Daily news
(ВИДЕО) Аналитичари: Гласачите на ВМРО-ДПМНЕ испратија порака до Груевски
Порака за промени во ВМРО-ДПМНЕ од поддржувачите на партијата – ова е генералната оценка на некои од аналитичарите за лошите изборни резултати што ги освои партијата на Никола Груевски. Политиколозите Владимир Божиновски и Митко Гаџовски, иако се разидуваат во мислењата за кампањата и изборот на кандидатите за градоначалници на изборите, едногласни се дека гласачите на ВМРО-ДПМНЕ испратиле порака до раководството на партијата.
Божиновски не прецизира дали оставката од Груевски е решението за партијата, но потенцира дека со слабиот одѕив гласачите на ВМРО-ДПМНЕ испратиле јасна порака за промени.
– Според мене, не победи СДСМ, туку изгуби ВМРО-ДПМНЕ, нешто слично како во 2013 година кога поддржувачите на СДСМ не излегоа на изборите. Овој пат се случи спротивното, не излегоа да гласаат поддржувачите на ВМРО-ДПМНЕ. Затоа сите тие истражувања и анкети од претходно покажуваа густа битка за секој глас. Но, затоа што не излегоа гласачите на ВМРО-ДПМНЕ, се зголеми разликата. Таков пример се Битола, Карпош, Велес… Кога гласачи на одредена политичка партија не излегуваат да го дадат својот глас за партијата, тоа е порака до самата политичка партија дека треба да се направат промени. Какви ќе бидат тие промени, ќе си реши самата партија.
Политикологот Митко Гаџовски оценува дека најголемиот виновник за дебаклот на ВМРО-ДПМНЕ на изборите е самиот Никола Груевски. Смета дека се неопходни реформи во партијата, а првиот чекор треба да биде оставката од Груевски.
– Очекувана беше победата на СДСМ, но не со ваква разлика. Мислам дека стратегијата на ВМРО-ДПМНЕ за изборите беше промашена, а огромен удел има раководството на партијата на чело со Никола Груевски, тој е најслаба точка. Секако, влијание има и негативната кампања што се водеше од страна на СДСМ – дека секој глас за кандидатите за градоначалници на ВМРО-ПДМНЕ е глас за Груевски – ефектот беше постигнат. Од друга страна, имаше удел и неквалитетот на кандидатите и нивното лошо владеење, тоа беше казнето од гласачите. Излезот од ова е излезната врата од седиштето на ВМРО-ДПМНЕ за Никола Груевски бидејќи сè додека е тој на челната позиција, партијата нема шанси веќе да победи на ниту едни избори во иднина.
Од ВМРО-ДПМНЕ сè уште не се изјасниле како ќе постапат откако во неделата вечерта партискиот лидер Николa Груевски изјави дека тој е најодоговорен за изборните резултати и, како што кажа, допрва ќе ги анализираат причините и тоа дали можеле да освојат подобри резултати.
Г.Н.Р
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.