Македонија
Спасовски: Конторолата врз оружјето е силен предуслов за градење безбедни заедници

Конторолата врз оружјето е силен предуслов за градење безбедни заедници и очекувањата се дека двата система ќе помогнат да се превенираат и значително да се намалат понудата, побарувачката и злоупотребата на огненото оружје, изјави министерот за внатрешни работи, Оливер Спасовски.
„Како резултат на посветеното работење на тимовите на МВР и на УНДП, денеска можеме да зборуваме за два информациски система, кои се пуштени во продукција, и етапно се спроведува процес на обука на работните места за полицискиот информациски систем и внесувањето на податоците во системот за регистрација на оружјето“, рече Спасовски.
Тој додаде дека со цел поефикасно користење на новите дигитални алатки, во рамките на проектот беше надградена техничката опрема во МВР. Притоа обезбедени се 127 компјутери, 68 печатачи, 60 скенери и 25 специјални печатачи за дозволи за оружје. Дополнително, над 350 полициски службеници минаа низ процес на обуки за користење на двата система.
„Постоењето брзи и структурирани информации за оружјето е од клучно значење. Активностите во рамките на проектот ги подобрија капацитетите и ефикасноста за борба против криминалот, што директно придонесува за зголемена безбедност на граѓаните. Во поширок контекст, особено се гордеам што преку оваа регионална и национална иницијатива ќе придонесеме за унапредување на владеењето на правото, почитување на човековите права и зголемено учество на земјите во развој во системите на глобалното владеење. Токму овие принципи се во суштината на целите за одржлив развој на Обединетите нации“, рече Армен Григорјан, постојан претставник на УНДП.
Проектот за зајакнување на институционалните капацитети за борба против нелегалната трговија со оружје во исто време се спроведува во целиот регион како дел од патоказот за контрола на мало и лесно оружје, чија основна цел е да се воспостави систем на контрола на малото и лесно оружје во земјите од Западен Балкан во согласност со европските и меѓународните стандарди.
„Малото и лесно оружје претставува сериозна опасност за безбедноста во регионот. Северна Македонија соодветно и со голем успех е посветена на постојано подобрување на практиките поврзани со малото и лесно оружје. Германија во голема мера ги цени овие напори и останува посветена да придонесе во процесот“, изјави Ото Граф, заменик-амабасадор на Сојузна Република Германија.
Резултатите од проектот беа нотирани и во извештајот на Европската Унија за напредокот на земјата во 2021 година, каде што е посочено дека софтверот за регистрација на оружје придонесува за полесна идентификација и следење на огненото оружје, беше посочено на настанот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Фирма во Македонија рекламирала чаеви користејќи лажно имиња на тројца лекари

Скопското Обвинителство до надлежниот суд поднесе предлог за издавање казнен налог против едно физичко лице и фирма, кои се обвинети за злоупотреба на лични податоци, односно рекламирале чаеви притоа лажно користејќи имиња на лекари.
Обвинетиот 34-годишник, како одговорно лице во фирмата, во периодот од ноември 2022 до април 2023 година, спротивно на условите утврдени во член 10 и член 96 од Законот за заштита на личните податоци, без согласност на тројцата оштетени лекари, ги користел нивните лични податоци – фотографија, име и презиме за онлајн-продажба на два производа, објави Обвинителството.
Личните податоци на секој од оштетените лекари биле злоупотребени како тие со својот професионален авторитет да ги рекламираат и препорачуваат чаевите „паразол“ (Parazol) и „хипертеа“ (Hypertea), кои на територијата на државава ги увезувало и дистрибуирало обвинетото правно лице.
„Лажните интервјуа и објавите преземани и споделувани на повеќе веб-страници и социјални мрежи, со здравствени тврдења и лажни медицински препораки за овие производи што оштетените никогаш не ги дале, обвинетиот ги искористил за незаконита обработка на личните податоци и директен маркетинг“, наведоа од Обвинителството.
Надлежниот јавен обвинител му предложи на судот да ги огласи за виновни и одговорното лице да го казни со единствена парична казна од 70 дневни глоби со висина на дневната глоба од 30 евра во денарска противвредност, а правното лице да го казни со единствена казна од 300.000 денари. Во согласност со предлогот на Обвинителството, обвинетите по пресудата ќе треба да ги надоместат трошоците на постапката, а секој од оштетените лекари ќе има можност во граѓанска постапка да си го оствари своето имотно-правно побарување за нанесената штета со злоупотребата на личните податоци.
Скопје
Арсовска избрана за претседател на Форумот на градоначалниците, што се одржа во Обединетите нации

