Македонија
(Видео) Арсовски: Анѓушев е вицепремиерот бизнисмен чии бизниси цветаат откако е на власт
„Најнеспособната Влада во историјата на Република Македонија, предводена од најнеспособниот премиер Зоран Заев, е пред реконструкција, која не ветува ништо ново и не ветува ништо подобро. Оваа Влада на Заев и СДСМ е Владата што ја уништи Република Македонија и економски и државнички“, изјави Димче Арсовски, портпарол на ВМРО-ДПМНЕ.
Според него, еден од најзаслужните за уништувањето на земјава и нејзината економија е вицепремиерот Кочо Анѓушев, кој претставувајќи се како владин човек од бизнис-секторот, успеа да ја доуништи и онака кревката економија и да работи единствено за интересите на неговите фирми и бизниси.
„Денеска, иако ги има премногу, ќе потенцираме 5 најважни причини зошто Кочо Анѓушев треба да си оди од власта заедно со сите други и со Заев и тоа уште веднаш.
Кочо Анѓушев е вицепремиерот од Владата на СДСМ, кој сам на себе си додели грант од 160.000 евра преку Фондот за иновации, т.е. на на својата фирма ‘Каст инвест’ и притоа лажеше дека воопшто и не знаел за грантот, туку неговиот менаџмент аплицирал без тој да знае. Кочо Анѓушев е вицепремиерот на СДСМ, кој откако дојде на функција, сам на себе си овозможи царински поволности за литиум-јонските батерии што ги вградува во производите во неговите фирми, кои притоа се единствени фирми во Република Македонија што ги користат токму тие батерии. Тој сега има поволности за набавка, односно за увоз.
Кочо Анѓушев е вицепримерот во Владата на СДСМ, кој својата позиција ја искористи за да ги изгради полесно малите хидроцентрали МХЕ ‘Тополки’ и МХЕ ‘Падалишка Река’, односно ја искористи својата позиција за преку својот колега, министерот Садула Дураку, да си го продолжи рокот за изградба на истите хидроцентрали наместо да му ги прекинат договорите, како што стоело во еден од членовите на договорите, а претходно исто така си донесе одлука за пренамена од земјоделско во градежно земјиште за истите хидроцентрали, со што ја зголеми вредноста на тоа земјиште. Кочо Анѓушев е вицепремиерот што ја искористи својата позиција во Владата за да успее на сомнителен начин, за кој пишуваа и странските медиуми, да ја продаде својата фирма ЕДС на грчкото електростопанство, фирма што работеше во загуба последната година и ја продаде токму во периодот кога се продаваа и националните интереси на државата за неколку милиони“, рече Арсовски.
Тој додаде дека Кочо Анѓушев е вицепремиерот бизнисмен, чии бизниси цветаат откако е на власт. „Да потсетиме дека општините под раководство на СДСМ, Кочо Анѓушев и неговите фирми ги снабдуваат со камионите за чистење, познати како метларки, кои ги произведуваат токму неговите фирми. Да потсетиме дека неговите фирми ги зедоа тендерите во психијатриската болница во Негорци, во Клиниката за кардиологија, во тетовската Клиничка болница, во Основниот суд во Велес, во Агенцијата за патишта за набавка на мрежа и многу други тендери, кои се сомнителни и матни, а кои подоцна треба да се истражуваат кога оваа Влада ќе ги тргне канџите од судството. Ова се само дел од причините поради кои Кочо Анѓушев треба да си оди, да прекине да ја злоупотребува функцијата и да одговара кога институциите ќе почнат да ги расветлуваат овие случаи. Колку побргу си замине оваа Влада на СДСМ, толку подобро за граѓаните и државата“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
(Видео) „Прифатена Иницијативата за конфискација на дивоградби, ова е голема победа на општината“, вели Герасимовски
Општина Центар извојува победа. Една година по поднесувањето на Иницијативата за регулирање, конфискација и пренамена на бесправно изградени објекти од градоначалникот на Општина Центар Горан Герасимовски до ЗЕЛС, Собранието го донесе Законот за управување со конфискуван имот, имотна корист, одземени предмети во кривична и прекршочна постапка.
Станува збор за Иницијатива со која на сите локални самоуправи во државата им се дава можност за конфискација на бесправно изградените објекти на нивна територија и нивна пренамена во функција на општината.
