Времето денеска е облачно, на повеќе места со повремени врнежи од снег, претежно со слаб, а во западните и јужните делови на места со умерен интензитет. Дува засилен, на повеќе места и силен северен ветер, измерените брзини се од 40 до 80 километри на час.

Управата за хидрометеоролошки работи јави дека кон крајот на денот облачноста почнувајќи од север ќе се намалува.

Максималната температура ќе достигне од минус 5 до 2 степена. Во Скопје, претпладне времето ќе биде облачно со слаби врнежи од снег и со умерен до засилен ветер од северен правец. Попладне облачноста ќе се намалува. Температурата ќе се движи до минус еден степен.

Од утре следува период на суво и ветровито време со ниски утрински температури, а дневните ќе бидат во благ пораст.

На повеќе планински превои и патишта воведена е забарана за движење на товарни возила, соопшти Автомотосојузот на Македонија.

Забраната е воведена на магистралниот пат Крива Паланка-Деве Баир, патниот правец Маврово-Дебар, Битола-Ресен пресен планинскиот премин Ѓавато, ГОстивар-Кичево преку планинскиот премин Стража.

Денеска напладне треба да продолжи седницата на собраниската Комисија за деловничко-мандатни и имунитетни прашања, на чиј дневен ред е барањето за одобрување притвор на пратеникот Трајко Вељаноски, поднесено од
одделението за организиран криминал и корупција при скопскиот кривичен суд поради сомнение за вмешаност во настаните од 27 април.

Претседателот на Комисијата, Павле Богоевски, ја презакажа седницата за денеска бидејќи вчера за збор се пријавиле повеќемина говорници.

Вељаноски заедно со ексминистрите од ВМРО-ДПМНЕ, Миле Јанкиески и Спиро Ристовски, во средата беше приведен на распит по наредба на Јавното обвинителство под сомнение за вмешаност во настаните од 27 април. Вељаноски се повика на пратеничкиот имунитет, а на поранешните министри Јанакиески и Ристовски им беше одредена мерка 30-дневен притвор.

Според Деловникот, Комисијата е должна да го разгледа барањето на судот и во рок од два дена да го достави до претседателот на парламентот. По добиенот извештај од Комисијата, Собранието најдоцна во рок од три дена треба да одлучува на пленарна седница. Одлуката за одземање на имунитетот се носи со просто мнозинство од вкупниот број пратеници.