Македонија
(Видео) Интервјуирани од хигиеничар до директор, „Систина“ со втор златен печат за безбедност
По низа проверки на работењето и интервјуа со вработените во болницата, тргнувајќи од хигиеничарите, па сè до директорите, пациентите, медицинскиот и немедицинскиот персонал, тројца ревизори од заедничката интернационална комисија одлучиле клиничката болница „Аџибадем Систина“ да добие втор златен печат за безбедност и сигурност. „Систина“ е прва болница во земјата која во 2016 доби акредитација Joint Commision International (JCI), а годинава доби и реакредитација, што за пациентите значи дека добиваат безбедна услуга тргнувајќи од приемот, дијагностицирањето, третманот, па сè до понатамошната рехабилитација. JCI-стандардите, пак, за вработените значат поголема безбедност во работата и помалку медицински грешки.
„Клиничката болница ‘Аџибадем Систина’ успешно помина низ процес на реакредитација од страна на Joint Commission International и повторно го доби златниот печат, кој гарантира безбедност и сигурност. Во периодот од 14 до 18 октомври Комисијата беше во ревизија на нашата болница. Бидејќи нашата болница е првично акредитирана во 2016 година во април, ова е процес на реакредитација што се одвива на секои три години. Во периодот од 14 до 18 октомври беше спроведена ревизија од страна на Комисијата, која успешно заврши и со која докажавме дека сме болница што работи според строгите стандарди и принципи на Join Commission International, со што се гарантираат безбедноста на нашите пациенти и сигурноста во спроведување медицина и постапки базирани на медицински докази“, вели медицинскиот директор на болницата Љупчо Лековски.
Од болницата велат дека петдневната контрола ги опфатила буквално сите сегменти од работењето. Милена Буџаровска, менаџерка за квалитет во болницата, објасни дека биле опфатени повеќе од 1.000 мерливи елементи во работењето.
„Во процесот на реакредитацијата тројцата ревизори од Joint Commission International, еден доктор, сестра и тим-лидерот, кој по професија е административец, успеаја во болницата во секој елемент да навлезат и да ги проверат строгите критериуми, да направат нивна евалуација на ефективност, вклучувајќи ги комуникациите со персоналот, со вработените, со хигиеничарите, со пациентите, со физичката средина и уште еднаш потврдија дека повеќе од 1.000 мерливи елементи од шестата едиција се имплементирани кај нас. Нашата болница ги исполни сите критериуми и се закити уште еднаш со златниот печат“, рече Буџаровска.
Таа нагласи дека за да може да добијат вистинка слика за работењето, во болницата има можност не само пациентите туку и вработените да остават анонимни забелешки доколку забележат каков било проблем. Забелешките понатаму сериозно се анализираат за подобрување на системот.
Joint Commission International е непрофитна невладина организација со седиште во Чикаго, Илиноис, САД, со строги стандарди за грижата и лекувањето на пациентот. Оваа организација досега има акредитирано приватни и државни здравствени установи во повеќе од 100 држави во светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари од централниот митинг во Струга: Зголемување на минималната плата до 800 евра за борба против имиграцијата
Кандидатот за претседател од редовите на ВЛЕН, Арбен Таравари, ја изрази својата заложба за борба против имиграцијата преку зголемување на минималната плата во нашата земја. Во рамките на идната влада се планира зголемување на платите и до 800 евра, со што ќе се создадат нови можности младите мажи и жени да останат и да придонесат за развојот на државата.
Преку грантови за технологија и иновации, Таравари рече дека владата има за цел да ги поддржи нивните креативни идеи, фокусирајќи се на развојот на земјата како атрактивна алтернатива за младите.
„Иселувањето кај нас е над секоја норма, бројките се алармантни. Не можеме да останеме рамнодушни на оваа ситуација. Така како следна влада на ВЛЕН ќе донесеме одлука за покачување на платите. Ќе се заложиме минималната плата до крајот на нашиот прв владејачки мандат да биде 800 евра. Преку грантови за технологија и иновации, ќе ги поддржиме младите мажи и жени со нивните креативни идеи, кои првенствено служат за нашиот развој како држава. Ова ќе биде дополнителна причина да ја гледаат иднината овде со нас, недалеку од нивните домови, недалеку од нивниот роден град“, рече Арбен Таравари на централниот митинг во Струга.
