Македонија
(Видео) Владата и УНФПА потпишаа договор за заеднички придонес за намалување на смртноста кај родилките и новороденчињата
Министерот за здравство, Венко Филипче и директорката на Фондот за население на Обединетите нации (УНФПА) за државата, Доина Болога, денеска во Скопје, потпишаа Договор за заеднички придонес за спроведување на дел од мерките за намалување на смртноста кај мајките и новороденчињата во државата.
„Владата на Република Македонија првпат овозможува да се реализира ваков вид договор во нашата земја, но и пошироко во регионот. На овој начин, се зајакнува и Програмата за заштита на мајки и деца на Министерството за здравство за 2018 година, која се финансира од Буџетот на Република Македонија. Тоа е уште една гаранција дека ќе продолжат активностите за зајакнување на ефективната грижа на мајките и на бебињата за време на бременоста и по породувањето“, посочи во своето обраќање министерот за здравство Венко Филипче.
Во однос на досега преземените мерки, министерот Филипче истакна дека во соработка со експерти од УНФПА веќе се спроведоа две работи, првата е проценка на состојбата во родилиштата во Скопје и низ целата држава. Резултатите се пристигнати и се сумирани и врз основа на тоа ќе изградиме стратегија за имплементирање на следните мерки.
Втората мерка која веќе се спроведе е тренинг на тренери, се идентификуваа околу 30тина доктори гинеколози и неонатолози кои се тренираа да бидат тренери во своите области и со чија помош понатаму ќе ги спроведеме тренинзите низ другите родилишта во нашата земја.
Таму каде што сметаме дека треба да се дополни кадар или опрема, а сето тоа ќе го направиме пред се во клиничките болници (Штип, Битола и Тетово), веќе се почнати мерки и тоа се спроведува. Делумно во пресрет излегуваат агенции кои прават донација, а делумно правиме план за набавка преку Министерството за здравство.
„Подобрувањето на здравјето на мајките и нивните деца влијае врз целото општество. Ако сакаме да ги оствариме националните приоритети на развој, треба да обезбедиме право на здравје за сите“, изјави заменик-регионалниот директор на УНФПА, Иан Мекфарлан.
Договорот предвидува вкупно средства од околу пет милиони денари, од кои половина износ ги обезбедува Владата додека другата половина УНФПА, и е усогласен со Програмата на УНФПА за нашата држава за периодот 2016-2020, како и co едно од приоритетните национални прашања.
Со активностите од овој Договор, освен што ќе се придонесе кон намалување на мајчината и новороденечката смртност, ќе се унапреди и квалитетот на услугите за перинатална грижа (грижа непосредно пред, во текот и непосредно по породувањето на родилката и новороденчето), што директно ќе обезбеди здраво и безбедно мајчинство, почитувајќи ги принципите на човекови права.
Активностите конкретно опфаќаат јакнење на капацитети на мултидисциплинарни тимови на здравствени работници (гинеколози/акушери, неонатолози и акушерки-бабици) за ефективна перинатална грижа, согласно стандардите на Светската здравствена организација (СЗО), развивање и примена на клинички упатства, протоколи и алгоритми за перинатална грижа, базирани на докази, обезбедување присуство на стручна меѓународна експертиза во дадените области, во болниците, како и финализирање и примена на стандардите за гинекологија и акушерство во селектираните болници.
Согласно Договорот, техничката помош на УНФПА се однесува и на менторство при спроведување на практики за перинатална грижа засновани врз докази, адаптација и акредитација на материјали за обука кои ќе се вклучат во континуираната медицинска едукација на гинеколозите, неонатолозите и акушерките како и јакнење на свеста кај жените и нивните семејства за знаците за опасност во текот на бременоста и породувањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ванковска: Преспанскиот и бугарскиот договор се колонизаторски договори
Професорката Билјана Ванковска и претседателски кандидат на Левица во Фејсбук статус истакнува дека има разочарани млади луѓе кои мислат дека кога политичарите говорат за прашањата за Преспа и другите договори, тоа е само губење време и одвлекување на вниманието од реалните проблеми на земјата, сиромаштијата, невработеноста, корупцијата и сл..
„Точно е! Мнозинството граѓани едвај врзуваат крај со крај, очајни се од непостоење здравствен или образовен систем, сакаат развој а не вртење кон минатото.
