Јавниот обвинител на Република Северна Македонија Ненад Савески денеска оствари средба со италијанскиот амбасадор во земјава Паоло Палминтери.

Соработката на Јавното обвинителство со Република Италија е екстензивна, а Италија како еден од најсилните поддржувачи на Македонија во ЕУ е силно заинтересирана за областа владеење на правото.

Италијанскиот амбасадор пред државниот обвинител ги презентираше досегашните активности во таа насока, вклучувајќи ги и двата меѓуинституционални меморандуми за зголемување на ефикасноста на борбата против еколошкиот криминал и против кривичните дела против културното наследство, склучени со поддршка на Италија.

Воедно тие разговараа и за можностите за идни активности, како и за предизвиците со кои се соочува обвинителството поради недостигот на јавни обвинители и ресурси и за обврските од реформската агенда.
Савески и Палминтери се согласија дека од стабилноста и сигурноста на овој регион зависи и европската стабилност, бидејќи криминалните мрежи се поврзани меѓу себе.

Италијанскиот амбасадор ја изрази подготвеноста на Италија да го зголеми нивото на поддршка за обвинителството во следниот период, бидејќи клучните области од идните преговори на земјава за членство во ЕУ се однесуваат на поглавјата за владеење на правото.

За првпат по многу години, државата го става интересот на граѓаните пред интересот на коцкарската индустрија. Владата презема конкретни чекори за воспоставување ред, одговорност и вистинска заштита за семејствата, младите и иднината на нашето општество, велат од „Вреди“.

Според нив, новиот закон за игрите на среќа не е само мерка против казината. Овој е закон, како што додаваат, во заштита на албанското семејство и на секој граѓанин кој со години гледал како коцкањето уништува семејни економии, ги загрозува младите и се шири во близина на училиштата и нашите населби.

„Преку овој закон се гради систем во кој се заштитуваат: семејствата од осиромашување и долгови,
младите од зависност и социјална деградација, семејната економија од финансиско уништување, училиштата и образовните простори од влијанието на индустријата на коцкањето, како и моралниот и општествениот ред кој со години бил нарушуван од неконтролираното ширење на игрите на среќа.

Минималната дистанца од 500 метри од училиштата, забраната за агресивно рекламирање на игрите на среќа и новите законски ограничувања се конкретни мерки што покажуваат дека државата конечно дејствува во интерес на граѓаните, а не на тесни финансиски интереси“.

За „Вреди“, заштитата на семејството и младите не е политички слоган, туку морална и институционална обврска.

Општеството, оценуваат од оваа партија, не може да се гради врз зависности, долгови и губење надеж.

„Општеството се гради врз силни семејства, заштитени млади и институции што имаат храброст да го стават јавниот интерес над интересите на индустриите што ги штетат граѓаните“.

По повод Меѓународниот ден на семејството, градоначалникот на Град Скопје, Орце Ѓорѓиевски, го посети СОС Детско село, каде што оствари средба и дружење со децата, згрижувачките семејства и тимот на организацијата.

За време на посетата беа донирани подароци, но, како што истакна, најголем впечаток оставиле животните приказни, талентот и истрајноста на младите луѓе кои растат во СОС Детско село.

„Овие деца се вистински херои. Меѓу нив има стипендисти на американски колеџи, првенци на генерации и млади луѓе кои секојдневно покажуваат дека со поддршка, љубов и грижа нема невозможни патишта“, беше посочено по средбата.

Во рамки на посетата беше најавено дека со следниот ребаланс на буџетот, Град Скопје ќе обезбеди средства за субвенции за секое згрижувачко семејство, со цел директно да се помогне во создавање подобри услови за децата и младите.

Дополнително, најавено е дека иницијативата ќе биде покрената и преку ЗЕЛС до сите општини во Македонија, со цел обезбедување еднаков третман и поддршка за секое дете, без разлика на местото на живеење.

Како дел од долгорочните мерки, Град Скопје ќе иницира облигационен меморандум со бизнис-заедницата за обезбедување загарантирани работни места за младите кои излегуваат од системот на згрижување, со што ќе се овозможи нивна поголема економска сигурност и перспектива во државата.

При посетата беше изразена благодарност до директорката Јулијана Накова Гапо и целиот тим на СОС Детско село за посветеноста, грижата и љубовта што секојдневно им ја пружаат на децата, како и до сите згрижувачки семејства кои несебично обезбедуваат топол дом и поддршка.

Од посетата беше испратена порака дека поддршката за овие деца нема да остане само декларативна, туку ќе продолжи преку конкретни мерки и институционална грижа.