Македонија
Ахмети: Груевски ме предупреди дека ќе ми врати
Декларацијата на политички партии на Албанците не е дел од историјата, изјави шефот на ДУИ, Али Ахмети. Според него, по празникот Бајрам коалициските партии ќе се состанат повторно и наскоро во Собранието ќе се најде новиот Закон за албански јазик.
„Прашањето за јазикот е дел од договорот за коалицијата. Само прашање на време е кога ќе биде во собраниска процедура за гласање. “ – уверуваше Ахмети. Запрашан дали тоа ќе се случи пред локалните избори, Ахмети не даде конкретни рокови.
„Не ме држете за збор, тоа е дел од агендата.“ – одговори Ахмети.
Во интервју за емисијата „Патот кон…“ Ахмети зборуваше за распоредувањето на ресорите со коалицискиот партнер. Тој рече дека прашањето на јавниот обвинител и понатаму останува отворено и дека не е време Управата за безбедност и контраразузнавање да ја раководи Албанец. Ахмети призна дека овој владин мандат е тежок поради бројките, но рече дека ќе успее благодарение на помошта од меѓународната заедница. Меѓу другото, Ахмети рече дека одлуката за коалиција со СДСМ не била наметната и дека за ова самиот го известил лидерот на ВМРО – ДПМНЕ, Никола Груевски. По ова, Груевски му рекол дека ќе му се одмазди.
„Рече вие како ДУИ, тоа што ми направивте во периодот 2006 – 2007 година на истиот начин ќе ви вратам. Се знае какви беа реакциите на ДУИ во периодот 2006 –2007 кога неправедно остана надвор застапувањето на албанскиот електорат, волјата на албанското мнозинство во Република Македонија.“ – изјави Ахмети, објаснувајќи дека тоа сепак не била закана туку предупредување.
Ахмети ја отфрли секоја можност за тајни политички договори со СЈО, одговарајќи на обвиненијата дека СЈО има селективен пристап кон претставниците на ДУИ. Тој рече дека нема да амнестира ниту ќе ги заштити функционерите на неговата партија доколку ја злоупотребиле дадената доверба. Исто така ги отфрли тврдењата за тајни коалиции со лидерот на ДПА, Мендух Тачи, со образложение дека тема на дискусија на последниот состанок бил Договорот од Пржино.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Османи: Имало информации дека Израел го нападнал Иран, меѓутоа се’ уште не се потврдени
Oткако САД денеска препорачаа до нивните граѓани да не го напуштаат Тел Авив и главните центри на Израел поради можни напади, не е исклучена можноста и македонското МНР да упати порака за претпазливост до нашите државјани таму.
„Во текот на денот и ние ќе ги информираме нашите граѓани, иако постојано сме во комуникација со тие што се таму“, изјави министерот за надворешни работи, Бујар Османи.
Како што рече нема нови пријави од наши граѓани кои се наоѓаат во Израел и во регионот на Блискиот исток за евентуална евакуација.
По објавата на западните медиуми дека Израел утрово го нападнал Иран, Османи изјави дека постојано се следи состојбата, а утринава повторно разговарал со нашиот амбасадор во Израел.
„Имало некои информации дека во текот на ноќта Израел го има нападнато Иран, меѓутоа се уште не се потврдени и затоа не ве информирав по тоа прашање. Меѓутоа тоа се информациите од утринскиот разговор што го имав со нашиот амбасадор, но немаме барање ниту преку СОС телефонот ниту преку нашата Амбасада за евакуација“.
Сите државјани кои имаат потреба од евакуација можат да стапат во комуникација со нашата Амбасада во Тел Авив на дежурниот телефон 972 549 267 378 како и СОС дежурните телефони на МНР 075 273 732 и 075 268 376 со цел подготовки за евентуална евакуација.
Македонија
Османи со конкретен акциски план за оддржлив економски раст на Северна Македонија
Кандидатот за претседател на Европскиот фронт, Бујар Османи, со конкретен акциски план за економски раст на Северна Македонија преку постигнување национален конзензус и формирање национален совет во серијата средби со разни фактори на државата тој реализира средба со претставници на Стопанската комора на Северна Македонија.
„Ќе предложам како Претседател на државата да се создаде национален совет за економски раст, со кој ќе претседава Претседателот како креатор на државен консензус а во кој ќе учествуваат поголемите политички партии од двете етнички заедници, но и претставници на заедниците под 20 %, регулаторите, бизнис заедницата, синдикатите, Организацијата на потрошувачите, Академијата, невладините организации и останатите интересни групи, како еден вид на државен управен борд, со цел постигнување на државен консензус по однос на клучните параметри и регулативи за еден забрзан и оддржлив развој“, презентира Османи дел од својата визијата за земјата.
