Македонија
(Видео) Адеми: Меѓу земјите сме со највисок скок во постигањата помеѓу две ПИСА-тестирања
Учениците од Северна Македонија постигнаа исклучителен напредок во резултатите помеѓу двете последни ПИСА-тестирања спроведени од страна на Организацијата за економска соработка и развој. Организаторот на меѓународната студија преку која се проверува јазичната писменост, математичката писменост, како и знаењата на учениците во областа на природните науки утрово го потврди напредокот, а резултатите денес во Владата ги презентираше и министерот за образование и наука Арбер Адеми.
Адеми информираше дека резултатите од последното тестирање се најдобри досега, односно значително подобри во однос на резултатите кои нашите ученици ги постигнаа во изминатите две тестирања на кои учествуваа, потенцирајќи ја потврдата на ОЕЦД дека сме една од земјите со најголем напредок помеѓу две тестирања.
„Конкретно, во областа на читање со разбирање учениците од Северна Македонија го остварија највисокиот скок, односно се на прво место по напредок. Во областа на природните науки на второ место по скок во резултатите и на трето место во областа на математиката“, рече Адеми, информирајќи дека успехот е постигнат во конкуренција на 79 земји кои изразиле интерес суштински и по меѓународни стандарди да ја проверат подготвеноста на учениците за практично да го применуваат знаењето што го стекнале до 15-годишна возраст.
Споредувајќи ги резултатите од 2015 и 2018 година, Адеми информираше дека резултатите од проверката на способноста за читање со разбирање кои ги остварија учениците се подобрени за 41 поен, односно од 352 постигнати поени во 2015 година, на 393 поени во 2018 година; резултатите од тестирањето по природни науки се зголемени за 29 поени, од 384 во 2015 година на 413 поени во 2018, додека резултатите по математика се подобрени за 23 поени, од 371 на 394 постигнати поени.
Според официјалните ранг-листи, Република Северна Македонија сега е на 62. место по резултатите од природни науки, на 66. место по читање и на 67. место по резултатите од математика. Напредокот е видлив, ако се има предвид дека во 2015 година земјата беше на 68. место по резултатите од математика и на 69. место по резултати од природни науки и читање, и тоа во конкуренција на 72 држави.
„Ценам дека напредокот е плод на суштинските промени кои се направија во изминатиот период во областа на образованието преку еден инклузивен пристап со учество на сите засегнати чинители. Но, исто така се и плод на добрата организираност за имплементација на ПИСА-тестирањето“, рече Адеми, додавајќи дека пред официјалното, беше спроведено пробно тестирање, а во меѓувреме сите учесници во процесот – 760 наставници, директори и над 5.500 ученици беа добро обучени и конкретно насочени за постапување, што придонесе да биде разбрана суштината и важноста на овој процес.
Адеми нагласи дека резултатот треба да нé радува, но и како што рече, да нé мотивира да го одржиме континуитетот во креирање и спроведување длабински образовни реформи во секој сегмент, на секое ниво и од секој аспект.
„Гледаме дека заложбите почнуваат да го даваат очекуваниот и проектиран позитивен ефект. А тоа е така, бидејќи политиките кои ги креираме се засноваат на објективни и кредибилни анализи и истражувања за тоа што навистина е потребно да се промени во образовниот систем“, потенцираше министерот за образование, додавајќи дека ваквиот начин и пристап на креирање политики кај него влева оптимизам дека Северна Македонија ќе постигнува уште подобри резултати на следните тестирања.
Заблагодарувајќи се на сите учесници во процесот на ПИСА 2018-тестирањето, Адеми најави дека нашата земја веќе ги започна подготвителните активности и ќе биде дел од следното тестирање во 2021 година, откако претходно во 2020 ќе се спроведе пробен процес.
„Во меѓувреме, Владата, МОН и сите останати засегнати институции и чинители, продолжуваме со спроведување на реформите, на промените кои не можат да се случат преку ноќ, туку потребна е сплотеност, многу труд и работа. Ова постигнување е одличен показател дека се движиме на прав пат, да создадеме квалитетен и конкурентен национален образовен систем“, рече Адеми.
За Северна Македонија ова е трето учество на меѓународното ПИСА-тестирање, по 2000 и 2015 година кога според резултатите бевме земја речиси на дното на ранг-листите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Конечно Работнички се враќа на шампионските патеки
Градоначалникот на Општина Центар Горан Герасимовски вчера вечер присуствуваше на тренингот на КК Работнички во салата Кале. Со кошаркарите разговараа за издигнувањето на тимот и потребите за достигнување на високи резултати и на следните натпревари.
„Сакам да се заблагодарам пред се и на тренерот на цел стручен тим но и на сите играчи за одличните резултати коишто ги имаме годинава. Успеавме со клубот од невозможно да направиме возможно. Клубот којшто го начекавме пред две години на 10то место со 4-5 неисплатени плати и долг од 600 000 евра да го вратиме на победничките патеки. Важно е што во моментов табелата трепка што сме на прво место и се надевам дека тоа така ќе остане и до крај. Јас верувам дека ќе имаме успех оваа сезона и уште поголем успех следната“, им порача Герасимовски на кошаркарите.
При средбата Герасимовски ги извести играчите дека општина Центар го има имотниот лист на салата и успеа да го исполни ветувањето дека ќе ја врати сопственоста на салата под ингеренции на општината.
Општина Центар на крајот на минатата година доби финансиски средства од Владата во вредност од 30 милиони денари наменети за реконструкција на салата, при што Герасимовски ги информираше играчите со процесот и проект планот кој е веќе во изработка за реновирање на матичната сала на Работнички. Конечно Работнички се враќа на шампионските патеки, ви благодарам за тоа, порача Герасимовски.
Македонија
Петровска: Судот донесе одлука дека Ковачки неправедно ме клеветел
Министерката за одбрана, Славјанка Петровска објави дека судот донел одлука со која се утврува дека пратеникот од ВМРО-ДПМНЕ, Драган Ковачки, неправедно ја клеветел.
„Основниот граѓански суд во Скопје по сите прикажани докази од моја страна донесе одлука со која се утврдува дека тужениот Драган Ковачки искажал невистини и лаги односно неправедно ме клеветел во јавност со цел да ми го наруши угледот и честа во очите на јавноста, Овој е само еден од низата примери на неодговорно, нечесно и валкано однесување на политичката сцена од страна на Ковачки“, пишува Петровска.
Во продолжение таа додава дека не сака пари од нечесник и се откажува од паричниот надомест.
„Секој го прави тоа што најдобро го знае, тие со лагите, јас со труд и одговорна и чесна работа“, додава Петровска.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.