Она што овие млади (а инаку умни) луѓе уште не го научиле е дека геополитиката (која ни ја наметнаа) е тесно поврзана со геоекономијата. Би очекувала својот критички ум да го свртат кон, на пример, поврзаноста на нашата колонијална положба со Преспа и Митилинеос. Или дури и со Бехтел и Енка… и уште многу ситни и не толку ситни зделки на македонските компрадорски елити кои нѐ продадоа како на сточен пазар, ни ги одзедоа и идентитетот и достоинството, ама и ги наполнија своите џебови врз база на бајките за ЕУ интеграција со смена на името и уставот.
It’s all about geopolitics, stupid!“, пишува Ванковска.
Според неа, Преспа и Бугарскиот договор не се само национални, идентитетски прашања, туку и класни и социоекономски. Ние, додава таа, сме во класично ропство, а принудени да аплаудираме на колонизаторите кои не се тука за наше добро, туку за свои интереси.
Македонија
ВМРО-ДПМНЕ: Идната наша влада ќе изгради нов објект за Клиничкиот центар во Скопје и ќе ја доизгради Клиничката болница во Штип
Идната влада на ВМРО-ДПМНЕ ќе изгради нов објект за Клиничкиот центар во Скопје и ќе ја доизгради Клиничката болница во Штип, велат од ВМРО-ДПМНЕ.
„Главен фокус на идната влада во здравството ќе биде укинување на дуализмот. Ќе се спроведе спојување на клиниките во еден интегриран Универзитетски Клинички центар „Мајка Тереза“. Интегриран Клинички центар во Скопје ќе значи подобри услуги за пациентите и намалување на трошоците при јавните набавки, кои ќе бидат вршени централизирано. Владата предводена од ВМРО-ДПМНЕ ќе го заокружи целиот процес со Клиничкиот центар во Скопје со изградба на нов објект“, дополнуваат од ВМРО-ДПМНЕ.
Како што велат, истовремено владата ќе биде силно фокусирана и на довршување со градбата на Клиничката болница во Штип.
„По изградбата на Клиничката болница истата ќе биде опремена со најсовремена опрема и истата ќе се доекипира со соодветен медицински кадар. Владата на ВМРО-ДПМНЕ ќе го има здравјето на граѓаните на прво место, затоа континуирано ќе вложуваме во здравството. Време е да ја вратиме државата на народот“, завршуваат од ВМРО-ДПМНЕ.
Македонија
Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат Асаф Еисин, велат од ВМРО-ДПМНЕ
Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат, Асаф Еисин, кои е вклучен во кампањата на Стево Пендаровски и СДС, велат од ВМРО-ДПМНЕ.
„Како и секогаш Пендаровски, Ковачевски и СДС кога се фатени во скандал или криминал се служат само со навреди, лаги и манипулации наместо да дадат конкретни одговори на релевантни прашања поврзани со скандалот. Повеќе од десетина дена, откако признаа дека се среќавале со контроверзниот израелски консултат Еисин, нема одговор како тој е ангажиран во нивната кампања, како го исплаќаат и дали тој е ангажиран за црна кампања, кампања на поделби и етикетирања. Јавноста заслужува одговори како овој балкански мешетар СДС и Ковачевски го исплаќаат, бидејќи во ниту еден извештај за финансиско работење неговиот ангажман не е заведен, и дали истиот е плаќан со црни пари, кеш на рака, од криминалните тендери на власта, пари украдени од граѓаните“, дополнуваат од ВМРО-ДПМНЕ.
Како што посочуваат, од СДС треба да одговорат, дали покрај ангажирањето на Еисин, во Македонија се дојдени и две други лица, кои се локална поддршка на консултантот на Еисин, кои се сместени во центарот на Скопје во еден хотел и веќе активно работат на црната кампања на СДС за претстоините избори.
„Ги повикуваме надлежните институции веднаш да се одважат и да се ангажираат за расчистување на овој скандал, да го откријат финансирањето на консултантот и вклучувањето на странски државјани во кампањата за изборите. Време е за промени. Следува одговорност за секој сторен криминал, за секој скандал и за секое крадење на народни пари“, завршуваат од ВМРО-ДПМНЕ.