Додека народот нема таблети и вакцини за Ковид-19, Заев секој месец го плаќал синот на Самка и секретарката на Рашковски, обвини Дарко Костовски, пратеник од ВМРО-ДПМНЕ.

„Со народни пари, како хонорарци чии имиња беа криени од јавноста до вчера, е плаќан и Демир Ибраимоски, син на Самка Ибраимоски, коалиционен партнер на Заев и заменик директор на “Македонија пат”. И додека Самка ги лаже Ромите со покачена социјална помош, неговиот син земал 40.000 денари месечно како хонорарец. 53.000 денари хонорар од Заев добил и професорот Ванчо Узунов, кој беше и потпретседател на СДСМ. На листата хонорарци се најде и името на Ивана Митрова, секретарка на Драги Рашковски, која земала 38.000 денари“, рече тој.

Костовски додаде дека независен колумнист, и владин хонорарец во исто време е Петрит Сарачини, кој месечно од владата бил плаќан 42.000 денари. Според Костовски, Сарачини се продава како независен и непристрасен.

„Марко Михаилоски претседател на СДММ е уште еден од хонорарците чии имиња до вчера не беа објавени. Дали Михаилоски земал државна плата, а работел партиски задачи? Или партијата и државата тоа е исто за Заев и неговите“, праша Костовски.

Ова се само дел од таканаречените експерти и независни хонорарци, додаде тој, кои се платени со наши пари.

Ивент индустријата и денеска ќе протестира пред Влада, од 12 до 15 часот.

„Најмалку што очекувавме од Владата беа медиумски оркестрирани напади кон нас и извртување на фактите, наспроти простор и некоја минута за разговор и решенија. Ние не сме државен непријател, не сме неработници, туку индустрија и фирми даночни обврзници кои беа први затворени и најмалку поддржани. Точно е дека добивме помош со сите останати сектори, а тоа се 6 плати и некои компании земаа кредити. И тоа се сé. А не работиме веќе 14 месеци“, велат од Асоцијацијата ИВАП.

Од таму велат дека пакетот мерки и еден или два милион ниту е донесен, ниту e објавен.

„Условите никој не ги знае, кој се ќе има право да аплицира, кој ќе добие, критериуми, дали ќе има можност за сите? На пример, ако има 2000 македонски музичари, дали ќе може секој да настапи или само дел од нив? Така и со нас компаниите, кои секоја влада во Европа ги поддржа и препозна како најважен сегмент за раздвижување на економијата, културата, туризмот и менталното здравје“, се наведува во соопштението.

Министерството за здравство ги осудува, како што велат од таму, лагите штго ги пласира партијата ВМРО-ДПМНЕ и ја повикува опозицијата да престане да шири паника во јавноста и вознемиреност кај граѓаните. Од оваа институција реагираат на соопштението од страна на ВМРО-ДПМНЕ дека во државата има проблем со вакцини и набавка на реагенси.

„Апсолутна лага е дека државните лаборатории немаат реагенси за ПЦР-тестови. Апсолутна лага е дека се чека за термин за тестирање. Во земјата дневно може да се прават 4.000-5.000 тестови на Ковид-19 и сите закажувања се реализираат тековно, а резултатите се објавуваат за најмногу 24 часа. Во време на пандемија ВМРО-ДПМНЕ одлучи да биде на страна на лагата, секојдневно да креира лажни сценарија дека во болниците нема кислород, дека здравствените работници не знаат да лекуваат, па затоа смртноста е голема“, стои во писмената реакција од Министерството за здравство.

Според оваа институција, ВМРО-ДПМНЕ во време на пандемија одлучила да го опструира процесот на набавка на вакцини пласирајќи во јавноста фалсификувани документи со невистинити суми лажејќи дека вакцини се набавуваат со провизии.

„За ВМРО-ДПМНЕ, небитни се луѓето што се вакцинираат против Ковид-19. Тажно е што и од процесот на имунизација на возрасните граѓани, вработените во критичната инфраструктура, здравствените работници, ВМРО-ДПМНЕ сака политички да профитира“, реагира Министерствотo за здравство.