Градоначалничката на град Скопје, Данела Арсовска, е избрана за претседател на Форумот на градоначалниците, што се одржа во Обединетите нации во Женева, Швајцарија.
За потпретседатели на Арсовска се избрани градоначалниците Рикардо Рио од Брага, Португалија, и Сузан Aиткин, од Глазгов, Велика Британија.
„Годинава првпат како официјално тело во рамките на Обединетите нации, исклучителна чест претставува фактот што Арсовска беше избрана како претседател и ја доби довербата преку директно гласање на Форумот, на кој учествува по еден градоначалник од секоја држава од Пан-европскиот Регион, Северна Америка, Африка, Азија, Латинска Америка и од Блискиот Исток“, велат од Град Скопје.
Арсовска заедно со својот тим ќе учествува директно во формирањето на програмата на Комитетот за урбан развој, домување и управување со земјиштето на Обединетите нации и преку усвојување декларации ќе учествуваат во креирање на меѓународните политики за локалните власти.
„По изборот на Скопје за европска престолнина на културата 2028, ова претставува уште еден огромен успех на меѓународна сцена за градот. Како на домашен така и на меѓународен план, Град Скопје продолжува да работи на остварување на заложбите и програмските определби за остварување на проектите што се дел од програмата ‘За модерно Скопје’“, додаваат од прес-службата на Градот.
Македонија
Грковска: Целиме кон уште повисоко ниво на транспарентност и одржлива свест за нејзината важност

Заменичката на претседателот на Владата задолжена за политики за добро владеење, Славица Грковска, се обрати на втората јавна расправа за нацрт-стратегијата за транспарентност 2023-2026, која се одржува во Велес, организирана од Кабинетот за политики за добро владеење, во соработка со Фондацијата „Метаморфозис“.
„Ако корупцијата е болест, транспарентноста е централен дел во нејзиното лекување“. Со овој цитат на поранешниот генерален секретар на Обединетите нации, Кофи Анан, вицепремиерката Грковска ја илустрира огромната важност на транспарентноста како принцип на доброто владеење во справувањето со разорните коруптивни појави во општеството.
„Јакнењето на транспарентноста на сите нивоа во системот е еден од најважните предуслови за превенција на корупцијата и за подобрување на севкупната кондиција на институциите, кои со вградување и доследна примена на ова начело стануваат поодговорни, поотчетни и поефикасни во извршувањето на својата функција како сервис на граѓаните“, нагласи Грковска.
Таа се осврна на фактот дека во последните години транспарентноста на институциите е значително подобрена, а тоа се должи на определбата за воспоставување механизми, носење соодветна легислатива и развивање и спроведување политики. Тоа резултира со зајакнување на фискалната дисциплина преку отворање на трезорот, со што на јавноста ѝ се овозможи да има увид во трошоците, но и со отворање на институциите кон јавноста и овозможување полесен пристап до информации.
Нашата земја е една од ретките што подготвуваат стратешки документи од овој тип и понатамошните чекори се во насока да се одржи отвореноста, без да се ретерира од досега постигнатото, а институциите што назадуваат треба да го достигнат нивото на оние што имаат најголем напредок во поглед на транспарентноста. Според Ирена Бојаџиевска, експертка, која работеше на оваа стратегија, практиките на добро владеење и отворена власт треба да станат стандард во секојдневното работење.
Оваа стратегија се надоврзува на претходната стратегија за транспарентност и е насочена е кон остварување на визијата – Република Северна Македонија да биде држава со изградена институционална култура на транспарентност, држава во која владеат стандарди на добро управување во институциите на извршната власт, а со тоа и зголемена доверба на граѓаните.