Македонија
Хелсиншкиот комитет: Итно да се создадат услови за образование и на децата со попреченост

Надлежните мора итно да создадат услови за образование на децата со попреченост, порачаа од Хелсиншкиот комитет за човекови права, од каде што укажуваат дека уште со почетокот на пандемијата на Ковид-19 децата со посебни образовни потреби, а особено децата со попреченост, се соочиле со многубројни предизвици во образовниот процес.
Онлајн-платформите за учење на далечина во нашата земја, кои го заменија редовното образование, ги исклучуваа повеќето од децата со попреченост. Организацијата на Обединетите нации укажа на опасноста од зголемена ексклузија на децата со попреченост во процесот на образование како резултат на моментната криза. Се проценува дека децата со попреченост ќе имаат најмалку корист од примената на алтернативните решенија за учење на далечина, на што се надоврзува недостигот од поддршка во домот, непристапноста до интернет, непостоењето пристапен софтвер и наставни материјали.
„Со новиот Закон за основното образование, кој беше донесен пред една година и почна со примена во учебната 2019/2020 година, основното образование беше институционално, кадровски и содржински организирано да овозможи инклузија на сите деца во редовното образование. Меѓутоа, новата учебна година почнува за две седмици, а сè уште не се донесени сите подзаконски акти што требаше да обезбедат соодветна имплементација на законот и инклузија на децата со посебни образовни потреби во образовниот процес од секој аспект. Дополнително, состојбата на пандемија само ги потенцира многуте недостатоци во имплементацијата на законот за кои во неколку наврати алармира и Хелсиншкиот комитет. Имајќи предвид дека сè уште не е објавен оглас за избор на образовни асистенти, право што во текот на претходната учебна година можеа да го користат само мал број деца од сите оние што имаа потреба, постојат индиции дека и со почетокот на новата учебна година децата со попреченост нема да бидат во можност да го користат ова право“, велат од Хелсиншкиот комитет за човекови права.
Оттука додаваат дека според препораките од посебниот извештај на народниот правобранител за предизвиците, проблемите и предностите на реализираната онлајн-настава (далечинско учење) за учениците со попреченост во посебните основни и средни училишта, кој беше објавен на 10 август 2020 година, наставата за ученици со попреченост е најдобро да се изведува со физичко присуство на учениците во училиште под директно водство од страна на наставниците и стручните лица од причина што училиштето располага со потребните наставни, едукативно-дидактички материјали, средства, опрема и технички услови, кои се неопходни за стекнување знаења и вештини кај учениците, како и за нивен целокупен сестран развој.
На прагот на новата учебна година сè уште многу од учениците немаат пристап до интернет и компјутерска опрема, а немаат пристап ниту до соодветни наставни материјали за реализирање онлајн-настава, кои се од особена важност за децата со попреченост. Оттука, Хелсиншкиот комитет за човекови права апелира до сите релевантни институции при донесувањето на одлуката за изборот на модалитетот на работа на училиштата во новата учебна година да ги земат предвид и потребите на децата со попреченост, односно да обезбедат соодветни услови за нивно непречено вклучување во образовниот процес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ахмети: Заедно во НАТО, заедно и во ЕУ

Претседателот на ДУИ, Али Ахмети заедно со соработниците вечерва се сретна со жени од Тетово во организација на Унијататa на жени на ДУИ од тој град.
Покрај Ахмети, обраќање имаа и потпретседателката на ДУИ, Арбана Пашоли, генералниот секретар Фатон Ахмети, пратеничките Рина Ајдари и Фиснике Бектеши-Шаќири, како и претседателката на Унијата на жени во Тетово, Мерита Мустафаи.
„Јас сум на мислење дека мажите и жените заедно се избориле за да има мир, затоа застапеноста на жените треба да биде што поголема и да не се базира само на тие пропорционални поделби што се напишани. Многу теории се напишани и кажани, како нпр. на Чубриловиќ, кои велеа дека треба да се убиваат мајки Албанки, а не само синови и сопрузи, затоа што овие мајки родиле херои кои биле причина за неуспехот на нашите освојувачи. Поминавме низ различни режими, од она што албанската жена останува во темница, многу зборови од типот: Не ги воспитувајте оти излегува од иманот(вербата), убивајте жени и многу слични работи, па нашата нација доживеа безмилосни режими на нејзините раменици. Значи, мажите и жените рамо до рамо, имаме обврска да работиме и да се бориме за жените со еднакви права како што ви одговара. Не водиме кампања, но немањето средби е забележано уште од времето на пандемијата, па се враќаме на традиционалните средби“ рече Ахмети.
Тој напомена дека „се наоѓаме во ситуација кога се бара решение, како што имавме проблем со името, сега имаме и со уставните измени, така и општеството на нашите сограѓани стана многу политизирано. Македонските публицисти пишуваат писма како да не сум за поддршка на моите сограѓани“.
„Грешат, затоа што јас ги поддржував и ги поддржувам, затоа што во НАТО не сме поделени туку заедно, во ЕУ ќе бидеме заедно, затоа мора заедно да ги решаваме проблемите. Имам разговарано и за историските проблеми со нашите политички партии, кажав да размислите и да направите научна проценка на состојбите, бидејќи ништо не се изгуби ниту од Охридскиот договор, ниту од Договорот од Преспа, напротив, добивме членство во НАТО, значи со договорот со Бугарија ништо не губиме, напротив го легитимираме идентитетот на нашите сограѓани. Со членството во ЕУ победуваме, бидејќи создаваме услови да ја запреме миграцијата и да ги вратиме нашите луѓе кои заминаа. Досега одржавме многу средби во рамките на оваа агенда, дадовме и добивме мислења од многу луѓе, но можам да кажам дека направивме многу голема работа, бидејќи денес имате Албанци на водечки позиции, на позиции со целосна одговорност“ рече лидерот на ДУИ.
Потпретседателка на партијата, Пашоли напомена дека „професионалното усовршување бара максимална посветеност, ние сме жени, сестри и пријатели, но сме и глава на семејства и професионалци во нашите професии. Ние сме во состојба да им дадеме пример на помладите генерации. Првите модели од кои се школува една девојка се најблиските жени во семејството, соработничките и пријателите, затоа верувам дека секој наш успех не е случаен, бидејќи тоа е влијанието на секоја жена во нашите животи“.
Македонија
Димитриевски со српскиот министер за одбрана Вучевиќ на одбележување на Свети Сава во училиште во Кумановско

