Тренчевска: Со заеднички предлози до системски решенија за подобар живот на сите пензионери

Министерката за труд и социјална политика, Јованка Тренчевска, се сретна со претседателот на Партијата на пензионерите, Илија Николовски, и претставници од партијата. На средбата се разговараше за актуелните барања на пензионерите за покачување на пензиите, како и потенцијалните решенија, кои може да донесат подобар квалитет на живот на ранливите категории пензионери.

Од страна на присутните беше потенцирано дека линеарното покачување ќе ги загрози стабилноста на пензискиот фонд и редовното примање на пензиите за 330 000 пензионери во државата.

Тренчевска посочи дека во периодот што следува ќе се креираат социјални мерки, кои директно ќе влијаат на квалитетот на живот на пензионерите со најниски примања и исто така таа посочи дека посветено ќе се работи и на Законот за минималната пензија.

Николовски на министерката ѝ приложи предлози креирани од Партијата на пензионерите, кои може да го подобрат квалитетот на живот на пензионерите, а од страна на министерката беше истакнато дека тие ќе бидат разгледани и внесени во материјалите за работа при носењето решенија за пензиите.

Министерката на крајот од средбата покани претставник од Партијата на пензионерите на првата средба на работната група, која ќе работи на Законот за минималната пензија и социјалните мерки, а ќе се одржи на 6 септември.