Претседателот на Собранието, Африм Гаши, учествуваше на Самитот на албанската дијаспора што се одржа во Тирана, каде што се дискутираше за улогата на дијаспората во демократскиот развој и институционалното застапување.

Во своето обраќање, Гаши ја нагласи важноста од справување со причините за миграција, подвлекувајќи ја потребата од креирање на одржливи политики што ќе обезбедат поголема застапеност на дијаспората во одлучувачките процеси. Тој, исто така, ја истакна потребата од градење реални можности за граѓаните, за да можат да го остварат својот интелектуален и професионален потенцијал во сопствената земја, како еден од клучните начини за спречување на миграцијата.

Во рамките на оваа посета, претседателот на Собранието оствари средба со претседателот на Република Албанија, Бајрам Бегај. На оваа средба беа потврдени одличните односи меѓу двете земји, како и заедничката посветеност на патот кон европската интеграција. Соговорниците ја истакнаа важноста на регионалната соработка, разговарајќи и за политичките случувања и државотворната улога на Албанците во Република Северна Македонија. Посебно внимание им беше посветено на инфраструктурните проекти како клучен елемент за зајакнување на врските меѓу земјите. Нагласено беше дека стратешкото партнерство со јасна евроатлантска ориентација, правилната соработка и меѓусебната поддршка остануваат главни столбови за понатамошното продлабочување на братските односи.

За време на престојот во Тирана, претседателот Гаши оствари средба и со претседателот на Собранието на Република Албанија, Нико Пелеши. Оваа средба, прва откако ја презеде функцијата претседател на Собранието, се смета за важен чекор во консолидирањето на меѓупарламентарната соработка. Соговорниците разговараа за напредокот и заедничките предизвици на патот кон Европската Унија, нагласувајќи ја улогата на собранијата во приближувањето на политиките, размената на искуствата и градењето одржлив институционален дијалог. Во оваа прилика, претседателот Гаши го покани својот колега на официјална посета на Скопје, со цел понатамошно продлабочување на соработката преку парламентарната дипломатија и заедничките иницијативи.

Граѓанската иницијатива Support Kocani информира дека со дел од преостанатите средства од донациите е реализирана набавка на медицински креми за третман и нега на лицата погодени од пожарот во Кочани, во вкупна вредност од 1.023.871 денари.

Во рамки на набавката се обезбедени 300 креми Bioderma SPF 50, 300 креми Cicatrix и 150 сетови La Roche-Posay, кои се наменети за заштита, регенерација и подобрување на состојбата на кожата кај лицата со изгореници.

Од иницијативата информираат дека набавката е реализирана во директна комуникација со засегнатите лица и согласно нивните реални потреби, со цел да се обезбеди соодветна и навремена поддршка во процесот на закрепнување.

Средствата за набавката се обезбедени преку донации од граѓани и компании, а дел од процесот е реализиран со поддршка од аптеките кои овозможиле значителен попуст.

Лицата на кои им се потребни овие препарати ќе можат да ги подигнат од младинскиот центар „Гнездо“ во Коачни.

Оваа поддршка претставува уште еден доказ дека солидарноста и заедништвото имаат вистинска сила кога се најпотребни. Support Kocani останува посветена на помош и грижа за сите засегнати, сè додека постои потреба.

Агенцијата за аудио и аудиовизуелни медиумски услуги изразува загриженост во однос на изјавата на претседателот на политичката партија СДСМ, Венко Филипче, во која беа изнесени обвинувања и квалификации за политичка и финансиска зависност на ТВ Алфа.

„Јавното етикетирање и инструментализација на медиумите во политички конфронтации не е во согласност со демократските принципи, ниту со гарантираната слобода на изразување. Апсолутно е недозволиво носител на јавна функција да користи дискредитирачка реторика која придонесува кон поларизација во медиумскиот простор и може да ја наруши довербата на јавноста во медиумите.

Доколку постојат сомнежи за евентуални незаконитости или нерегуларности во работењето на медиумите, наместо преку јавни обвинувања или политички квалификации тие треба да се изнесат пред надлежните институции за понатамошно постапување.

Ги повикуваме сите политички субјекти да се придржуваат кон одговорна и конструктивна комуникација и да се воздржат од изјави кои можат да ја нарушат довербата во медиумите или да создадат притисок врз нивното работење“, се наведува во соопштението на АВМУ.