Македонија
(Видео) Стоилковски: Реконструкцијата на Владата е само козметичка измена со која нема да има промени
Метлата се претвори во магла. Метлата стана пердув за купување на време за Зоран Заев. Огромно разочарување по кое се отвора директна можност сите пари да се слеваат кај Вицето и Зоран Заев. Во Македонија ќе продолжи да се краде, ќе продолжи криминалот на власта, ќе продолжат тендерите во 4 очи, обвини портпаролот на СДСМ, Наум Стоилковски.
„Она кое што ВМРО-ДПМНЕ го говореше, тоа се оствари. Реконструкцијата на владата е само козметичка измена со која нема да има промена на работата на оваа неспособна власт предводена од Заев.
Со ова само се купува време до неминовниот пораз кој што го очекува Зоран Заев на претстојните избори. Јавноста сега има уште една причина за загриженост бидејќи аболициран криминалец за финансиски криминал, Зоран Заев, ќе биде министер за финансии, а со тоа кланот Заеви се чекор поблиску до парите во буџетот. Но барем една работа ќе биде јасна, а тоа е дека Заев и СДСМ за своите погубни економски политики веќе нема да можат да се вадат на министерот Тевдовски, туку лично Заев ќе биде одговорен за економската катастрофа која што во континуитет ни се случува и за која што уште поцрни денови ни се во најава за граѓаните на Република Македонија.
Дека нема суштинска промена во Владата говори и фактот што во ресорите кај што имаше клучни неуспеси и проблеми, нема да има никакви промени. Во владата остануваат истите министри за здравство, образование, економија, транспорт и врски и вицепремиер за економски прашања, што е гаранција дека хаосот во Македонија за жал ќе продолжи. Останува Димитров, останува Спасовски, девастација на дипломатијата и колапс на безбедноста во државата.
Именувањето на Горан Милевски за министер за локална самоуправа не е ништо друго, освен политички пазар, како што впрочем е и целата влада од која што граѓаните нема да видат никаков бенефит, затоа што овој лик јавноста го знае само како лидер на еден коалициски приврзок и аминџија на Зоран Заев.
Изборот за министер за култура доктор Хусни Исмаили не би го коментирале, од проста причина што на оваа позиција се именува професор од медицински факултет и тоа е доволно да се долови потенцијалот на оваа влада.
Нов министер за земјоделие Трајан Димковски, е човек кој досега работеше како шеф на кабинет на доскорешниот министер Николовски, кој што ќе остане запомнат како еден од најнеуспешните министри за земјоделство. Факт е дека ако Димковски досега не знаел да води соодветна земјоделска политика, сега нема ништо да се промени. Впрочем Димковски станува министер за земјоделство само затоа што Николовски отиде како Генерален секретар на СДСМ.
Почитувани
Ова е старо-нова влада со засилен корупциски и криминоген капацитет, на која врвен приоритет ќе и биде продолжување на личното богатење, корупцијата и криминалот, наместо потребите и барањата на граѓаните.
Ако досега некој имаше резерва, сега веќе таа не постои. Граѓаните се уверија дека со оваа власт на чело со Заев, кој сега ќе има директен пристап до буџетот, економијата и натаму ќе тоне, стандардот на граѓаните ќе паѓа, а Македонија ќе осиромашува. Со ваква Влада за жал од Европа и европски вредности ќе бидеме уште подалеку, а принципот „Евро за Вицето – евро за црквата“ ќе биде закана по целиот државен буџет на Република Македонија“ истакна Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.