Градоначалникот на општина Куманово Максим Димитриевски во рамки на одбележувањето на Денот на Свети Сава, националниот празник на Србите кои живеат во Македонија, денеска во ООУ „Карпош“ – с. Умин Дол, беше домаќин на високи државни претставници од Република Србија, потпретседателот на Влада и министер за одбрана на Република Србија, Милош Вучевиќ со неговата делегација и амбасадор на Република Србија, Н.Е. Невена Јовановиќ.
Учениците заедно со своите наставници приредија пригодна културно – уметничка програма во духот на православниот просветител и закрилник на српскиот народ, Св.Сава, пред гостите од соседна Србија.
На задоволство на учениците и нивните наставници гостите присуствуваа на наставен час, каде низ дружење и разговор се запознаа со начинот на изведување на наставата на српски јазик и условите во училиштето кое што беше целосно реконструирано.
Македонија
(Видео) Премиерот на Апасиев му читаше дефиниција за параноја, лидерот на Левица возврати со цитат од филозоф

Премиерот Димитар Ковачевски одговарајќи на прашање од пратеникот Димитар Апасиев му цитираше дефиниција од „Википедија“ за тоа што е паранонија.
Апасиев пак му возврати со цитат од антички филозоф и му се заблагодари за дијагнозата која му ја дал. Ова дојде откако Апасиев упати прашање до премиерот:
„Дали Македонија односно безбедносните служби го користат шпионскиот софтвер ‘пегасус’ кој од неодамна има извештај во ЕУ дека го користеле 14 земји членки и кој што се користи за компромитирање на политички неистомисленици – се влегува во нивните мобилни телефони, лаптопи, се вадат материјали, потоа се следат новинари, судии, обвинители, се компормитираат за да преземат или непреземат одредени дејствија?“.
На ова, одговор даде премиерот Ковачевски кој рече:
„Лично нешто што сакам да ви кажам, во ваш стил, а тоа е дека: Паранојa е инстинкт или мисловен процес кој е под силно влијание на вознемиреност или страв, честопати до степен на заблуда и ирационалност. Параноичното размислување вообичаено подразбира страв од прогон или убеденост дека има некаква завера против самиот себеси“, кажа Ковачевски по што додаде: „Изнесувањето лажни обвинувања и општата недоверба кон луѓето исто така честопати се дел од паранојата. На пример, параноична личност може да се убеди себеси дека некоја случка била намерна кога според повеќето луѓе станува збор за несреќа или случајност. Ви благодарам“.
Возврати пратеникот и лидер на Левица, Димитар Апасиев.
„Премиере Ви благодарам на дијагнозата. Епиктет (антички филозоф) во еден свој прирачник вели: „Кога за Вас кажуваат лоши работи, немојте да се обидувате да се браните туку речете им на вашите непријатели дека само толку ли знаете, па уште кога ќе дознаете уште повеќе кај ќе ви биде крајот“. Јас ги разбирам вашите напишани панаѓирици во одбрана на безбедносните служби кои ги злоупотребувате за пресметка со вашите политички непријатели – но не се надевав дека на прашање кое не го знаете вие ќе излезете со напишан говор во кој ќе ми дадете дијагноза. Веројатно вие сте го виделе спикерскиот лист на говорница, па сте рекле: „Аа па ќе си спремам една дијагноза“. Јас предавам историја на право, па знаете Атињаните кога отишле кај Спартанците и такви благоглаголиви со напишани говори како Вас, Спартанците биле практични луѓе и рекле: „Абе ние крајот не го разбравме оти почетокот го заборавивме“. Па така и вие. Јас за едно Ве прашувам, вие за десетто ми одговарате. Прашањето беше за „Пегасус“, дали користите шпиунски софтвер, Вие ми мешате молотови коктели, дијагнози, баби и жаби“.
Апасиев не беше задоволен од одговорот, па допраша: „Како тогаш нѐ прислушувате, со кои софтвери, преку кои структури, преку комбиња ли, како?“.
„АНБ не користи ‘Пегасус спај веар’ софтвер. За целата работа на АНБ како пратеник, можете да се информирате преку комисијата за надзор на безбедносните служби која ја води пратеник од опозицијата и ги има на располагање сите директори на безбедносните служби. И да повторам уште еднаш: „Паранојa е инстинкт или мисловен процес кој е под силно влијание на вознемиреност или страв, честопати до степен на заблуда и ирационалност. Параноичното размислување вообичаено подразбира страв од прогон или убеденост дека има некаква завера против самиот себеси. Изнесувањето лажни обвинувања и општата недоверба кон луѓето исто така честопати се дел од паранојата. На пример, параноична личност може да се убеди себеси дека некоја случка била намерна кога според повеќето луѓе станува збор за несреќа или случајност“, повторно одговори Ковачевски.