Претпладне ќе биде облачно со врнежи од дожд, кои локално ќе имаат пороен карактер, а во југоисточните делови ќе бидат проследени со ретки грмежи. Во текот на денот врнежите ќе престануваат и облачноста делумно ќе се намали. Ќе дува слаб до умерен ветер од северен правец. Максималната температура ќе се движи од 8 до 16 степени.

Во Скопје претпладне облачно со врнежи од дожд. Во текот на денот облачноста ќе се намали и врнежите ќе престанат. Максималната температура ќе достигне до 13 степени.

Во наредните три дена времето ќе биде стабилно со појава на магла по котлините. Нови врежи од дожд се очекуваат од недела попладне.

Институтот за белодробни заболувања и туберкулоза – Скопје и Здружението на пневмофтизиолозите за граѓаните, денеска организираат бесплатни прегледи за мерење на дишната функција на Светскиот ден за хронична опструктивна белодробна болест – ХОББ, 21 ноември, кој се одбележува под мотото ,,Никогаш не е прерано, никогаш не е предоцна”.

Прегледите ќе се изведат од 11:00 до 14:00 часот во трговскиот центар „Капитол мол“ во скопската населба Аеродром.

„Овој настан е од особена важност за да се испрати порака до населението на Република Македонија за важноста на препознавањето на оваа болест. Навременото дијагностицирање и правилното лекување на оваа болест ќе го подобрат квалитетот на живот и животниот век на лицата кои страдаат од ХОББ“, велат од Институтот за белодробни заболувања и туберкулоза и од Здружението на пневмофтизиолозите на Македонија

Тие додаваат дека еден од најголемите ризик-фактори за појава на ХОББ е пушењето, но дека поради разни причини, како начин на живеење или самата средина, препорачливо е сите кои се во можност да се проверат на бесплатните прегледи.

Од „ЕВН Македонија“ АД информираат дека во текот на денот поради технички зафати во дистрибутивната електромрежа, без електрична енергија ќе останат повеќе делови од Скопје.

Без електрична енергија од 8:30 до 15:30 часот ќе останат корисниците од дел од улицата Димитар Пандилов во општина Центар, додека корисниците од улица Самоилова, исто така во општина Центар, без струја ќе бидат во период од 9:00 до 14:30 часот.

Од 9:00 до 12:00 часот без струја ќе бидат корисниците од булевар Партизански одреди зграда број 48 во општина Карпош.

Понатаму, од 9:00 до 14:00 часот без струја ќе бидат и корисниците од дел од улица 6 во село Бардовци во општина Карпош.

Од 9:00 до 15:00 часот без струја ќе бидат и корисниците од улица 4, 6 и 7 во село Батинци, општина Студеничани.