Македонија
(Видео) Силјановска -Давкова: На 9 мај ќе го славиме Денот на победата над фашизмот и Денот на Европа, но ќе славиме и за Македонија
„На 9-ти мај ќе го прославуваме Денот на победата над фашизмот и Денот на Европа! На 9-ти мај, ќе ја славиме Македонија како твоја и Македонија како горда! Ви ветуваме дека ќе докажеме дека нема да ве срамиме, дека нема да ги заборавиме државните и нациолнални интереси, кои тие не само што ги заборавија, туку и ги погазија! Молам за доверба!“, рече Горданa Силјановска -Давкова, кандидат за претседател на Македонија.
„Верувајте ми, има моменти во историјата! А таков е овој, кога мора да сме заедно! Кога како никогаш досега, потребна ни е вашата поддршка! Без вас не може да направиме единство! Без вас Македонија не може да биде ниту твоја, ниту горда! Без вас не може да дојдеме до победа! Вие го имате првиот и последниот збор! Ви веруваме!
Денес е Денот на светското културно наследство. Охрид е незаменлив и ценет, драгоцен дел од него. Охрид е споменик и дом на европското христијанство! Да го чуваме! Не заборавајте: Без Охрид, Македонија нема да биде почитувана!
Час поскоро, активирајте го универизтетот на Плаошник! Оваа власт не знае што е култура, за неа културата е бизнис. Ако започна изградбата во времето на ВМРО-ДПМНЕ, мора да доврши.
Во насока на јакнење на културниот туризам ќе покренам организирање на меѓународен форум – Плаошник форум, на кој ќе се дискутира соработката на цивилизациите, религиите и културите. Сето ова во соработка со УНЕСКО и Министерството за култура! Упатувам порака дека: Плаошник може да биде центар на дијалог на цивилизациите! Дијалог на религиите! Центар на културен дијалог! Затоа сум горда на него!“, додаде Горданa Силјановска -Давкова.
Македонија
Мицкоски: Повикувам на обезбедување на македонско национално единство, обзнанувам мораториум и запирање на сите напади кон партиите Левица и ЗНАМ
Нашето име е ВМРО-ДПМНЕ, ВМРО – демократска партија за македонско национално единство. Тоа е многу силно име, кое не само заради историското ВМРО и континуитетот на кој се повикуваме како идеја и организација која ја славиме и која е нераскинлив дел од македонското национално движење и можеби најзначајна за македонскиот национален идентитет, туку истовремено и поради обврската и одговорноста која и вториот дел од името ја носи со себе, рече претседателот на ВМРО-ДПМНЕ, Христијан Мицкоски од големиот народен митинг во Охрид, од каде што традиционално ВМРО-ДПМНЕ ја почнува кампањата за парламентарните избори.
Мицкоски посочи дека долго време таа обврска и одговорност како да се одбегнуваше, а понекогаш и се занемаруваше и никогаш како сега не било важно како сега да се случи обединување, да се обезбеди национално единство.
„Мојата прва иницијатива за обезбедување на македонско национално единство ќе ја започнам со тоа што сакам да обзнанам мораториум во нападите кон партиите Левица и ЗНАМ. Ова го чувствувам како потреба на македонскиот народ но, и како моја обврска да се обидам да ја реализирам идејата за национално единство во моменти кога таа и е најпотребна на Македонија“, рече Мицкоски.
Додаде дека со Левица и ЗНАМ, ВМРО-ДПМНЕ има свои разлики по повеќе прашања и од идеолошка но и од принципиелна природа, но смета дека во моментов, најважно за Македонија е да се фокусираат на оние кои што ја киднапираа државата од граѓаните.
„Но, ценам дека во моментов најклучно за иднината на земјата е да се фокусираме на оние кои ја киднапираа Македонија од рацете на граѓаните. Разидувањата сигурно ќе продолжат, но мора да наоѓаме заеднички јазик без разлика на лични и партиски суети и интереси. Од нив не очекувам да го направат истото. Дури можеби и ќе ме нападнат за овој гест, можеби некои оправдано ќе кажат дека задоцнет, но и покрај тоа, како и да се однесуваат споменатите партии, ние како партија ќе опстоиме на нашиот збор“, порача Мицкоски.