Карантинот, изолацијата и социјалното дистанцирање се мерки што докажано го забавуваат ширењето на Ковид-19 и ни помагаат да го заштитиме јавното здравје. Но, не треба да заборавиме за време на овие кризни ситуации да го негуваме и менталното здравје.

Министерството за здравство објави неколку совети за тоа како би можеле најдобро да се грижиме за себе и другите во ваквите нестандардни услови.

Еден од советите е да следиме проверени информации и да избегнуваме постојано да следиме вести или социјални медиуми.

„Земето го предвид степенот на ризик за вас и другите. Луѓето на социјалните медиуми и некои од традиционалните медиуми имаат поинакво видување за ризикот во вакви ситуации, со голема веројатност да е неточен и непроверен.

Најдобро што може да направите е да следите проверени информации и да бидете во тек со случувањата. Доколку следите интернет-портали или разберете за нова информација, проверете го изворот на информација за да се осигурите дека е од соодветно државно/ здравствено тело или агенција.

Притоа избегнувајте постојано да следите вести или социјални медиуми бидејќи тоа може дополнително да ја ви зголемува вознемиреноста. Поради тоа, ограничете го приливот на разни информации до вас и особено до вашите деца.

За информации поврзани со вашата здравствена состојба или за блиските, консултирајте се со вашиот лекар и одговорниот медицински персонал. Доколку е потребно, проверете дали ваквите консултации може да ги правите телефонски или преку интернет-конекција (на пример, „Скајп“, „Вибер“, „Месенџер“…)“, советува Иво Куновски, магистер по клиничка психологија.

„Во услови на социјална дистанцираност, карантин и изолација луѓето може да доживеат разни непријатни мисли и чувства. Очекувано е и нормално да се почувствуваат страв, вознемиреност и загриженост за сопственото здравје и здравјето на блиските. Често може да се развие незадоволство од членовите на семејството или пријателите, кои се принудени да бидат во карантин поради контакт со лице заболено од вирусот.

Зголеменото внимание за себе или редовното следење на вашето здравје од медицински персонал исто така може да предизвика непријатност и нетрпеливост. Дополнителна грижа може да претставува и земеното работно отсуство, намалениот прилив на финансиски средства, работната несигурност, како и предизвикот во обезбедување основни прехранбени и хигиенски продукти при лимитирано движење.

Често забележани чувства, кои се развиваат во вакви ситуации, може да вклучат: загриженост за способноста да ги извршувате секојдневните обврски со децата и старите, несигурност за ситуацијата и иднината, осаменост поради одвоеноста од блиски, лутина за немарноста на другите, досада поради лимитираниот број активности, намалено расположение, намален или зголемен апетит, прекумерно или недоволно спиење, како и прекумерна употреба на алкохол и цигари. Ова се вообичаени реакции на невообичаени настани за кои сепак можеме да преземеме нешто“, вели Иво Куновски, магистер по клиничка психологија.

На Клиниката за гинекологија и акушерство во Скопје доцна синоќа почина пациентка на возраст од 37 години од Охрид, која вчера попладне е донесена во Скопје со возило на брзата помош во фебрилна состојба со мртов плод во стомакот.

„На жената уште веднаш ѝ е направена целосна лабораторија и земен брис за Ковид-19. Лекарите оперативно го извадија плодот, а од стомакот на мајката е евакуиран гној. Можна причина за фебрилноста е септичната состојба на пациентката, но тестот треба да утврди или отфли присуство на коронавирус.

За време на интервенцијата состојбата кај пациентката се влоши, при што таа беше интубирана, се пристапи кон целосна реанимација, но, за жал, во 22 часот е констатирана смрт. Причина за смртта е сепса со масивна тромбемболија, а пациентката ќе биде пратена на обдукација по што ќе има точна дијагноза. Се работи за екстремно дебела пациентка, која во последните 5 месеци воопшто не се ни движела, а во согласност со податоците од докторите во Охрид, пациентката не ги извршувала ни потребните гинеколошки контроли. Сега починатата родилка е донесена без претходна најава од матичен лекар и оставена пред влезот на Клиниката. По измерената телесна температура, таа веднаш е спроведена на посебен влез до одделението за изолација“, соопштија од скопската Клиника за гинекологија и акушерство.

На 30 март на Клиниката е примена и второротка од Куманово на возраст од 27 години, која во 20.15 часот, поради намалена плодова вода и влошена општа состојба, е породена со царски рез. Пациентката е спроведена и породена во изолација поради фактот што таа е сомнителна на Ковид-19 и со упатна дијагноза, која укажува на намалената плодова вода и затоа e најавена и испратена на Клиниката преку својот матичен лекар.

„На пациентката, освен комплетната лабораторија, земен ѝ е и брис за Ковид-19, чиј резултат е стигнат вчера попладне во 18 часот и тој е позитивен на вирусот.
Пациентката роди живо машко новороденче, кое е недоносено и во моментот се наоѓа на интезнивна нега на ГАК. Новороденчето е изолирано и е во добра општа состојба, не е на машина, туку само со кислородна хауба. Денеска на бебето ќе му биде земен брис и ќе се направи тест на Ковид-19.

Пациентката при приемот е без температура, но во својот исказ посочува дека пред 3 дена имала треска и се пожалила на сува кашлица. Пациентката укажа на тоа и дека нејзиниот свекор, исто така од Куманово, е позитивен на Ковид-19. Со пациентката е постапено по сите протоколи за прием на заразен пациент како во однос на нега и третман така и во однос на адекватна заштита на персоналот и изолација на пациентот. Вчера родилката почна да развива потешка клиничката слика, отежнато дишење со намалена сатурација, по што веднаш е префрлена и хоспитализирана на Клиниката за инфективни болести и фебрилни состојби“, се додава во соопштението.

Дел од Клиниката за гинекологија и акушерство во Скопје функционира за родилки сомнителни и позитивни на Ковид-19. За таа намена е воспоставен целосен протокол на изолација од влез, патека на движење, посебна родилна сала, бокс и тим.

Од Клиниката за гинекологија и акушерство апелираат сите пациентки што доѓаат на Клиниката да се придржуваат кон сите насоки кои се упатуваат од Министерството за здравство во однос на заштитата на сопственото здравје и околината, но исто така се упатува и апел за целосно и вистинито давање информации при прием со цел адекватно и навремено преземање адекватни мерки, кои се однесуваат на вашето здравје и безбедноста на здравстевниот персонал.

Сообраќајот за тешки товарни возила на планинскиот премин Плетвар е нормализиран, соопшти АМСМ.

Во 10.45 часот се воведува забрана за движење тешки товарни возила на планинскиот премин Пресека.

Од изутринава има забрана за движење тешки товарни возила на патниот правец крак Маврово – Дебар и на планинскиот премин Стража. Врнежи од снег се бележат на Попова Шапка, Маврово, Кула, Крушево, Крива Паланка – ГП Деве Баир и на планинските превои Стража, Ѓавато и Пресека, информира АМСМ.