Македонија
ВМРО-ДПМНЕ со 2.000 амандмани ќе го блокира законот за нов клинички поради сомнежи за корупција
Денес, во Собранието се подготвува една од најголемите пљачки во поновата историја на Република Македонија. Станува збор за предлог-закон за реализација на неколкупати помпезно најавуваниот проект за изградба на нов клинички центар во Скопје, обвини пратеникот од ВМРО-ДПМНЕ, Кирил Пецаков.
Според него, законот има премногу аномалии, недостатоци, недоречености и основани сомненија за огромен криминал со пари на граѓаните.
„Имено, во овој предлог-закон Владата предводена од Заев нема наведено апсолутно никакви конкретни податоци, рокови, информации, планови, стратегија, финансиска конструкција и физибилити-студија како би се одвивала реализацијата на проектот за изградба на новиот клинички центар. За толку сложен и милионски проект, власта до Собранието и пратениците испраќа предлог-закон од само неколку члена, површно и штуро објаснување. Ништо повеќе. И, замислете, сето ова власта сака да го помине во Собранието по скратена постапка. Повторувам, по скратена постапка. Ова отвора сомнежи и наведува на голем криминал што власта сака набрзина да го протне и спроведе“, рече Пецаков.
Тој рече дека ВМРО-ДПМНЕ нема да го поддржи законот бидејќи сметаат дека тој е извор на корупција.
„Нема да седиме со скрстени раце и ќе поднесеме приближно 2.000 амандмани со цел да го спречиме носењето на овој закон и овој криминал во најава. Да појасниме, ВМРО-ДПМНЕ не е против изградбата на нов клинички центар во Скопје, но нема да дозволиме 500 милиони евра, пари на граѓаните, да се трошат на криминален начин од најкриминалната влада во Европа, и тоа во моменти кога македонската економија е на колена, а граѓаните едвај врзуваат крај со крај“, рече Пецаков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево и топло време со температура до 27 степени
Времето денес ќе биде сончево и топло со мала локална облачност. Ќе дува слаб ветер од јужен правец.
Минималната температура ќе биде во интервал од 2 до 9, а максималната ќе достигне од 20 до 27 степени.
Во Скопје сончево и топло со слаб ветер од јужен правец.
Минималната температура ќе се спушти до 5, а максималната ќе достигне до 25 степена, јавува УХМР.
Во наредните денови следува период на сончево и топло време со пораст на температурата кон викендот. Утринските температури ќе бидат постојано над нулата, а поголемо наоблачување со услови за појава на дожд се очекува на почетокот на следната недела и ќе биде проследено со умерено спуштање на температурата.
Македонија
Нема подолги задржувања за влез и излез од државата
Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Скопје
Без струја дел од Карпош
Регионалниот центар за управување со кризи на Град Скопје, по добиеното известување од ЕВН, информира дека, поради технички зафати во електродистрибутивната мрежа, без електрична енергија ќе остане дел од Карпош.
Од 9 до 14.30 часот корисниците од улицата Мексичка, улицата Хаванска и дел од улицата Варшавска во општина Карпош ќе бидат без струја.