Македонија
(Видео) За тепачката во „Идризово“, Синдикатот ја поздрави американската амбасадорка: Затворските полицајци не се виновни
Затворските полицајци не се виновни, туку спречувале крвопролевање меѓу две групации во затворот „Идризово“, кои се степале на 31 декември, вели Гоце Делчев-Тодев, претседател на Независниот синдикат на полицијата. Некои од медиумите неколку дена известуваат за тепачката во затворот во Идризово, во која затворските полицајци употребиле прекумерна сила, па некои од затворениците завршиле со повреди. Претседателот Делчев-Тодев за тепачката во затворот јавно ѝ се обрати на американската амбасадорка, Анџела Агелер.
„Од говорницата на независните синдикати на полицијата ќе ја поздравам новата амбасадорка, која е дојдена во Македонија и која навистина можеби сака да ги решава прашањата во оваа држава. Мојот поздрав се однесува во делот на насоките што ќе ѝ ги даде Гоце на оваа амбасадорка да се подзамисли што се случува на оваа територија, на ова парче земја. Ако ви кажам две групации се степале во затворот во Идризово, при што полицајците сакале да ги одвојат двете групи, односно да дадат, во согласност со дадените насоки што ги имаат по писмен пат во затворите, помош за да не се случи крвопролевање. Затворените на некој начин, затоа што не сакале да бидат спасени, одвоени, ги нападнале полицајците. Резилот е отиден до таму, па сега полицајците и полициските службеници се виновни затоа што ги бранеле затворениците да не се направи голема штета врз нивното здравје“, рече Делчев-Тодев.
Детали за тепачката не сакаше да изнесува оти сè уште се анализираат снимките од надзорните камери, но извесно е дека тројца затворски полицајци биле директно вклучени во раздвојување на групите што се тепале иако на смена биле повеќемина. Тој ги повика надлежните институции официјално да известат за инцидентот и најави дека нема да дозволи полицајците да излезат виновни.
„Повеќето од луѓето што се инволвирани се членови на Независниот синдикат. Веќе се алармирани адвокатските тимови, работиме на сериозно расчистување на прашањето и на проблемот настанат во затворот во Идризово пред Нова година и јас ќе ги замолам и министерот за правда, и директорот за извршување санкции и директорот на самиот затвор во даден момент кога ќе имаат релевантни факти, кога ќе имаат целосно извештаи, да излезат пред јавноста за да не се шпекулира. Да не ги инволвираме вработените полицајци во затворскиот систем и да не ги изложуваме на непријатна ситуација дека тие се виновни за тепањето меѓу одредени групации во самиот затвор“, повика Делчев-Тодев.
Од Казнено-поправниот дом „Идризово“ до објавата на текстот не одговорија на прашањата од „А1он“ и „Макфакс“ за инцидентот на 31 декември. Нема пријава за настанот ниту во МВР.
„По направените проверки во организациските единици при Секторот за внатрешни работи Скопје, ве известуваме дека нема евидентирано пријава за ваков настан“, велат од МВР за „А1он“ и „Макфакс“.
Ова не е прва тепачка во македонските затвори за која јавноста дознава преку објави во дел од медиумите. За тепачката на 31 декември веќе неколку дена се споделуваат и фотографии од претепано лице, со видливи модринки по телото, со објаснување дека повредите му ги направиле затворските полицајци од „Идризово“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари: Земјотресот почна, се надевам дека на 8 мај ќе дојде промената ДУИ да биде опозиција
Масовниот одѕив на гласачите на овие претседателски избори за Арбен Таравари, претседателски кандидат на коалицијата ВЛЕН, е показател дека промените се почнати. На првата прес-конференција по затворањето на избирачките места тој рече дека очекува победа на 8 мај.
„Земјотресот по се изгледа дека денеска почна со масовното учество на граѓаните во изборите, а се надевам дека на 8 мај ВЛЕН ќе победи и ќе дојде долго очекуваната промена ДУИ да биде во опозиција“, рече Таравари.
Тој јавно се заблагодари на граѓаните за масовниот одѕив и изрази надеж дека набљудувачите нема да дозволат злоупотреби на гласовите.
„Сега веќе се знае дека на овие избори имаше многу помасовно излегување на гласање отколку претходните избори што зборува дека промените ни се приближуваат и ни доаѓаат. Ние како ВЛЕН сме пресреќни дека добивме гласови генерално од Албанците. Сега веќе промените се внатре во кутиите кои веќе се отвораат. Се надевам дека нашите набљудувачи ќе ги контролираат и нема да дозволат да има злоупотреби и ќе се гарантира секој глас кој што е даден на демократски начин дека ќе излезе на површина“, рече Таравари.
Македонија
Кузеска: Констатирани се мали прекршувања на изборниот процес, ги очекуваме резултатите и уверени сме дека граѓаните ќе ја поддржат европската иднина
Богданка Кузеска од Изборниот штаб на СДСМ, по затворањето на избирачките места изјави дека изборниот ден бил демократски, а гласањето се одвивало во фер и демократска атмосфера.
„Граѓаните својата волја ја изразија слободно и достоинствено како што доликува на една демократска земја – членка на НАТО со започнати преговори со ЕУ. Констатирани се само неколку многу мали прекршувања на изборниот процес. Сакаме да изразиме благодарност до сите граѓани кои денеска гласаа. Самото гласање е суштински чин кој произлегува од моќта на граѓаните да одлучуваат за својата иднина и иднината на државата. Ги очекуваме изборните резултати и уверени сме дека граѓаните и денеска и на 8 мај ќе ја поддржат европската иднина за Македонија. Иднина во која Македонија е дел од европското семејство и членка на ЕУ“, порача Кузеска.
Повтори дека ги очекуваат изборните резултати и наскоро ќе излезат со точни податоци.
Македонија
Евидентирани 12 случаи на фотографирање гласачко ливче, шест пријави за нудење поткуп и 15 пријави за агитирање, соопшти Тошковски
Според министерот за внатрешни работи Панче Тошковски денешниот изборен ден поминал во безбедна, мирна и демократска атмосфера.
Како што рече, безбедните избори биле резултат на добрата соработка меѓу полицијата, Државната изборна комисија и сите други чинители кои биле вклучени во спроведувањето на изборниот процес
„Овие избори беа уште еден тест за демократијата и во таа насока сакам да им честитам на граѓаните кои излегоа на гласање и ја исполнија својата граѓанска должност и со тоа уште еднаш го истакнаа демократскиот капацитет на државата и значењето на нивната активна улога во градењето на инклузивно општество“, кажа Тошковски.
Истакна дека биле евидентирани повеќе настани кои се однесуваат на прекршување на изборниот процес.
„На ниво на целата држава евидентирани се 12 случаи на фотографирање на гласачкото ливче, два случаи на кинење на гласачко ливче, шест пријави за нудење на поткуп и 15 пријави за агитирање. На подрачје на СВР Скопје во врска со пријавата за испукана димна бомба од страна на тимот за антитероризам извршена е проверка , подигната е направата и предадена е на претседателот на избирачкиот одбор. Констатирани се шест прекршоци, а ќе бидат поднесени и две кривични пријави, една за повреда на тајност на гласањето и една за повреда на избирачко право“, потенцира Тошковски.
Во Охрид било пријавено јавно гласање пред комисијата а во Тетово биле пријавени упатени навреди кон шеф на штаб на политичка партија.
Во Куманово како што додаде, две гласачки места во село Умин Дол биле затворени а избирачкиот материјал бил вратен во канцелариите на ОИК.
Во Струмица едно лице го покажало гласачкото ливче на набљудувач.