервјуто објаснува зошто токму сега поведоа инцијатива за бришење маркички за 11 згради, од кои некои се покај новата улица, кажува дали работи по партиска директива, објаснува зошто не ги реализирал ветувањата што ги даде пред да биде избран, ги најави капиталните проекти во Бутел и зборува за преговорите со синџирот маркети „Лидл“.

Во периодот од 2020 до 2022 направени се 8 трансакции од Владата, Министерството за политички систем и односи меѓу заедниците и Министерството за економија на фирмата на братот на Артан Груби, „ЕТЦ травел“ ДООЕЛ Скопје, објави на прес-конференција портпаролката на ВМРО-ДПМНЕ, Марија Митева.

„Ова се трансакциите што државните институции ги направиле кон ‘ЕТЦ травел’ ДООЕЛ Скопје, фирма во сопственост на братот на Артан Груби, чија вредност надминува 1 милион денари. Овде може да се видат разните трансакции со вредност од 100, 300, па и 400.000 денари, а вкупната вредност надминува 1 милион денари, додека Груби јавно вели дека немал никаква врска со бизнисот на својот брат. Јасна е намерата, уште појасна е братската врска, а најочигледен е судирот на интереси. Целта е да владеат криминалот и корупцијата, да се позиционира мрежата насекаде“, рече Митева.

Ги повика институциите да се охрабрат и веднаш да поведат постапка, која, конечно, ќе заврши со соодветен резултат.

Под влијание на циклонска активност, утре времето ќе биде облачно со повремени врнежи од дожд, кои на места попладне и во вечерните часови ќе бидат пообилни.

Од УХМР најавуваат дека се очекува да падне дожд над 20 литри на квадратен метар. Само на повисоките планини врнежите ќе бидат од снег.

Во Скопската Котлина ќе преовладува облачно време со повремени врнежи од дожд, пообилни попладне и во вечерните часови.