„Општина Центар е лидер во промени, лидер во храбри и позитивни одлуки и решенија во полза на граѓаните. Прифаќањето на Иницијативата за конфискација и пренамена на бесправно изградени објекти и нејзино преточување во Законско решение е победа на Општина Центар но и сите други општини во државата. Собранието на 19 овој месец, го донесе Законот за управување со конфискуван имот, имот на корист, одземени предмети во кривична и прекршочна постапка, каде во Членот 66 е преточена Иницијативата која ја поднесов до ЗЕЛС со која се дава можност Агенцијата за конфискуван имот врз основа на одлука на Владата дивоградбата да ја предаде на општината. Ова значи дека ние општините имаме две можности или да го легализираме објектот или доколку има услови истиот да го урнеме во рок од 6 месеци од прием. Доколку одлучиме да го легализираме, ќе можеме да го дадеме на социјално ранливи категории на граѓаните или на користење за разни културни, пензионерски, младински домови“, посочи Герасимовски денеска пред медиумите.
Герасимовски појаснува дека новото Законско решение налага локалните самоуправи да не можат да го ОТУЃАТ објектот на градежни фирми или други субјекти кои се работат со недвижности, што всушност значи дека се иззема било каква можност за профит на сметка на нелегално изградените објекти. Новиот Закон за управување со конфискуван имот, имотна корист, одземени предмети во кривична и прекршочна постапка не се однесува за дивоградбите кои се на приватно земјиште, за кои веќе се води инспекциска постапка за рушење или се води постапка за легализација.
На прес-конференцијата Герасимовски потсети дека иако поднесувањето на Иницијативата беше широко прифатена од градоначалниците сепак мораше да ги помине институционалните процедури во Министерството за транспорт и врски, Министерството за правда и Собранието како законодавен дом.
„Во државата има близу 100 илјади дивоградби, еве во Општина Центар има дивоизградени објекти и на државно земјиште и во зелена зона. За онеспособување на два такви поголеми објекти сумите се енормно високи, околу 5,5 милиони денари за две згради да ги оневозможиме да бидат функционални. Но сега со новото законско решение наместо дувло на бездомници како што најчеста е реалноста дивоградбите ќе можат да се пренаменат и за други потреби односно да бидат или пензионерски домови, креативни работилници или клубови за млади или пак предадени за социјално загрозени семејства“, потенцира Герасимовски.
Герасимовски напоменува дека со донесувањето на ова законско решение ќе се превенира урбанистичкиот хаос, а градежниците ќе треба да се запрашаат дали ќе градат без одобрение за градба. Воедно потсетува градоначалникот дека средствата планирани за уривање на нелегални објекти општините ќе може да ги пренаменат во други потреби за граѓаните.
Македонија
ЛДП в петок организира „Pet Friendly“ ден во канцеларијата „Либерално ќоше“
Во новоотворената канцеларија на ЛДП „Либерално ќоше“ во срцето на Скопје в петок од 18:00 часот ќе се одржи „Pet Friendly“ ден за дружење, разговори и идеи на граѓаните со претседателката на Либерално-демократската партија Моника Зајкова.
– Водејќи се од нашата совесност, свесност и одговорност, покренавме иницијатива за носење на нов закон за благосостојба на животните. Милениците, се семејство, не потрошен предмет и затоа секој сопственик кој го остава својот миленик на улица треба да сноси одговорност и да се обезбеди регулиран систем на одговорно одгледување и размножување. Воедно да се обезбедат соодветни услови за бездомните кучиња и мачки и при тоа да ги заштити граѓаните од несакани повреди, е пораката на Зајкова.
Граѓаните се добредојдени на петочното дружење заедно со своите миленици, а своите идеи и предлози може да ги споделат и во писмена форма.
На полето на заштита на животните, ЛДП до Собранието поднесе и предлог за изменување и дополнување на Законот за заштита и благосостојба на животните, којшто ќе воведе построги мерки против оставање животни на улица, поодговорно сопствеништво и ќе ги подобри нивните услови.
Скопје
„Маски, смеа, рингишпил- дојди во Шеговил!“ – голема забава под маски во Кисела Вода
Под слоганот „Маски, смеа, рингишпил- дојди во Шеговил!“ општина Кисела Вода, в понеделник, на први април, организира голема забава под маски за најмладите.
Пред салата Расадник ќе биде поставен забавен парк со најразлични реквизити, ќе има кловнови и аниматори, а за музичкиот дел се задолжени „Поточиња”.
Настанот започнува во 11 часот, а за изборот на најдобра маска ќе одлучи жири комисија од општината. Најдобрите маски ќе добијат награди, велат од општината и ги покануваат сите дечиња да дојдат во Шеговил и со своите насмевки, шеги и маски да поминат еден прекрасен ден.