Македонија
(Видео) Арсовски: Заев е осамен во желбата за брзи избори
„Зоран Заев е осамен во желбата за брзи избори на сметка на здравјето на граѓаните. Неговите позиции и лицитација со датуми не биле прифатени вчера на лидерската средба буквално од ниту еден од лидерите што беа учесници на средбата. Зоран Заев, како и секогаш, на средбата отишол неподготвен, исклучиво подготвен да разговара за датуми, а не и за заштита на здравјето на граѓаните. Тука е лицемерството на СДСМ и Зоран Заев, каде што велат дека здравјето на граѓаните им е, пред сè, а всушност, единствено им се зборува за датуми“, изјави Димче Арсовски, портпарол на ВМРО-ДПМНЕ, во врска со тврдењето дека изборите се прогласени и дека е постигната согласност за важење на уредбата за изборите, т.е. тие да се одржат 22 дена по вонредната состојба.
„Неколку невистини искажани од Заев и Спасовски по одржаната лидерска средба би сакал јавно да ги обелоденам пред граѓаните за да не дојде до забуни. Најпрвин, не е точна изјавата на Зоран Заев дека изборите се прогласени. Најпрвин, избори не може да бидат прогласени кога договор за датум нема консензуално од лидерите, а датумот, пред сè, зависи од три фактори: оценка за здравствената состојба од Комисијата за заразни болести, потоа мислење од ДИК за преземање какви било дејства и подготовка за избори, како и обезбедување официјални набљудувачи од ОБСЕ и ОДИХР, кои треба да обезбедат целосно покривање, односно мониторинг на мисијата и целиот изборен процес, односно и денот на гласањето.
Целосно е невистинито и повторно тука лажат Зоран Заев и Спасовски со тврдењето дека изборните дејства продолжуваат таму каде што застанаа последниот пат пред да се прогласи на вонредната состојба од страна на Стево Пендаровски. Не може да е така ова затоа што фактот оти и двајцата се согласија дека ДИК треба да даде своја процена за тоа колку време е потребно време за подготовка на изборите под услов дека Комисијата за заразни болести ќе даде зелено светло дека може да има услови за кампања, односно да си течат изборите, и објективно потребното време на ДИК за прочистување на Избирачкиот список, односно организирање на самите изборни дејства и условите што треба да бидат обезбедени. Таков рок е минимум шеесетина дена од денот на распишувањето на изборите“, вели Арсовски.
Според него, трета невистина од Зоран Заев е таа дека укинувањето на вонредната состојба ќе значи и веднаш почеток на еден изборен период.
„Тоа не може да се толкува така и на тој начин и преставува противправно толкување на Изборниот законик. Сега веќе е сè повеќе забележително незрелото однесување на Зоран Заев, како и лицемерството и бесчувствителноста кон заштитата на здравјето на граѓаните, кое сепак е најважно за сите други, освен за Заев, кому му се брза за избори.
За Зоран Заев, лидерската средба се претвори во политиканство и во борба за помал пораз, а не и во суштинска борба за здравјето на граѓаните, односно најпрвин да се исполнат сите услови, па потоа да се организираат избори. Добро е што на таа лидерска средба е прифатен планот на претседателот Мицкоски во 4 точки, со што ќе се гарантира најпрвин здравјето на граѓаните. Уште подобро ќе биде Зоран Заев на ова да пристапи сериозно и зрело, а не незрело и очајно како и во моментот, или калкулантски во обид да спаси нешто од последните денови на својата политичка кариера. Ова не е борба за потесен пораз на Зоран Заев, туку борба за заштита на здравјето на граѓаните, кое е најважно во моментот. Но, сепак, нокаутот од народот за Зоран Заев на изборите не му бега, кога и тие да се случат, Зоран Заев ќе изгуби, ќе биде нокаутиран од страна на граѓаните, но во моментот е најважно здравјето на граѓаните“, додаде Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Македонија денеска избира претседател: седум имиња се на гласачкото ливче
Во Северна Македонија ќе се одржат седмите претседателски избори, а до затворање на избирачките места во 19 часот, на сила е изборен молк.
Евентуалниот втор круг од претседателските избори е закажан за 8 мај, за кога се закажани парламентарните избори.
На претседателските избори учествуваат седум кандидати – пет мажи и две жени.
Кандидати се актуелниот претседател Стево Пендаровски кој е поддржан од СДСМ и коалицијата, Гордана Силјановска Давкова од ВМРО-ДПМНЕ, Билјана Ванковска која е поддржана од Левица, Максим Димитриевски од движењето Знам, Стевчо Јакимовски од партијата Гром, Арбен Таравари од коалицијата Вреди и Бујар Османи кој е поддржан од Европскиот фронт.
Владата го прогласи денот на изборите за неработен.
Во избирачкиот список за претседателските избори се запишани 1.814.317 избирачи, а во странство ќе гласаат 2.569 гласачи со државјанство на Северна Македонија.
Во посебен избирачки список запишани се 2.147 лица кои издржуваат затворска казна или притвор.
Скопје
ЈСП: Јавниот превоз по неделен возен ред, жичницата на Водно нема да работи
Јавното сообраќајно претпријатие Скопје соопшти дека јавниот превоз ќе функционира по неделен возен ред, а жичницата на Водно нема да работи.
Како што се појаснува во соопштението, дежурни од седум до 14 часот ќе бидат билетарниците на Транспортен центар и таа во Ѓорче Петров.
Македонија
Променливо облачно и потопло со сончеви периоди
Времето денеска ќе биде променливо облачно и потопло со сончеви периоди. Кон крајот на денот ќе има локален слаб дожд, краткотрајно пороен, проследен со појава на ретки грмежи. Ќе дува умерен, а во западните делови повремено засилен ветер од југозападен правец. Минималната температура ќе биде во интервал од 4 до 10, а максималната ќе достигне од 16 до 24 степени.
Во Скопје променливо облачно и потопло со сончеви периоди. Во делови од котлината ќе има услови за појава на краткотраен пороен дожд со ретки грмежи. Ќе дува слаб до умерен променлив ветер. Минималната температура ќе се спушти до 6, а максималната ќе достигне до 22 степена.
Во четврток ќе се задржи променливо облачно време со повремени врнежи од дожд. Локално врнежите ќе бидат поројни, проследени со појава на грмежи, а на повисоките планини ќе преминуваат во повремен слаб снег. Од петок следува период на претежно стабилно и потопло време.