Македонија
(Видео) Владата: Проектот „Терминал за течен гас во Александропулос“ обезбедува долгорочно снабдување со течен гас
Портпаролите на Владата, Душко Арсовски и Муамет Хоџа на денешната редовна прес-конференција информираа за заклучоците и одлуките донесени на вчерашната 14-та владина седница меѓу кои е одлуката на Владата за отпочнување на процесот за потпишување на договорите врзани за проектот Терминал за течен гас во Александропулос, Грција, за што веќе е склучен Mеморандум за разбирање помеѓу АД „ЕСМ“ и „Гастрејд СА“.
„Со овие договори и преземени обврски, Терминалот ќе обезбеди сигурно и долгорочно снабдување со течен гас за потребите на Северна Македонија и е чекор кон реализирање на стратешките цели за енергетска независност на земјава.
Реализацијата на оваа инвестиција потенцијално ќе значи отворање втора рута за снабдување на Северна Македонија со течен гас од други држави, покрај моменталниот снабдувач. Со тоа се очекува да се зголеми капацитетот за дотур на гас во земјава, би влијаело врз либерализацијата на пазарот, а со тоа и врз конкурентноста на цените“, посочија портпаролите.
Владата вчера ја донесе и програмата за капитални субвенции за развој на плански региони во областа на земјоделството и руралниот развој за 2022 година со која ќе се подобри руралната инфраструктура и пристапот до земјоделските површини.
„Средствата ќе ги користат центрите за развој на планските региони, а избраните проекти е предвидено да се реализираат во рок од 12 месеци од потпишувањето на договорот за финансирање“, беше нагласено на прес-конференцијата.
На неа беше информирано и за разгледаната предлог-структура и акцискиот план за воспоставување на систем за индиректно управување со ИПА средствата.
„Регулативата за имплементација за најновиот инструмент за претпристапна помош од ИПА Програмата 3 за 2022 година ги дефинира следните приоритети: Владеење на правото, фундаментални права и демократија, Добро владеење, усогласување на законодавството, добрососедски односи и стратешка комуникација, Зелена агенда и одржлива поврзаност, Конкурентност и инклузивен раст, како и Територијална и прекугранична соработка.
Дополнително, во рамките на приоритетот „Зелена агенда и одржлива поврзаност“ предвидени се дополнителни тематски приоритети како, Животна средина и климатски промени и Транспорт, дигитална економија, општество и енергија“, објаснија портпароите.
Владата на вчерашната седница, информираа тие, ја усвои и стратегијата за инклузија на Ромите 2022 -2030 година.
„Овој документ е дел од јавните политики на државата за изедначување на степенот на вклученост и интеграција на ромската заедница со сите етнички заедници. Стратегијата и инвестирањето во развојот на ромската заедница има долгорочни придобивки и е во согласност со постигнувањето на одржливите развојни цели на Организацијата на Обединетите нации“, беше речено на прес-конференцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Времето утре – променливо облачно со сончеви периоди
Променливо облачно со сончеви периоди. Попладне во источните делови ќе има повремен локален дожд. Ќе дува слаб до умерен ветер од северозападен, а во западните делови од западен правец. Минималната температура ќе биде во интервал од 0 до 7, а максималната ќе достигне од 13 до 20 степени.
Во Скопје променливо облачно со сончеви периоди. Ќе дува слаб до умерен ветер од северен правец. Минималната температура ќе се спушти до 2, а максималната ќе достигне до 19 степени.
Продолжува периодот на променливо облачно време со повремени локални врнежи од дожд. Во недела и во вторник на повеќе места ќе има врнежи, кои повремено ќе бидат пообилни и поројни проследени со појава на грмежи и засилен ветер. Поради спуштање на постудена воздушна маса во недела на планините врнежите повремено ќе преминуваат во снег и ќе се формира нова снежна покривка.
Македонија
Ибраимоски и Глигорова: „СТОП за исвршителите, брзите кредити и должничкото ропство“ е еден од главните постулати на програмата „Храбро за Македонија“
Носителот на пратеничката листа на коалицијата „Храбро за Македонија“ во изборната единица пет, Самка Ибраимоски, денеска заедно со активистката и кандидатка за пратеничка Ана Глигорова ја посетија Битола каде се потпишуваше петицијата „СТОП за извршителите и брзите кредити“.
Воедно, Ибраимоски и Глигорова нагласија дека оваа борба за правда, за враќање на извршителите кадешто им е местото и ослободување на народот од должничко ропство е еден од главните приоритети на предизборната програма на коалицијата „Храбро за Македонија“.
– Денеска бевме во Битола, на средба со граѓани. Имавме петиција за „СТОП на извршителите“ и стоп за кеш кредити, успешна петиција. Суштината на нашата кампања во изборна единица пет, ќе биде токму оваа агенда: „СТОП за извршители и СТОП за брзи кредити“. – нагласи Глигорова.
– Ме радува што сите граѓани ја прифатија нашата иницијатива и се потпишаа многу луѓе и тоа е добро, што народот почна поинаку да размислува за разлика од претходно. И очекувам дека и во другите градови, како што се Ресен, Охрид, Струга, Демир Хисар и другите околни места, ќе ни ја дадат поддршката за парламентарните избори, истакна претседателот на ПЦЕР и носител на пратеничката листа, Самка Ибраимоски.
Скопје
Арсовска изврши увид во завршните градежни работи на реконструкција на водоводната мрежа на улицата Антон Попов
Градоначалничката на Град Скопје, Данела Арсовска заедно со претставници од Секторот за планирање и уредување при Град Скопје и скопското јавно претпријатие „Водовод и канализација“ извршија увид во завршните градежни работи на реконструкција на водоводната мрежа на улицата Антон Попов во општината Гази Баба.
Со изведбата на водоводните приклучоци на овој потег кои се поврзуваат со постојната водоводна мрежа со профил од 150 милиметри, се решава повеќедеценискиот проблем на жителите со честите прекини во водоснабдувањето поради застареноста на системот, а се решаваат загубите на вода и трошоци за поправките на дефектите на водоводната мрежа, велат од Град Скопје.
Изведбата на овој проект претставува дел од програмата на градоначалничката Данела Арсовска за обновување на градската мрежа, во децениски заборавените населени места, што претставуваше и долгогодишно барање на жителите од тој дел на градот, се додава во соопштението на Град Скопје.