Македонија
Груби во Тирана се сретна со претседателката на СДИ, Моника Криемади
Првиот вицепремиер и министер за политички систем и односи меѓу заедниците, Артан Груби денеска во Тирана се сретна со претседателката на Социјалистичкото Движење за Интеграција (СДИ), Моника Криемади.
Тема на разговор беше соработката помеѓу двете земји и пописот на населението во Македонија. Груби побара од Криемади преку структурите на нејзината партија да ја покани дијаспората на Република Северна Македонија што живее надвор од државата да се регистрира во пописот кој веќе е почнат од 1 март.
Криемади рече дека граѓаните на Северна Македонија што живеат и работат во дијаспора треба максимално да ја искористат оваа можност, бидејќи од овој процес зависат многу работи на дејствување во РСМ.
Двајцата се согласија дека сега е време целата дијаспора од Северна Македонија да ја исполни својата должност и обврска и достоинствено да придонесе за доброто на сите граѓани, не само во Северна Македонија, туку и во целиот регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево и топло време со температура до 27 степени
Времето денес ќе биде сончево и топло со мала локална облачност. Ќе дува слаб ветер од јужен правец.
Минималната температура ќе биде во интервал од 2 до 9, а максималната ќе достигне од 20 до 27 степени.
Во Скопје сончево и топло со слаб ветер од јужен правец.
Минималната температура ќе се спушти до 5, а максималната ќе достигне до 25 степена, јавува УХМР.
Во наредните денови следува период на сончево и топло време со пораст на температурата кон викендот. Утринските температури ќе бидат постојано над нулата, а поголемо наоблачување со услови за појава на дожд се очекува на почетокот на следната недела и ќе биде проследено со умерено спуштање на температурата.
Македонија
Нема подолги задржувања за влез и излез од државата
Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Скопје
Без струја дел од Карпош
Регионалниот центар за управување со кризи на Град Скопје, по добиеното известување од ЕВН, информира дека, поради технички зафати во електродистрибутивната мрежа, без електрична енергија ќе остане дел од Карпош.
Од 9 до 14.30 часот корисниците од улицата Мексичка, улицата Хаванска и дел од улицата Варшавска во општина Карпош ќе бидат без струја.