Министерката за труд и социјална политика, Јагода Шахпаска, заедно со сопругата на претседателот, Елизабета Ѓоргиевска, и амбасадорот на НР Кина, Жанг Зуо, денеска го посети Дневниот центар за лица со попреченост во Берово, кој ќе биде реконструиран и дополнително опремен со донација на НР Кина.

Амбасадата на Народна Република Кина во Република Северна Македонија донира 1.540.000 денари за зајакнување на услугите на Дневниот центар за деца и лица со попреченост, што функционира при Меѓуопштинскиот центар за социјална работа – Берово и ја покрива и соседната општина Пехчево.

Донацијата ќе биде искористена за опремување и за помали реконструктивни зафати во просториите на дневниот центар. Предвидено е да се опремат кабинет за физикална и хидротерапија, како и сензорна соба наменета за деца и лица со аутистичен спектар на нарушувања.

Дневниот центар веќе располага со потребниот стручен кадар вклучувајќи специјализиран кинезитерапевт, специјален едукатор/рехабилитатор, социјален работник, физиотерапевт и медицински сестри.
„Воспоставувањето разни и индивидуални социјални услуги на локално ниво е еден од приоритетите на Mинистерството за труд и социјална политика. Тие имаат цел зајакнување на корисниците и унапредување на нивниот личен развој“, оцени министерката Шахпаска.

Таа се заблагодари на поддршката на НР Кина, но и на сопругата на претседателот Ѓоргиевска, која беше вклучена во процесот на избор на Дневниот центар за деца и лица со попреченост како институција за која ќе биде наменета донацијата.

Во евиденцијата на Меѓуопштинскиот центар за социјална работа – Берово фигурираат околу 300 деца и лица со различен тип на попреченост, кои би биле можни корисници на идните нови услуги на дневниот центар – рехабилитациски и физиотерапевтски услуги.

Заштитата на жртвите на семејното насилство, проблем со кој нашето општество се соочува и, за жал, има нагорен тренд во последните три децении, треба да се заснова за интензивна, планска и координирана соработка помеѓу институциите и невладиниот сектор. Бројот на осудени лица за семејно насилство е мал, што значи дека потребно е поголемо подигање на свеста за охрабрување на жените, но и на сите членови на семејството, да го пријават ваквото девијатно однесување.

Ова е заклучокот од денешната конференција на тема „Жената како жртва на насилство – механизми за заштита и помош од институциите“, што ја организира Американскиот универзитет на Европа – ФОН во рамките на кампањата „СТОП на домашното насилство. Биди храбра!“

„Разбирањето на факторите што придонесуваат за семејно насилство и факторите што влијаат на жената да остане во насилна врска е важно за програмата за превенција, како и за изготвување план за третман на жените жртви на семејно насилство. Анализирајќи ги сите карактеристики на жртвата, всушност се поставува основата и за институционално дејствување. Тоа подразбира сеопфатна институционална соработка во насока на приближување на жртвата кон остварување на правдата и оневозможување за нејзино повлекување под страв и закани“, истакнаа во своето излагање Александра Србиновска-Дончевски, професор по комуникации и масовни медиуми, и Наташа Тодоровска, професор по казнено-процесно право на Американскиот универзитет на Европа – ФОН.

Според последните податоци, во казнено-поправните установи во Република Северна Македонија казната затвор ја издржуваат вкупно 2.045 осудени лица, од кои 26 се осудени лица поради семејно насилство во повеќе облици. Во КПД „Идризово“ казната затвор ја издржуваат и 2 жени што извршиле кривично дело како резултат на семејното насилство.

Сите осудени лица, па и оние за семејно насилство, поминуваат низ процес на ресоцијализација со цел нивно полесно реинтегрирање не само во семејството туку и во општеството. Па, така, според Марјан Спасовски, директор на Управата за извршување санкции во изминатиот период во КПД „Идризово“, жените, меѓу кои осудени и за насилство, биле вклучени во повеќе активности за ресоцијализација.

