Македонија
Штрајк и тужби за државата се можни доколку Владата не го продолжи дијалогот со административците, кои бараат 30 отсто поголема плата

Вработените во неколку министерства и државни институции, кои и денес, четврти ден по ред, излегоа на протест за 30 отсто поголема плата и потпишување колективен договор се подготвени на дијалог со Владата, но размислуваат и за штрајк и за тужби за државата доколку нема дијалог.
Трпе Деаноски, претседател на Синдикатот на вработените во управата, правосудните органи и здруженијата на граѓаните (УПОЗ), рече дека со излегувањето на протести на минусни температури вработените ја покажале решеноста да се борат за правата, а денес испратиле и формално барање до Владата за средба со премиерот.
„Овие денови се начитавме декларативни соопштенија од Владата преку кои нѐ канеа на средби преку вас медиумите, а ние формално не добивме никаква покана за водење дијалог бидејќи тој не се води преку соопштенија и преку медиуми, така што Синдикатот на УПОЗ денес поднесе формално барање за средба со претседателот на Владата, во кое бараме повторно продолжување на дијалогот, кој еднострано беше прекинат од страна на Министерството за финансии со одбивање на предложените колективни договори за додаток на плата за овие вработени што денеска протестираат со нас“, рече Деаноски.
Вработените очекуваат Владата да покаже разбирање и да ја прифати, како што велат, подадената рака од Синдикатот на УПОЗ за изнаоѓање решение за нивните барања. Во спротивно, најавуваат дека повторно ќе ги активираат протестите, а велат и дека ќе ги искористат сите со закон дадени можности за изразување на незадоволството на работниците до остварување на барањата.
„Првин ќе чекаме, ќе дадеме шанса за продолжување на дијалогот како што како што најавува Владата, ако не, ќе ги продолжиме протестите. Се размислува за одење на штрајк, а се размислува и за тужби за државата“, рече Деаноски.
Денешниот протест, последен од засега најавените, беше симболичен пред Министерството за финансии. Зоран Георгиевски, член на Синдикатот на Министерството за правда, вели дека сѐ уште немаат никаков сигнал од Министерството за финансии и од Владата и најави дека нема да се откажат сѐ додека не добијат достоинствени плати како во другите државни институции.
На получасовни протести од вторникот излегуваат вработените од Министерството за животна средина и просторно планирање, Министерството за дигитална трансформација, Министерството за земјоделство, Министерството за правда, Министерството за култура и туризам, Министерството за економија и труд, Министерството за транспорт, Државниот завод за статистика и Државниот архив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Видео) Данилоски: Општина Аеродром го скрати спонзорството за МЗТ од 24 на 12 милиони денари

„Општина Аеродром е во толку лоша финансиска кондиција што почна да штеди дури и на спонзорството за кошаркарскиот клуб МЗТ Скопје. Дејан Митески и ВМРО-ДПМНЕ преку Советот на Општина Аеродром ја преполовија сумата која се доделуваше како спонзорство на најголемата аеродромска гордост МЗТ. Само 12 милиони денари Општина Аеродром одвои за спонзорство на МЗТ за 2025 година. Само за потсетување во 2021 и 2022 година овој износ беше 24 милиони денари што е двојно повеќе во однос на износот кој Митески го предвиде за оваа година“, вели Марко Данилоски, секретар на ОО СДСМ Аеродром.
„Митески, Муцунски и ВМРО-ДПМНЕ пред само 4 години ветуваа враќање на МЗТ во АБА 1 лигата. Наместо тоа МЗТ испадна и од АБА 2 лигата. За тоа време финансиските извештаи за работењето на МЗТ се најстрого чувана тајна во Општина Аеродром. Јавно го прашуваме градоначалникот Дејан Митески, дали е точно дека МЗТ должи на играчите? Дали и колку должи по основ тужби заради неисплатени плаќања кон играчи? Дали е точно дека тоа е една од причините за блокадата на сметката на клубот во текот на минатата година? Прашуваме зошто не се објавени јавно финансиските извештаи за работењето на МЗТ? Зошто истите не се разгледуваат на седниците на Советот на Општина Аеродром?“, додава Данилоски.
Според него, Митески и ВМРО-ДПМНЕ должат многу одговори.
„Нема да дозволиме МЗТ да се претвори во пералница на пари и инструмент за богатење на поединци. На МЗТ му е потребна помош и искрена поддршка, а не лажни предизборни ветувања. МЗТ денес е понижен, а неговите искерни поддржувачи се прелажани. Памтиме времиња кога играчите вадеа срце на терен, а од навивањето на Фемили Аеродром се тресеше цел Балкан. На МЗТ му е потребно обединување од страна на сите политички, партиски и непартиски субјекти. Само со искрена поддршка ќе го вратиме МЗТ на победничките патеки“, завршува Данилоски.
Скопје
Нова опрема во детската градинка „Гоце Делчев“ во општина Илинден

