Македонија
В среда почнува вакцинацијата со „Астра зенека“ во Македонија, втората доза за три месеци
Министерот за здравство, Венко Филипче, соопшти дека в среда ќе почне вакцинирањето со „Астра зенека“ на 20.000 пријавени граѓани, кои се над 75-годишна возраст. Тие ќе бидат контактирани преку матичните лекари и ќе се утврди на кој пункт ќе бидат вакцинирани.
За масовната вакцинација се подготвува aрената „Борис Трајковски“ во Скопје. Ќе има 30 позиции за вакцинирање, а ќе бидат ангажирани лекари и медицински сестри од Здравствениот дом – Скопје.
Во меѓувреме, според најавите, се очекува пристигнувањето на дополнителните вакцини од Кина и компанијата „Фајзер“, а оваа недела треба да се потпишат и договорите со земја членка на ЕУ.
„Во април очекуваме вакцини од повеќе места за по оваа прва група граѓани над 75 години, да бидат повикани на вакцинација и други граѓани“, рече Филипче.
Министерот уверува дека ќе се обезбедат доволно количини од „Астра зенека“ за втората доза по три месеци од примањето на првата.
Тој рече дека земјата ќе снабди вакцина за втората дози и за македонските граѓани што се вакцинирале во Србија.
„За ‘Астра зенека’ ја преземаме препораката дека втората доза треба да биде за три месеци, а веќе имаме најава дека преостанатите количини до 100.000 треба да стигнат во април. Чекаме и податоци за наши државјани што се вакцинирале за да се планира втората доза да ја примат тука“, рече Филипче.
Министерот засега нема да се вакцинира со оваа вакцина, туку ќе почека да стигнат поголеми количини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Дел од неколку скопски населби без струја
Поради планирани прекини во електродистрибутивната мрежа без електрична енергија ќе останат следните корисници:
· Во период од 09,00ч до 16,00ч дел од корисниците во с. Волково и с. Кучково ( о. Ѓ. Петров);
· Од 09,00ч до 14,00ч корисниците од ул. Банско, ул. Баница, ул. Наум Охридски и ул. Жванска (о. К. Вода);
· Од 07,00ч до 15,00ч новите згради спроти Мерцедес ул. 852 (о. Г. Баба) и
· Во период од 09,00ч до 15,00ч дел од ул. Милан Мијалковиќ, ул.Пржино, ул.Кавалска (о. К. Вода).
Македонија
Променливо облачно и посвежо време со повремени врнежи од дожд
Променливо облачно и посвежо со повремени врнежи од дожд, особено во северозападните делови каде ќе има услови за ретки грмежи. На планините врнежите повремено ќе преминуваат во снег. Ќе дува слаб до умерен северозападен, а во западните делови засилен западен ветер. Минималната температура ќе биде во интервал од 3 до 9, а максималната ќе достигне од 13 до 19 степени.
Во Скопје променливо облачно и посвежо со услови за повремен дожд. Ќе дува слаб до умерен северозападен ветер. Минималната температура ќе се спушти до 6, а максималната ќе достигне до 15 степени.
До почетокот на следната седмица времето ќе биде променливо облачно и посвежо, наместа со повремени врнежи од дожд. Во петок пообилни врнежи се очекуваат во јужните делови, а во недела на повеќе места. Поради спуштање на постудена воздушна маса на планините врнежите повремено ќе преминуваат во снег и на повисоките планини ќе се формира нова снежна покривка.
Македонија
Османи: Европскиот фронт е голема идеја чие време е дојдено
Кандидатот на Европскиот фронт, Бујар Османи, вечерва на митинг пред граѓаните на Кичeво изрази благодарност до лидерите на Европскиот фронт и коалицијата која, како што вели Османи, е продолжение на битките во континуитет една по една, за разбивање на замоците на етничките монополи.
„Европскиот фронт не е политичка партија. Европскиот фронт не е ни коалиција на политички партии, Европскиот фронт е голема идеја. Тоа е одлична идеја чие време дојде, лавина што ги собра соништата на секој граѓанин на оваа земја, за еднаквост, за правда и просперитетен живот во ЕУ. И ова го гледам како ентузијазам, како насмевка во секое населено место каде што одам, бидејќи Европскиот фронт е трета унија, но сега со малку поинаква димензија“, истакна Османи.
Кандидатот на Европскиот фронт, Османи понатаму истакна дека останува уште едена последна тврдина на етничкиот монопол.
„Тврдината која нè загрижува сите и секогаш ни го дава тој сигнал дека се уште не е сè како што треба, сè уште нема еднакви можности за сите, таа е тврдината на првиот претседател. Значи, браќа и сестри, се натпреварувам, на 24 април да ја разберете тежината на оваа мисија, дека вашиот глас не е само за мојата кандидатура, вашиот глас, вашата поддршка е за да ја разбиете последната тврдина на етничкиот монопол и за заокружување на еднаквоста на сите заедници во нашата заедничка држава“, заклучи Османи.