„Овој борд или овој национален совет би имал пет работни групи: една за ефикасна администрација, ефикасни институции и професионална администрација, втора за оддржливи финансии, третата работна група за дигитализација, четврта за човечки капитал и петта, за инфраструктура. Во секоја од работните групи покрај експертите од чинителите кои што ги спомнав, би имало и меѓународни експерти и би имало наши претставници од дијаспората кои што се интегрирани во нивните општества со цел да се пренесат нивните искуства. Овие работни групи ќе предложат политики, закони, регулативи, параметри до овој национален совет, овој државен совет за постигнување државен консензус, кој што ќе ги одобри. Очекувам во првите шест месеци да се направи првиот предлог. Тогаш политичките партии ќе ги усвојат тие закони и тие регулативи, без расправа. Владата заедно со опозицијата ќе ги имплементира и ќе ги мониторира“, истакна Османи.
Според Османи, нашата економија е жртва на постојаните циклички политички кризи, а со преговорите со Европската Унија, земјата, покрај државниот консензус за ЕУ, мора да има и економски државен консензус во однос на општите параметри.
“Дали групата за оддржливи финансии ќе предложи дефицитот да не биде повеќе од 3 % и тоа ќе биде усвоено од страна на овој борд, што значи и од позицијата и од опозицијата и од чинителите, тогаш секој мора да го почитува и без расправа тоа да го имплементира. Ако надворешниот долг не треба да биде над 60% сите чинители ќе го почитуваат тоа. Исто како што е со регулативите и директивите на ЕУ, тие се фиксни, тие не се преговараат, тие само се имплементираат. Затоа сметам дека оваа ќе биде еден нов квалитет во постигнување на еден оддржлив и забрзан раст” заклучи Османи.
Преку изборната програма, Декалогот на Европскиот претседател, Османи предвидува и директно учество на Претседателот во пет надворешно-политички иницијативи, во кои заедно со бизнис заедницата ќе ги претстави економските потенцијали на државата надвор од земјата.
Македонија
Богојески: Хејтери во политиката ми го злоупотребуваат прекарот Бунтур наследен од прадедо ми од Илинденското востание
Колку време трае кампањата за претседателските, а сега и за парламентарните избори, толку време сум цел на напади и говор на омраза од политичките противници, реагира Петар Богојески, лидер на партијата Македонски концепт, која на претстојните избори е дел од коалицијата „Твоја Македонија“, предводена од ВМРО-ДПМНЕ. Богојески вели дека многумина од политичарите во кампањата му го злоупотребуваат прекарот Бунтур наследен од прадедото.
„Родум сум од Крушево, но малкумина знаат дека сум директен внук по машка линија на Димитар (Миту) Бунтурот, ополченик и борец за ослободување на Македонија во балканските и во Првата светска војна за што е носител на златен Медал за храброст. Внук сум на Петар Богојески-Бунтурот, чие име го носам, учесник во НОБ на Караорман и носител на златен Медал на трудот на Југославија. По мајчина линија, пак, внук сум на првоборецот Кицо Петрески, загинат на Сремскиот фронт, и на Борис Петрески, ранет на истото место. Од таму доаѓа и мојот прекар Бунтур, кој често во јавноста се злоупотребува од хејтери во политиката“, вели Богојески.
Богојески уверува дека нападите нема да го вратат од намерата за рестарт на Македонија по изборите, но нагласува дека не може да ја разбере фрустрацијата на оние што секојдневно го навредуваат на лична основа.
„Кратко истражување на јавниот простор веднаш ги отркива фактите и честите деманти на речиси сите обвинувања. Последните клевети за примање мито за да се вклучиме во коалицијата ‘Твоја Македонија’, создавањето лажни профили со моето име и споделувањето лажни изјави и слично се веќе основа за вклучување на ОЈО во целиот процес. Буквално, освен клевета и навреда, украден ми е личниот идентитет и во мое име се објавуваат лажни изјави, што е кривично дело. Зошто токму јас сум предмет на тие хибридни напади? Кој се плаши од мојата вистинска факторизација на политичката сцена во земјата“, посочи Богојески.
Последната клевета од вицепремиерот и главен активист на ДУИ, Артан Груби, кој ја обвини Македонски концепт за руска партија, Богојески ја оцени како трагикомична. „Тоа веќе е трагикомично, со оглед на јавните прозападни ставови на мојата партија, и тоа години и години. Но, зошто токму ДУИ толку многу се плаши од Македонски концепт? Дали мојата чистота како човек, моето потекло и бескомпромисното поведение на борец за каузата се причина за тој страв кај ДУИ?“, прашува Богојески. Како сопруг и татко на две деца, вели дека не му е сеедно што политичката пресметка со навреди завршува и пред очите на семејството, па јавно прашува дали е тоа нивото на македонската политика или се може и подобро.
ПР-текст