Македонија
(Видео) Драганов: Судскиот совет не презема ништо за целосно решавање на случајот со АКМИС
Извршниот директор на Институтот за човекови права, Мирослав Драганов, на денешната презентација на третиот мониторинг-извештај за реформите во судството кој се однесува на периодот од јануари до март оваа година истакна дека по поминати 5 месеци Судскиот совет и Советот на јавни обвинители немаат преземено никакви чекори за видливи резултати за решавање на случајот со злоупотреба на АКМИС-системот и местените судски предмети.
„Граѓанските организации треба да ги притиснат институциите што побрзо да ја истражат до крај злоупотребата на АКМИС-системот бидејќи целиот случај почна да се одолговлекува. Цели 5 месеци Судскиот совет и Советот на јавни обвинители не преземаат конкретни чекори за решавање на овој проблем“, вели Драганов по што додаде дека како дополнителна причина за побрзо решавање на случајот е тоа што напредувањето на судиите во изминатите 8 години се засновало на токму на овој систем.
Првиот човек на Институтот за човекови права исто така истакна дека на седницата на Судскиот совет која се одржа на 4 март било извршено вонредно оценување на судиите, со што се укажува на фактот дека голем дел од судиите не биле соодветно оценети.
„92 отсто од судиите во 2015 и 2016 година биле оценети со највисока оценка, а за разлика од тоа само 20 отсто од претседателите на судовите биле оценети со највисока оценка. Се поставува прашањето доколку биле добри критериумите овие 8 години зошто сега се потребни измени и дали тоа укажува дека претседателите на судовите биле по неефективни и понепрофесионални од нивните колеги судии“, рече Драганов.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Странски новинари, преведувачи: вкупно 942 набљудувачи ќе ги следат претседателските избори
Вкупно 942 набљудувачи, странски новинари и преведувачи се акредитирани за следење на Претседателските избори на 24 април.
Како што е објавено на веб страницата на ДИК, заклучно до 19 април, акредитирани се 342 домашни и 568 странски набљудувачи и преведувачи, од кои најбројни се од ОБСЕ/ОДИХР.
Парламентраните избори во земјава ќе ги следат над 2000 домашни и странски набљудувачи.
Изборите за шеф на државата ќе ги следат и странски новинари.
Седмите претседателски избори во земјава ќе се одржат на 24 април, а евентуалниот втор круг заедно со парламентарните на 8 мај.
Македонија
Предизборен молк пред утрешните претседателски избори, денеска гласа дијаспората, болните и затворениците
Започна предизборниот молк пред утрешните претседателски избори. Молкот завршува на 24 април во 19 часот, кога се затвораат избирачките места.
Денеска ќе гласаат избирачите запишани во посебниот извод од избирачкиот список, односно дијаспората, затворениците, лицата во старските домови, болните и изнемоштени и внатрешно раселените лица.
Гласањето за претседател започна во саботата, први гласаа членовите на избирачките одбори кои отпатуваа да го спроведат гласањето во дијаспората.
Во посебниот извод од избирачкиот список се запишани 191 избирачи кои треба да го спроведат гласањето во дијаспората.
Во дипломатските претставништва и конзуларни канцеларии треба да гласаат наши граѓани кои живеат во странство а кои се пријавиле за гласање.
Право на глас имаат 1.814.317 гласачи запишани во единствениот избирачки список. Избирачките места се отвораат во 7 часот, а гласањето трае до 19 часот. Се гласа на 3480 избирачки места во целата земја.
Скопје
Петровец, Сарај, Карпош, Кисела Вода и Центар денеска без струја
Регионалниот центар за управување со кризи на Град Скопје, по добиеното известување од ЕВН, информира дека поради технички зафати во електродистрибутивната мрежа, без електрична енергија ќе останат делови од општините Петровец, Сарај, Карпош, Кисела Вода и Центар.
· од 8.30 до 14.30 часот корисниците од селата Кожле и Бадар, како и тунелот кај Катланово на автопатот Велес – Скопје (општина Петровец);
· од 9 до 11 часот корисниците од село Кондово (општина Сарај);
· од 9 до 11 часот корисниците од делови од улиците Вич и Разловечко востание (општина Карпош);
· од 9 до 12 часот корисниците од делови од улиците Иван Козаров и Тоне Томшиќ. (општина Кисела Вода);
· од 9 до 15 часот корисниците од дел од улицата Максим Горки, односно објектите во околината на Домот на градежниците (општина Центар);
· од 11 до 13 часот корисниците од дел од улицата Орце Николов, поточно објектите во околината на куќните броеви 155 и 156 (општина Карпош)