„Во соработка со УНДП организирани се стручни обуки со кои жените се стекнуваат со валидни сертификати за шивачки или фризерки, а некои од нив беа вклучени и во дооформување на основното образование. Овие активности, односно стручното оспособување на жените, ќе им овозможи нивно полесно осамостојување и реинтегрирање во општеството по излегување од казнено-поправната установа, со што ќе доведе и до намалување на можноста да бидат жртви на семејно насилство“, истакна Марјан Спасовски, директор на Управата за извршување санкции, говорејќи за третманот на лицата осудени за семејно насилство.

Полицијата најчесто прва доаѓа во контакт со жртвите на семејно насилство и постапува во случаите на семејно насилство. Затоа, според Јулијана Станчова, главен инспектор за семејно насилство во Единица за криминалистички работи при СВР Скопје, од исклучителна важност е да се работи на полето на сензибилизирање на полициските службеници за препознавање на семејното насилство и постапување со жртвите на семејно насилство, како и меѓуресорската соработка и вмрежување на институциите, сè во интерес на жртвите.

Конференцијата „Жената како жртва на насилство – механизми за заштита и помош од институциите“, што ја организира Американскиот универзитет на Европа – ФОН во рамките на кампањата „СТОП на домашното насилство. Биди храбра!“, е на иницијатива на Билjaна Ангелова, сопруга на амбасадорот на Република Бугариjа во Скопје. Ангелова на денешната конференција истакна дека домашното насилство се случува 365 дена во годината и затоа за овој проблем општeството треба да биде гласно. Таа ги охрабрува жртвите на насилство отворено да зборуваат за проблемот со кој што се соочуваат, без страв, срам или осуда од околината. Ангелова на денешната конференција ги повика сите заинтересирани граѓани на 12 декември да се приклучат на маршот против насилството со мотото „Заедно сме посилни“ и тивко да им дадат поддршка на жените и децата жртви на насилство, а кој ќе се организира во неколку поголеми градови во Македонија.

Во периодот од 29 ноември до 5 декември тестирани се вкупно 16.948 материјали во лабораториите во кои се спроведуваат молекуларно и антигенско тестирање за присуство на SARS-CoV-2, со намалување од 9,8 отсто во однос на минатата недела.

Во извештајот што денеска го објави Институтот за јавно здравје се наведува дека во овој период регистрирани сe 2.275 нови позитивни случаи од 35 града во државата, со намалување од 17,3 отсто во однос на минатата недела. Процентот на позитивност се движи од 7,8 до 19 проценти, просечно 13,1 отсто. Повеќето од регистрираните случаи се од Скопје (n=1.000; 43,9 отсто) со неделна инциденца – 157,7/100.000. Највисока неделна инциденца е регистрирана во Берово – 324,6/100.000.

Регистрирани се заболени лица во сите возрасни групи. Најзастапена е возрасната група на лица на возраст над 60 години. Најмал број е регистриран кај децата на возраст до девет години (n=92; четири отсто). Се забележува намалување на бројот на заболени кај сите возрасни групи.
Во однос на дистрибуцијата по пол, пријавени се 1.215 (53,4 отсто) лица од женски и 1.060 (46,6 отсто) од машки пол.

Статус оздравени стекнале 2.540 лица што биле хоспитализирани или на домашно лекување.

Во текот на минатата недела вкупно се пријавени 40 реинфекции, со намалување од 9,1 отсто во однос на претходната недела.

Пријавени се 68 смртни случаи во 18 града во текот на изминатата недела, со намалување од 30,6 отсто во однос на претходната недела. Повеќето од нив се од Скопје (27). Во однос на возраста, најголем број (n=54; 79,4 отсто) од починатите припаѓаат на возрасната група над 60 години, а регистрирани се починати лица и кај возрасната група од 50 до 59 години (10), од 40 до 49 години (1) и од 30 до 39 години (3).

ЛИНК до целиот извештај.