Македонија
(Видео) Протест против преговорите за името: Не може Коѕијас да ни се прави пријател, а да бара делегитимирање на Македонија
Семакедонскиот национален совет „Македониум“, Христијанското братство и здружението „Тврдокорни“ здружени во една организација, „Народен фронт за спас на Македонија“ денеска преку протестен марш од портата „Македонија“ до Министерството за надворешни работи го изразија незадоволството од преговорите на македонската влада со Грција за промена на името.
„Протестираме директно против негаторите на македонскиот народ и идентитетот на Македонија. Не може Коѕијас денеска да дојде овде и да ни глуми пријател, а да бара да се делегитимираме самите себе пред светската јавност“, вели Страшо Олумчев, претседател на Семакедонскиот национален совет.
Според него, грчкиот народ е окупатор на македонска територија поради вршењето геноцид врз македонскиот народ. Тој порача дека никогаш нема да се откажат од македонските браќа и сестри кои денеска сè уште живеат во, како што кажа, Беломорска Македонија.
Во врска со прашањето за името, „Народниот фронт за спас на Македонија“ бара прекин на преговорите со Грција веднаш и поднесување барање до генералното собрание на Обединетите нации учество на Македонија под нејзиното уставно име.
„Ова што се случува тука е рушење и делегитимирање на самата држава и народ од нелегитимна власт составена од апатриди и терористи кои се амнестирани од политичарите, но не и од македонскиот народ. УЧК ја нападна државата, УЧК убиваше во Македонија, апсолутно сè е надвор од нормалното“, рече Олумчев, кој јавно го повика претседателот Иванов да му го одземе мандатот на премиерот Заев поради прекршување на гаранциите под кои го доби мандатот.
Народниот фронт за спас на Македонија протестот го заврши пред МНР од каде побараа, но не добија средба со министерот Димитров.
„На Димитров му е важно да биде министер, без разлика кој е на власт. Факт е дека со нивната политичка реторика, убиствена за Македонија, заговараат договор со Грција околу идентитетот на државата. Каде и да сме Македонци сме, крај за преговорите на името“, вели Олумчев.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Маричиќ: Оваа Влада ги покачи пензиите за 50 проценти и ветуваме дека во наредниот мандат просечната пензија ќе биде од 500 евра
Меѓународниот секретар на СДСМ и кандидат за пратеник, Бојан Маричиќ, оствари средба со граѓаните пензионери од Изборната единици 1, каде што тој е дел од листата на Социјалдемократскиот сојуз и Коалицијата за европска иднина.
Маричиќ јавно се обврза дека како член на наредната Влада што ќе ја предводи СДСМ ќе продолжи да работи за пензионерите да имаат убав и достоинствен живот.
„Оваа Влада ги покачи пензиите за 50% и ветуваме дека во наредниот мандат ќе биде просечна пензија од 500 евра. Исто така се обврзуваме на зимски регрес од 3000 до 6000 денари за секој пензионер, а најмногу ќе добиваат оние со најниски пензии. Исто така ветуваме енергетски пакет од 1500 денари месечно во текот на грејната сезона за оние пензионери на кои најмногу им треба“, вети Маричиќ.
Тој нагласи дека пензионерите тоа го заслужуваат.
„Без вашата генерација и без влогот кој што го дадовте немаше да имаме држава. Токму затоа сме дожни и обрзани да работиме пензионерите да имаат мирни и спокојни пензионерски денови и мирно да ги гледаат своите деца и внуци како растат. А како растат внуците така нека растат и пензиите“, нагласи Маричиќ на средбата со тетка Верица и пензионерите од Карпош.
Меѓународниот секретар на СДСМ и кандидат за пратеник, Бојан Маричиќ, порача дека тој, СДСМ и Коалицијата за европска иднина „не се откажуваат од подобриот животен стандард за спокоен живот за пензионерите“.
Македонија
Променливо облачно и посвежо време со повремени врнежи од дожд, максимални температури до 18 степени
Променливо облачно и посвежо со повремени врнежи од дожд, претежно во јужните делови. Ќе дува слаб до умерен ветер од северен правец. Минималната температура ќе биде во интервал од 0 до 6, а максималната ќе достигне од 10 до 18 степени.
Во Скопје променливо облачно и посвежо со слаб до умерен ветер од северен правец. Минималната температура ќе се спушти до 4, а максималната ќе достигне 17 степени.
За време на викендот ќе се задржи променливо облачно и посвежо време. Во недела на повеќе места ќе има врнежи од дожд кои повремено ќе бидат пообилни и услови за појава на изолирана нестабилност со грмежи. Поради спуштање на постудена воздушна маса на планините врнежите повремено ќе преминуваат во снег и на повисоките планини ќе се формира нова снежна покривка.
Македонија
Таравари од централниот митинг во Струга: Зголемување на минималната плата до 800 евра за борба против имиграцијата
Кандидатот за претседател од редовите на ВЛЕН, Арбен Таравари, ја изрази својата заложба за борба против имиграцијата преку зголемување на минималната плата во нашата земја. Во рамките на идната влада се планира зголемување на платите и до 800 евра, со што ќе се создадат нови можности младите мажи и жени да останат и да придонесат за развојот на државата.
Преку грантови за технологија и иновации, Таравари рече дека владата има за цел да ги поддржи нивните креативни идеи, фокусирајќи се на развојот на земјата како атрактивна алтернатива за младите.
„Иселувањето кај нас е над секоја норма, бројките се алармантни. Не можеме да останеме рамнодушни на оваа ситуација. Така како следна влада на ВЛЕН ќе донесеме одлука за покачување на платите. Ќе се заложиме минималната плата до крајот на нашиот прв владејачки мандат да биде 800 евра. Преку грантови за технологија и иновации, ќе ги поддржиме младите мажи и жени со нивните креативни идеи, кои првенствено служат за нашиот развој како држава. Ова ќе биде дополнителна причина да ја гледаат иднината овде со нас, недалеку од нивните домови, недалеку од нивниот роден град“, рече Арбен Таравари на централниот митинг во Струга.