Македонија
Влада: Се преземаат сите превентивни мерки за редуцирање на азискиот тигрест комарец во Македонија
Директорот на Агенцијата за храна и ветеринарство, Зоран Атанасов, и Жарко Караџовски, епидемиолог во Институтот за јавно здравје, денеска, на прес-конференција во Владата на Република Македонија, информираа за превентивните активности што се преземаат за да се спречи натамошното размножување на азискиот тигрест комарец кој е присутен на територијата на неколку града во Македонија, како и во Скопје.
Караџовски потенцира дека досега во Република Македонија нема регистрирано ниту еден случај на инфекција или заболување од азискиот тигрест комарец.
„Будно ја следиме состојбата во регионот и во околните држави, каде што гледаме дека има поголем број лица инфицирани, заболени, дури има и смртни исходи. Она што ние како Институт за јавно здравје и Комисијата за заразни болести во иднина ќе го следиме е следното: Секоја локална самоуправа во својот акциски план, што го имаме изготвено минатата година, има задача дел од средствата што се во нивните буџети, да ги употреби на локално ниво и да превенира појава на овие заболувања преку спроведување дезинфекција, дезинсекција и дератизација“, рече Караџовски.
Едукативните брошури со сите неопходни информации за азискиот тигрест комарец, како што посочи Караџовски, одамна им се достапни на граѓаните, но и на сите здравствени работници во Република Македонија.
Тој препорачува граѓаните да не оставаат отворени буриња, канти, пловни објекти (чамци, кануа) и стари гуми во дворовите во кои може да се собира дождовница, редовно да ги чистат олуците на своите куќи за да се овозможи истекување на водата, да ја одржуваат хигиената на домашните украсни и базените за капење и на фонтаните, како и да не создаваат бари, односно застоени води во своите дворови.
Дополнително, граѓаните може да се заштитат со користење средства против комарци, а при престој во природа да носат светла облека за лесно да забележат комарец на себе.
Директорот на Агенцијата за храна и ветеринарство, Зоран Атанасов, истакна дека Агенцијата врши мапирање на целата територија на Република Македонија со цел да се утврди на кои и на колку локации е присутен овој вид комарец.
„Мамките се поставени на територијата на источна Македонија. Сега продолжуваме да ги поставуваме мамките и во другите делови од Македонија за да добиеме целосна слика. Мапирањето е направено во периодот од март до септември оваа година. Од резултатите од терен Агенцијата утврди дека нема опасност од ширење одредени вируси и кај животните “, рече Атанасов.
Дополнително, Владата ќе формира мониторинг-тело, кое секојдневно ќе ја следи состојбата со азискиот тигрест комарец во земјата.
Инаку, азискиот тигрест комарец е присутен и во соседните и во земјите од регионот, односно во Грција, Албанија, Србија, Босна и Херцеговина и во Хрватска. Овој вид комарец го има и во други европски земји – Германија, Италија, Романија, Унгарија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.
Македонија
Притвор од 48 часа за две лица кои се задржани по убиството на лекарот во Железара
Со оглед на тоа што се уште се преземаат дејствија за обезбедување докази, јавен обвинител од Основното јавно обвинителство Скопје синоќа до судијата на претходна постапка од Основниот кривичен суд Скопје достави предлог за определување мерка краткотраен куќен притвор во траење од 48 часа за две од лицата кои беа задржани во врска со убиството на лекар во скопската населба Железара, извести Обвинителството.
Како што велат од Обвинителството, предлогот е прифатен и бараната мерка е определена.
Македонија
„Мицковски е ист како Груевски, злоупотребени децата во Гевгелија“, вели СДСМ
„Христијан Мицкоски е ист како неговиот претходник и ментор Никола Груевски. За врме на посетата на Мицкоски на Гевгелија беа злоупотребени млади лица и ученици, исто како што правеше Груевски, кога се редеа деца за да го поздравуваат“, соопшти СДСМ.
„На ист начин вчера, под палка на локалната власт на ДПМНЕ во Гевгелија беа поставени ученици да му аплаудираат, овој пат на Мицкоски.
Мицкоски е ист како Груевски. Во ДПМНЕ нема никакви промени. Тоа се истите методи на ДПМНЕ и истите ликови.
Мицкоски сака да продолжи каде застана Груевски.
Граѓаните не забораваат како изгледаше кога менторот на Мицкоски, Груевски нѐ заглави и не донесе до дното“, се наведува во соопштението на СДСМ.