Македонија
Анѓушев и Фазлиу на средба со градоначалниците од Скопскиот Плански Регион
Скопскиот Плански Регион е најразвиен од осумте региони во земјата, но сепак постојат диспаритети во развојот меѓу 17-те општини и во самите општини што се дел од овој регион. Како до порамномерен развој во Република Северна Македонија и во планскиот регион беше темата на седницата на Советот за развој на Скопскиот Плански Регион, на кој учествуваа потпретседателот на Владата за економски прашања, Кочо Анѓушев, министерот за локална самоуправа, Сухејл Фазлиу, заменик-министерот за локална самоуправа, Дејан Павлески, и директорот на Бирото за регионален развој, Рамиз Реџепи.
Вицепремиерот Анѓушев потенцира дека рамномерниот регионален развој е важен дел дел од програмата за работа на Владата. Тој дополни дека сите граѓани во Република Северна Македонија, независно од местото на живеење, треба да имаат исти услови и квалитет на живот, што е и клучната цел на рамномерниот регионален развој.
„Треба да учиме од направените грешки и средствата со кои располагаме да не ги насочуваме во непродуктивни и неефикасни проекти, каков што беше ‘Скопје 2014’. Сите сме свесни колку средства се потрошени за реализација на овој мегаломански проект, а колку бенефит имаат граѓаните од тоа. Доколку тие средства беа насочени кон реалните потреби на граѓаните во Скопскиот Плански Регион и во земјата, сигурен сум дека ќе беа надминати многу проблеми на локално ниво, кои ги засегаат граѓаните“, рече вицепремиерот.
Тој дополни дека Владата и Министерството за локална самоуправа работат на воспоставување системско решение преку проектот за одржлив и иклузивен развој, кое ќе придонесе значително да се подобрат планирањето и следењето на реализацијата на буџетските средства за проекти што се реализираат во пооделни региони на земјата.
„Ќе имаме подобар увид во планирањето, распределбата и реализацијата на буџетските средства, од сите државни институции, во соодветните региони, и ќе се овозможи подобро планирање на финансиите во насока на рамномерен регионален развој. Целта е разликите во развојот помеѓу и во рамките на планските региони да се намалат, а како резултат на тоа граѓаните, особено оние од помалку развиените региони во земјата, да имаат подобри услови за живеење“, потенцира Анѓушев.
Министерот за локална самоуправа, Сухејл Фазлиу, истакна дека постигнувањето на целите на рамномерен регионален развој подразбира обезбедување континуирана финансиска подршка од надлежните државни институции и успешна координација помеѓу министерствата, донаторите и засегнатите страни на регионално и на локално ниво.
„Во мандатот на оваа Влада средствата за поттикнување рамномерен регионален развој се зголемуваат секоја година. Во 2019 година тие се двојно зголемени во однос на буџетската 2017 и изнесуваат 423.500.000 денари или 7 милиони евра. Ако се земе предвид издвојуввањето и преку програмите на другите министерства, сигурно вкупните средства се и над законските 1 отсто, но e неопходно сите средства да се распределуваат во согласност со степенот на развиеност на планските региони, како што сега тоа го прави Министерството за локална самоуправа, за да може да се влијае на намалувањето на сè уште големите развојни разлики меѓу планските региони“, нагласи министерот за локална самоуправа, Сухејл Фазлиу.
Беше истакната и значајната поддршка од швајцарската влада преку имплементација на проектот „Одржлив и инклузивен рамномерен регионален развој“ преку кој се обезбедува координација и следење на алоцираните средства од разните министерства за развој на планските региони и се зајакнуваат капацитетите за инклузивен начин на утврдување на приоритетите во планските региони, со учество на локалните власти, граѓанскиот и бизнис-секторот.
Очекувањата на градоначалниците се преку соодветни системски решенија да се децентрализира утврдувањето на приоритетите и распределбата на средствата за изградба на капитални јавни објекти, како што се училишта, детски градинки, локални патишта, прочистителни станици, водоводи и канализации, затоа што општините може да направат најдобра процена на сопствените приоритети и потреби.
Седницата на Советот ја водеше претседателот на Скопскиот Плански Регион и градоначалник на општина Гази Баба, Борис Георгиевски, а присуствуваа претседателот на ЗЕЛС и градоначалник на Скопје, Петре Шилегов, како и градоначалниците на општините Арачиново, Бутел, Карпош, Кисела Вода, Петровец, Студеничани, Сопиште и претставници на другите општини од Скопскиот Плански Регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
ЈСП: Јавниот превоз по неделен возен ред, жичницата на Водно нема да работи
Јавното сообраќајно претпријатие Скопје соопшти дека јавниот превоз ќе функционира по неделен возен ред, а жичницата на Водно нема да работи.
Како што се појаснува во соопштението, дежурни од седум до 14 часот ќе бидат билетарниците на Транспортен центар и таа во Ѓорче Петров.
Македонија
Променливо облачно и потопло со сончеви периоди
Времето денеска ќе биде променливо облачно и потопло со сончеви периоди. Кон крајот на денот ќе има локален слаб дожд, краткотрајно пороен, проследен со појава на ретки грмежи. Ќе дува умерен, а во западните делови повремено засилен ветер од југозападен правец. Минималната температура ќе биде во интервал од 4 до 10, а максималната ќе достигне од 16 до 24 степени.
Во Скопје променливо облачно и потопло со сончеви периоди. Во делови од котлината ќе има услови за појава на краткотраен пороен дожд со ретки грмежи. Ќе дува слаб до умерен променлив ветер. Минималната температура ќе се спушти до 6, а максималната ќе достигне до 22 степена.
Во четврток ќе се задржи променливо облачно време со повремени врнежи од дожд. Локално врнежите ќе бидат поројни, проследени со појава на грмежи, а на повисоките планини ќе преминуваат во повремен слаб снег. Од петок следува период на претежно стабилно и потопло време.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.