Македонија
Боки-13 го испрашуваше Камчев пред судот
Бизнисменот Јордан Камчев пред Граѓанскиот суд одговараше на прашања од тужениот Бојан Јовановски-Боки 13. Камчев одговараше каде првпат го пријавил рекетот, односно барањето пари од Боки 13, со кои требало да се сопре обвинението за предметот „Империја“ против него.
Бојан Јовановски-Боки 13: „Кога е стапено во контакт со тогашниот директор на УБК, Горан Николовски-Џони?“
Камчев: „Додека бев во домашен притвор“
Бојан Јовановски-Боки 13: „Што му било кажано, какви насоки добил?“
Камчев: „Не ценам дека треба да одговорам. Пријавено е. И толку. Јас кажав дека адвокатот добил насоки, кои потоа ги спровел. Јас не примив насоки од директорот“.
Бојан Јовановски-Боки 13: „По усната пријава до директорот на УБК, додека издржувал притвор, што направил?“
Камчев: „Јас продолжив да контактирам со Бојан. Кога се создадоа услови, целиот настан го пријавив во ОЈО – ГОКК. Дадов електронска комуникација со првотужениот, како и она што јас го запишував, мои белешки“.
Бојан Јовановски-Боки 13: „Правосилната пресуда со која се парадира овде е пред највисокиот суд во државата, со барање користење вонредни правни лекови. Се надеваме дека таа со пресуда, која со оглед на овие сите небулози и недоречености, ќе ја докажеме вистинската фактичка состојба. Знам дека не е овде местото. Апелирам до Врховниот суд да ги цени сите околности за случајот ‘Рекет’, чија единствена цел е спас на Орце Камчев, кој е најдокажаниот проневерувач во државата“.
Боки 13 го праша Камчев дали го познава Зоран Заев, а бизнисменот одговори потврдно.
„Сум имал средба со него. Разговарав за рекетот што го правеше Бојан Јовановски преку ‘1ТВ’ и неговата организација Меѓународен сојуз. Не сум разговарал за случајот ‘Империја’. Немам што да зборувам за тоа, не е Заев обвинител или судија“, изјави Камчев.
Боки 13 праша, ако Заев не е обвинител или судија, зошто разговарал со него за рекетот што го споменал претходно. Бизнисменот рече дека на средбата со експремиерот немало други лица.
„Мотивот беше да биде информиран дека тоа што се случува, дека јас и група бизнисмени сме принудени да се рекламираме и ни се нудат фиктивни проекти. Јас кај Заев не бев да пријавувам, туку да укажам на работи. Првин се сретнав со Заев, тоа беше средба пред пријавата“, рече Камчев.
Камчев беше прашан и дали додека бил во домашен притвор (периодот пред да ги даде тие 1,5 милион евра) бил посетуван од политичари во својот дом и кој доаѓал: „Ниту еден политичар не го посетил мојот дом, го посетувале моите најблиски пријатели, фамилијата, Бојан Јовановски“.
„Сега се потврди една лага, каде што тужителот кажува дека не му доаѓале политичари, а пред Кривичниот суд вели дека му доаѓале 4-5, ама не знаел зошто Обвинителството не ги споменало“, коментира Јовановски пред судот.
Камчев реагира дека Бојан Јовановски претерал со коментарите и со прашањата.
Прашања до тужителот Камчев имаше и судијата Андреј Димовски, кој најпрвин го праша дали било реализирано тоа што било платено, а бизнисменот негира. Во текот на судењето судијата праша и дали било поднесено обвинение за „Империја“, на што Камчев одговори потврдно.
Судијата праша: „Знаете дека рекетот е кривично дело ако ги платите тие 1,5 милион евра? Сте можеле да ја одбиете понудата“, а бизнисменот одговори: „Јас направив тоа што мислев дека е најпаметно за мене и да ја спасам државата од луѓето што правеа измама на бизнисмени“.
„Можам да разберам дека доброволно се согласивте да ги исплатите?“, праша судијата, а бизнисменот се бранеше: „Јас ги исплатив паричните средства, 1,5 милион евра, за да имам доказ, потоа да го документирам случајот и напоменувам дека во периодот кога беа исплатени парите јас бев во притвор и немав можност да се одбранам“.
Прашан дали имал адвокати, Камчев рече дека имал, но немал доверба за да пријави додека бил во притвор: „Во тој момент немате ниту доверба во сите адвокати, го направив она што најдобро го знам“. Судијата го праша зошто писмено не пријавил за случајот „Рекет“ кај институциите, Камчев рече: „Адвокатот беше пријател со директорот на АНБ“. Според Камчев, тој имал средба со Катица Јанева. „Јас во два наврата кога бев повикан во СЈО, додека бев во куќен притвор, остварив непосредна средба со Катица Јанева. На средбата беа присутни адвокати, а кога заврши, Катица им кажа на обвинителката и на адвокатите да излезат од просторијата и рече: ‘Тоа што е со Бојан, да се заврши’“, рече Камчев. Прашан кога биле платени 1,5 милион евра, Камчев рече: „Парите беа исплатени по излегувањето од притвор на слобода. Ги алармирав институциите во предметот познат како ‘Империја’, сѐ уште не е поднесено обвинение, истиот предмет се наоѓа во фаза на истрага“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.