Македонија
Димитров се сретна со португалската амбасадорка Марија Вирџинија Мендес да Силва Пина
Во пресрет на денешното заседавање на Советот за општи работи на ЕУ во Луксембург под португалско претседателство, заменик претседателот на Владата задолжен за европски прашања Никола Димитров се сретна со амбасадорката на Португалија со седиште во Белград, Марија Вирџинија Мендес да Силва Пина.
На средбата беше дискутирано за активниот ангажман на португалското претседателство за отстранување на пречките за одржување на првата меѓувладина конференција помеѓу ЕУ и Северна Македонија, при што вицепремиерот Димитров изрази благодарност за улогата на Португалија како искрен посредник во однос на европската перспектива на нашата држава.
„ Португалското претседателство навистина го одржа ветувањето дека во рамките на надлежностите и своите можности ќе направат сè што е во нивна моќ за да се динамизира европското досие на Северна Македонија. Португалскиот предлог е добра појдовна основа за решение, но и силен поттик за продолжување на реформскиот процес и инкорпорирање на европските вредности дома. Посредничката мисија предводена од нашите португалски пријатели е многу важна и за зајакнување на кредибилитетот на Европската Унија и поместување на позициите во однос на процесот на проширување“ рече Димитров.
Двајцата разменија ставови за актуелните предизвици со кои се соочува Европската Унија и регионот, а кои беа дел од агендата на португалското претседателство и исполнувањето на приоритетите од агендата, како и перспективите за време на следното претседателство, кое Словенија го презема од 1 јули.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Петровска: Судот донесе одлука дека Ковачки неправедно ме клеветел
Министерката за одбрана, Славјанка Петровска објави дека судот донел одлука со која се утврува дека пратеникот од ВМРО-ДПМНЕ, Драган Ковачки, неправедно ја клеветел.
„Основниот граѓански суд во Скопје по сите прикажани докази од моја страна донесе одлука со која се утврдува дека тужениот Драган Ковачки искажал невистини и лаги односно неправедно ме клеветел во јавност со цел да ми го наруши угледот и честа во очите на јавноста, Овој е само еден од низата примери на неодговорно, нечесно и валкано однесување на политичката сцена од страна на Ковачки“, пишува Петровска.
Во продолжение таа додава дека не сака пари од нечесник и се откажува од паричниот надомест.
„Секој го прави тоа што најдобро го знае, тие со лагите, јас со труд и одговорна и чесна работа“, додава Петровска.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.
Македонија
Притвор од 48 часа за две лица кои се задржани по убиството на лекарот во Железара
Со оглед на тоа што се уште се преземаат дејствија за обезбедување докази, јавен обвинител од Основното јавно обвинителство Скопје синоќа до судијата на претходна постапка од Основниот кривичен суд Скопје достави предлог за определување мерка краткотраен куќен притвор во траење од 48 часа за две од лицата кои беа задржани во врска со убиството на лекар во скопската населба Железара, извести Обвинителството.
Како што велат од Обвинителството, предлогот е прифатен и бараната мерка е определена.