Македонија
Стаменкоскa-Трајкоска: Власта повторно ги остави на цедило средношколците и студентите

СДСМ е без компас и очигледно нема намера да запре. Власта повторно ги остави на цедило средношколците и студентите, изјави Бети Стаменкоска-Трајкоска, пратеничка од пратеничката група на ВМРО-ДПМНЕ.
Владејачкото мнозинство во текот на вчерашниот ден без трошка срам и одговорност, рече таа, го одби амандманот на пратеничката група на ВМРО-ДПМНЕ, со кој се бараше од буџетот да се издвојат 20 милиони денари за бесплатен превоз на средношколците и студентите. Со овие средства, како што оценува Стаменкоска-Трајкоска, дополнително ќе им се помогнеше на приватните лиценцирани превозници, кои веќе подолг период се соочуваат со огромни проблеми токму поради екстремно високите цени на горивата во Република Македонија.
„Но, за жал, власта и за ова немаше ниту слух, ниту разбирање, а очигледно немаше ниту желба да помогне. Таква е реалноста кога СДСМ е на власт. Тие не ни знаат поинаку. Срамно е тоа што во историски најголемиот буџет на Република Македонија нема пари за средношколците и студентите, ама има пари за купување луксузен мебел, за седенки во кафеани и ресторани, за службени патувања, за купување нови возила за министрите и директорите и уште милион други непотребни и непродуктивни трошења на народните пари. Со ова уште еднаш се покажа и докажа на дело дека расипничкото трошење и луксузирање се поважни од условите за нормален и редовен образовен процес на средношколците и студентите. За СДСМ е поважно личното богатење и полнење на своите џебови отколку иднината на нашите деца“, нагласува Стаменкоска-Трајкоска.
Од друга страна, дополни дека за нив симптоматично е тоа што за ова нема никаква реакција од одредени организации на средношколците и студентите.
„Нема реакција од оние што сега кога најмногу треба да застанат во одбрана на оние што ги застапуваат, тие молчат и ја одобруваат оваа лоша образовна политика на Владата. Сепак, и тие, како и СДСМ, се одамна прочитани и препознаени како главни виновници за катастрофалните услови со кои се соочуваат младите во Македонија. Очигледно СДСМ интензивно работи на нивниот проект „за иселување на младите од нашата држава“. Ветуваа бесплатно, достапно и квалитетно образование за младите, но донесоа само пустош. Направија огромни штети во образованието во Република Македонија за кои ќе бидат потребни повеќе години за да се поправат“, потенцира пратеничката од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Грковска: Политичарите треба да бидат пример за работење со интегритет и тоа понатаму треба да се бара и од останатите

„Убедена сум дека жените и младите се носители на позитивните промени во општеството. И затоа ми е драго што денеска ја прошируваме мрежата за соработка и поддршка на жени, кои се или биле вклучени во напорите за промоција и вградување на принципите за добро владеење, за превенција и справување со корупцијата, но и за поддршка на младите од регионот, за да се обединат во зголемување на притисокот за градење на општества засновани на интегритет, чесност и одговорност“, истакна заменичката на претседателот на Владата задолжена за политики за добро владеење, Славица Грковска на втората регионална конференција на Форумот на жени лидери од ЈИЕ за добро владеење и антикорупција, која денеска се одржува во Скопје, со поддршка на Канцеларијата на „UN Women“ во Северна Македонија.
Грковска го модерираше првиот панел во рамки на конференцијата, посветен на жените во сферата на правдата и на корупцијата во правосудниот систем, на кој учествуваа: Мирјана Лазарова Трајковска, судијка во Врховниот суд на Северна Македонија и поранешна судијка во ЕСЧП, Ина Рама, судијка во Специјалниот Апелационен совет при Уставниот суд на Република Албанија, Ленче Ристовска, јавна обвинителка и прв обвинител за врска на Република Северна Македонија со „Eurojust“ – Агенција на ЕУ за соработка во областа на кривичното право, Бојана Савовиќ, заменик-обвинителка во Вишото јавно обвинителство во Белград, Република Србија и Јелена Перовиќ, директорка на Агенцијата за спречување на корупција на Црна Гора.
Еминентните говорнички споделија свои лични искуства во вршењето на својата професијата и за состојбата во стручната фела. Тие беа согласни дека жените се навистина бројно застапени во земјите од целиот регион, но дека тоа не ја одразува реалната моќ и застапеноста на одлучувачко ниво. Осврнувајќи се на родово заснованите ризици во вршењето на одговорните задачи во борбата против криминалот и корупција, тие се осврнаа на притисоците и омаловажувањата на кои биле подложени.
,,Клучна е политичката волја. Ние, политичарите треба да бидеме пример за работење со интегритет и понатаму тоа да го бараме од останатите“, истакна Грковска и додаде дека зголемувањето на личниот интегритет е важно на сите општествени нивоа, како и транспарентоста во работењето, за граѓаните да имаат вистинска слика за состојбите.
Сумирајќи ги излагањата на панелистиките таа заклучи дека општата атмосфера на неказнивост ги дерогира нашите општества, како и двојните стандарди и немањето доволно солидарност за лугето со интегритет.
Македонија
35-годишен маж загина во пожарот во зградата во Хром

Триесет и петгодишен скопјанец е пронајден изгорен во стан во пожарот што избувна утрово во скопската населба Хром.
Според информациите од МВР за „Макфакс“, пожарот избувнал во 9.47 часот на улицата Исаија Маџовски.
„Пожарот е изгаснат од Бригадата за противпожарна заштита, а во опожарениот стан пронајден е починат И. Ј. (35) од Скопје. Смртта ја констатирал лекар од итната медицинска помош“, велат од полицијата.
Од таму додаваат дека се преземаат мерки за расчистување на случајот.
Пожарот го гаснеле три противпожарни возила, а горело на четвртиот кат од петкатницата. Причините за пожарот дополнително ќе се утврдуваат.
Македонија
Од недела пороен дожд, грмежи и локално невреме, се препорачува поголема внимателност

Под влијание на влажен бран в недела на повеќе места ќе биде нестабилно со пороен дожд, грмежи и засилен ветер, локално и во форма на невреме. Пороен дожд и грмежи ќе има и в понеделник. Повеќе врнежи во овие два дена ќе има во западните делови, каде што локално се очекува да наврнат над 30 л/м2.
Потоа времето ќе биде променливо облачно со сончеви периоди и со слаб локален дожд. Температурата ќе опадне неколку степени.
Во Скопската Котлина в недела попладне ќе има пороен дожд, грмежи, засилен ветер и услови за краткотрајно невреме. Потоа ќе преовладува променливо облачно време со сончеви периоди и малку посвежо.
Во случај на појава на електрични празнења се препорачува поголема внимателност, да не се престојува на отворен простор и под осамени дрвја.