Градоначалникот на Општина Илинден, Александар Георгиевски ја посети детската градинка „Гоце Делчев“ во Илинден, каде во изминатиот период направени се повеќе инвестиции, соопшти општината.
Градоначалникот Александар Георгиевски истакна дека во детската градинка во текот на минатата годината направени се инвестиции, со цел да се подобрат условите за дечињата и вработените со цел обезбедување соодветни услови за престој во оваа установа. За таа цел, обезбедена е опрема за потреба на јаслените групи (слики од шкафовите, занималните, малата кујна), извршено преградување на салата за свечености со ПВЦ врати и промена на врати од занимални. Исто така обезбедени се дидактички материјали и играчки за децата од двата објекта, набавена е нова опрема со која ќе се обезбеди уште подобра исхрана за децата од градинката и целодневниот престој.
Дополнително градоначалникот истакна дека е изготвен Основен проект за доградба на централниот објект со нова кујна со бруто површина од 147м2 која ќе има капацитет за подготовка на 800 оброка, а делот во кој сега е сместена постоечката кујна ќе биде реконструиран и адаптиран во занимални за деца.
Општина Илинден и во наредниот период ќе продолжи со инвестирање во опрема во детската градинка и училишта на нејзина територија, затоа што гризата за децата и образованието се една од најважните алки во општеството, велат од општината.
Македонија
ВМРО-ДПМНЕ: Љупчо Коцевски е целосно одговорен за не постапувањето и неработењето на обвинителите под него

„Македонија мора да функционира како правна држава, неопходни се коренити реформи во правосудството. Функционирањето на Коцевски повеќе од 8 месеци е поразително. Коцевски со месеци ги штити поранешните функционери од СДС и ДУИ. Љупчо Коцевски 8 месеци нема покренато ниту едно обвинение. Љупчо Коцевски е целосно одговорен за не постапувањето и неработењето на обвинителите под него“, велат од ВМРО-ДПМНЕ.
„Љупчо Коцевски е одговорен за ставањето под закрила на политичките криминалци од СДС и ДУИ. Коцевски наместо да работи на владеење на првото и да го санкционира криминалот тој ја продлабочува недовербата на граѓаните во правосудството. Коцевски не постапува по наводите за криминал. Коцевски и ЈО со прст не мрднаа по мноштвото докази кои излегоа во јавноста за сторен криминал. За Коцевски не постои институтот за отворање на предмет по допрен глас. СДС поради контрола на судството инсталираше обвинители и судии избрани во Струмица и Зајас кои не постапуваат по наводите за криминал“, посочуваат од ВМРО-ДПМНЕ и додаваат:
„Извештајот на Транспаренси каде Македонија има пад од 12 места на светскиот индекс на корупција покажува дека токму правосудството е најслабиот столб во општеството во кое граѓаните имаат доверба од само 2 проценти. Коцевски треба да знае дека правдата не смее да чека, граѓаните заслужуваат правда и не можат повеќе да трпат неуспех, несериозност и непрофесионалност од судиите и обвинителите. ЈО на чело со Љупчо Коцевски наместо да го санкционира криминалот ги штити политичките елити блиски до СДС и ДУИ со што предизвикува ерозија на судскиот систем и недоверба во јавните институции“.