Македонија
Димитров – Петричек: Без оглед на одлуките на Советот, Северна Македонија продолжува по патот кон ЕУ
Заменик-претседателот на Владата задолжен за европски прашања, Никола Димитров, имаше видеосредба со министерот за надворешни работи на Чешка, Томаш Петричек.
„Чешка практично го штити интегритетот на пристапниот процес во ЕУ. Без оглед на одлуките на Советот, Северна Македонија продолжува по патот на приближување кон ЕУ и во претстојниот период од големо значење би била зајакната билатерална соработка во однос на експертиза и техничка помош главно во областа на економското управување, социјалната политика, земјоделството и искористувањето на европските фондови, вклучително и преку инструментите ТАИЕХ и „Твининг“ за јакнење на институционалните капацитети“, истакна Димитров.
Министерот Петричек ја потврди посветеноста на Чешка на евроинтегративниот процес, потврдувајќи го нивниот став дека првата меѓувладина конференеција меѓу Северна Македонија и ЕУ треба да се случи што е можно побргу.
На средбата се разговараше и за билатералната соработка и за можностите за нејзино унапредување.
„Донациите и поддршката од Чешка се од големо значење за Северна Македонија, особено во овој период кога се справуваме со последиците од пандемијата, а покрај тоа, добредојдена е и партнерската поддршка во нашите заложби да ја донесеме ЕУ дома“, истакна Димитров.
„Чешка е спремна да ги понуди своето искуство и експертиза за прашања од доменот на регионалната соработка и добрососедските односи“, порача чешкиот министер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.
Македонија
Притвор од 48 часа за две лица кои се задржани по убиството на лекарот во Железара
Со оглед на тоа што се уште се преземаат дејствија за обезбедување докази, јавен обвинител од Основното јавно обвинителство Скопје синоќа до судијата на претходна постапка од Основниот кривичен суд Скопје достави предлог за определување мерка краткотраен куќен притвор во траење од 48 часа за две од лицата кои беа задржани во врска со убиството на лекар во скопската населба Железара, извести Обвинителството.
Како што велат од Обвинителството, предлогот е прифатен и бараната мерка е определена.
Македонија
„Мицковски е ист како Груевски, злоупотребени децата во Гевгелија“, вели СДСМ
„Христијан Мицкоски е ист како неговиот претходник и ментор Никола Груевски. За врме на посетата на Мицкоски на Гевгелија беа злоупотребени млади лица и ученици, исто како што правеше Груевски, кога се редеа деца за да го поздравуваат“, соопшти СДСМ.
„На ист начин вчера, под палка на локалната власт на ДПМНЕ во Гевгелија беа поставени ученици да му аплаудираат, овој пат на Мицкоски.
Мицкоски е ист како Груевски. Во ДПМНЕ нема никакви промени. Тоа се истите методи на ДПМНЕ и истите ликови.
Мицкоски сака да продолжи каде застана Груевски.
Граѓаните не забораваат како изгледаше кога менторот на Мицкоски, Груевски нѐ заглави и не донесе до дното“, се наведува во соопштението на СДСМ.