Вештачката интелигенција повеќе не се третира како футуристички концепт, туку е реалност и има голема примена во секојдневието. Планираме нејзино етапно воведување во наставните програми во училиштата, тоа е наша должност со цел младите преку формалниот процес на образование да се запознаваат со придобивките, но и со предизвиците од нејзината употреба.

Ова го истакна министерката за образование и наука на дебатата со наслов „Дали имаме национален капацитет за брза адаптација на работната сила со предизвиците што ги носи вештачката интелигенција?“, организирана во рамките на 19-годишната конференција на МАСИТ – Стопанската комора за информатички и комуникациски технологии, што денес и утре се одржува во Скопје.

„Вештачката интелигенција има голем потенцијал во областа на образованието. Таа може да го револуционизира начинот на кој се учи и се предава. Може да го персонализира образованието приспособувајќи ја содржината на индивидуалните потреби и стилови на учење на секој ученик. Ова може да доведе до подобри резултати од учењето“, рече Јаневска посочувајќи дека зборува за вештачката интелигенција, која е во согласност со етичките и моралните начела и норми.

Говорејќи за дигитализацијата на образованието, министерката рече дека тоа е почнат процес во кој државата е поназад од земјите од ЕУ, а понапред во споредба со земјите во регионот. Посочи дека министерството е фокусирано на два аспекта – дигитализација на наставата и дигитализација на образовните услуги.

„Дигитализација на наставата подразбира опремување на училиштата со квалитетна ИТ-инфраструктурна мрежа и ИТ-уреди, обезбедување дигитални алатки и платформи, дигитализирани учебници и слично. Од друга страна, пак, веќе нудиме дигитални услуги за остварување повеќе права – упис во прво одделение и прва година во средно образование, аплицирање за стипендии, за сместување во ученички и студентски домови, за субвенциониран оброк и така натаму. Во напредна фаза е и дигитализацијата на услугите на повеќе факултети“, рече Јаневска.

Нагласи дека државата се води по национални, но и меѓународни документи, како, на пример, акцискиот план за дигитално образование.

„Периодов фокусот е ставен и на реформската мерка за инклузивна дигитална трансформација на образованието преку која е предвидено над 95 % од наставниците до крајот на 2027 година да бидат високо обучени во полето на дигиталните вештини“, додаде министерката.

Буџетот што ќе го добие Министерството за образование и наука в година ќе изнесува 40 милијарди денари, што е најмногу досега. Според Јаневска, тоа ќе значи и повеќе пари за дигитализација, како и за поддршка на работата на научноистражувачките работници, кои очекува во иднина повеќе да се занимаваат со иновации во областа на вештачката интелигенција.

На дебатата, покрај министерката Јаневска, учествуваа и министерот за дигитална трансформација, Стефан Андоновски, претседателот и заменик-претседателката на МАСИТ, Илија Господинов и Весна Иваноска, како и директорот на активноста на УСАИД за млади што активно создаваат можности – Youth Actively Create Opportunities (YACO), Небојша Мојсоски.