Македонија
Судот дозволи Tунџев да сведочи во „Топлик“, одбраната обвини за пристрасност бидејќи е владин директор и донатор на СДСМ

И покрај тврдењата на одбраната дека е владин директор и донатор на СДСМ, судот дозволи да се изведе вештачењето за „Топлик“ изработено од вештакот и директор на „Катастарот“, Борис Тунџев. Судијата Осман Шабани на наводите од адвокатите на ексминистерот Миле Јанакиески за можна пристрасност и непрофесионалност рече дека се неосновани. Тунџев не сакаше да даде одговор на прашањата за пристрасност по судењето со образложение: „што имав да кажам, кажав во судница“.
Адвокатката Сања Алексиќ барањето за изземање на Борис Тунџев, кој е вештак во случајот „Топлик“, го аргументира со известување од антикорупциската комисија, од каде што утврдиле конфликт на интереси бидејќи тој е истовремено и директор на „Катастарот“, назначен од Владата. Дополнително, Алексиќ до судот достави списи, од кои тврди дека се гледа името на Борис Тунџев како донатор на партијата СДСМ во 2016 и 2019 година.
„Тунџев не само што се јавува како финансиер на СДСМ во 2016 година туку е и донатор и во годишниот извештај на донатори за 2019 година. Дополнително, има и извештај во кој во друг предмет при ист ваков случај судечкиот совет не го прифатил вештачењето на вештото лице. Работниот однос кај оштетениот е основ за изземање, а основ за изземање е бидејќи неговата непристрасност и објективност е доведена во прашање. Сметам дека основани се барањата, како и основот за изземање на Тунџев“, рече Сања Алексиќ, адвокат на Миле Јанакиески.
За судот, наводите на Алексиќ беа неосновани, а судијата Шабани цитира законски одредби, според кои Тунџев мора да работи стручно и непристрасно. Тој смета дека и констатацијата на коалицијата за правично судење не е доволна основа за одбивање на вештачењето и изработка на ново, како што бараше одбраната на обвинетите.
„Судот донесе решение – барањето за изземање на Борис Тунџев се одбива како неосновано. Не постојат основите“, рече Осман Шабани.
По ова, вештакот Тунџев одговараше на прашања од обвинителот Бурим Рустеми и одбраната. Во неговото излагање посочуваше каде сѐ имало недостатоци при постапката за „Сончев град“.
„Комисијата навела и констатирала недостатоци, кои од стручен геодетски аспект се податоци за катастарски парцели што биле предмет на отуѓување, а се однесуваат на непостоење имотни листови на сите катастарски парцели од кои се формираат делови од градежните на парцели, непостоење извршени промени, непостоење конкретен одговор од Комисија за денационализација дека не се води процес. Непостоење нумерички податоци за сите градежни парцели што биле дел од јавното наддавање и записник за утврдена фактичка состојба. Вкупно 616 пацели, кои биле предмет на јавното наддавање, нумерички податоци има за 24, односно изразено во проценти тоа изнесува 3,9. По увидот во документацијата, дополнително постои записник за извршен увид од самото место и документ за поседување имот“, изјави Тунџев на судењето прашан за недостатоците.
Покрај Јанакиески, тука се обвинети уште 5 вработени во Министерството за злоупотреба на службената положба и овластувањата. Јанакиески, според обвинението на СЈО, спротивно на Законот за јавните набавки, составил комисија за јавни наддавања, на која ѝ наложил да избере понудувач за купување и располагање со државно земјиште за изградба на елитниот комплекс „Сончев град“ во Сопиште, иако фирмата не ги исполнувала условите за тоа. Штетата што ѝ ја направиле на државата е 65 милиони денари или милион евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гаревски: Бидете спокојни, земјотресот во Турција со сигурност нема да ја стресе Македонија

Разорниот земјотрес во Турција нема да ја стресе Македонија, уверува професорот Михаил Гаревски. Тој за „Макфакс“ вели дека Македонија може да здивне бидејќи во следниот период од неколку месеци не се очекуваат потреси. Нагласува дека земјотресите не можат да се предвидат, но земјотрес со поголема јачина не се очекува.
„Бидете спокојни, земјотресот во Турција со сигурност нема да ја стресе Македонија. Ние сме друго сеизмичко подрачје и далечината од источно-анадолскиот расед е преголема за да се трансферира редистрибуцијата на напрегањето од денешниот земјотрес“, вели Гаревски за „Макфакс“.
Професорот објаснува дека земјотресот во Турција од утрово не е изненадување, имајќи во предвид дека земјата е едно од најтрусните подрачја на светот заедно со Јапонија, Индонезија, Америка и Чиле.
„Ваков земјотрес не е за изненадување, но сепак ова е еден од најголемите земјотреси во историјата на Турција. Таму најсилниот земјотрес кој го имало се случил во 1939 година во градот Езерџан со магнитуда 7,9 степени според Рихтер и имал 17.000 жртви. Езерџан се наоѓа на почетокот на северно-анадолскиот расед долг 1200 километри. Земјотрес со магнитуда од 7,4 степени според Рихтер се случи и на крајот на истиот расед близу Истанбул во 1999 година, исто така со 17.000 жртви. Тогаш ја предводев екипата од Македонија која излезе по две недели од земјотресот. Глетката беше страотна како и оштетувањата. Констатацијата беше дека бројот на жртви е предизвикан и поради исклучително слабите градби“, додава Гаревски за „Макфакс“.
По 1999 година, Гаревски цени дека Турција многу ги зајакнала контролите и мерките за сигурна градба. Имајќи ја в предвид јачината на сегашниот земјотрес, Гаревски смета дека на градбите навистина се внимавало, а тоа го покажува бројот на жртви.
„Засега бројот на жртви, официјално е 1500. Би бил среќен да се остане на тоа. Но имајќи ја во предвид силината на земјотресот, очекувано е бројот на загинати да надмине 5.000 жртви. Но дај Боже да грешам“, посочува професорот.
Според Гаревски во регионот околу земјотресот во Турција, очекувани се афтершокови чиј интензитет ќе се намалува.
Македонија
(Видео) Пендаровски и унгарската претседателка Новак положија венци на гробот на Гоце Делчев во црквата „Св. Спас“

Во рамките на официјалната посета на претседателката на Унгарија, Каталин Новак, на Македонија, денеска претседателот Пендаровски и претседателката Новак положија венци на гробот на македонскиот револуционер Гоце Делчев во црквата „Св. Спас“ во Скопје.
Претходно, претседателот Стево Пендаровски во претседателскиот кабинет, на официјална церемонија со највисоки државни и воени почести, ја пречека претседателката Новак, а по одржаната тет-а-тет средба и пленарниот состанок на официјалните делегации, се одржа заедничка прес-конференција на претседателот Пендаровски и претседателката Новак.
Македонија
Славески свика итен состанок на координативното тело за испраќање помош во Турција и Сирија

Претседателот на Советот на Град Скопје, Трајко Славески, во договор со советничките групи и градоначалничката Данела Арсовска свика состанок на координативното тело на Советот, на кој ќе се согледаат сите можности за испраќање хуманитарна помош за семејствата на настраданите од земјотресот во Турција и Сирија.
Како што информира Славески, Советот ќе донесе одлука на итна вонредна седница, што ќе се закаже во најкус можен рок.
„Изразувам длабоко сочувство до семејствата на настраданите од земјотресот во Турција и Сирија. Молитвите во овие тешки моменти се со пријателските народи на Македонија, кои се зафатени од разорен земјотрес“, порача Славески.