Македонија
Димовски: Во Собранието се штанцаат закони како никогаш досега
Собранието, за жал, стана нотар на Владата без можност за никаква длабинска и сериозна дебата, анализа, без мислење на стручната јавност, со драстичен број намалени јавни расправи и без одржување на каква било надзорна расправа во рамките на надлежностите на Собранието, изјави на прес-конференција Илија Димовски, пратеник на Пратеничката група на ВМРО-ДПМНЕ.
„Само во изминативе три дена во Собранието пристигнаа 41 предлог-закони од кои повеќето по скратена постапка, а во рамките на веќе закажаната 123. седница на Собранието, којашто треба да се одржи в среда. Вкупно на дневен ред во рамките на една седница се ставени 79 различни закони, од кои, пак, најголемиот дел се од економската и финансиската сфера во Република Македонија. За овие закони нема да има јавни расправи и за овие закони пратениците нема да имаат можност за длабинска анализа, консултации и за сериозен приод. Како никогаш досега во Собранието се штанцаат закони коишто единствена цел имаат СДСМ во текот на предизборниот период да купува гласови на еден крајно низок начин, да врши уцени кон бизнисмени и манипулации со граѓаните.
За да бидат фактите уште повеќе поразителни, сакам да ве известам дека во овој мандатен период од вкупно 425 закони коишто се влезени во процедура, 232 се по скратена постапка, односно 55% од законите во овој мандатен период се по скратена постапка. Сите добро ги памтите критиките на СДСМ за претходните мандати на Собранието кога бројот на скратени постапки во Собранието се движеше од 20 до 30%. Сега, 55% од законите коишто ова Собрание ги донело се по скратена постапка. Многу пати сме реагирале на ваквата злоупотреба на скратената постапка, но гледаме дека парламентарното мнозинство предводено од СДСМ продолжува со ваквиот начин на самоволно водење на Собранието.
На овој начин не се овозможува, посебно во период кока се разгледува буџетот на државата и кога во процедура се закони коишто имаат малку поголемо реформско значење, не се овозможува на пратениците доволно временски период да бидат во консултации со стручната јавност, но и темелно да пристапат кон работите. Нашата пратеничка група е посветена на обврските што ги има во Собранието и адекватно одговара со многу голем број амандмани кон овие закони, но би сакале да предупредиме дека во следниот период од 15, односно 20 дена овие закони, посебно од економската и финансиската сфера, ќе треба да се донесат, да стапат во сила и да се применуваат од 1 јануари.
Поголем проблем е тоа што сите компании во Република Македонија, односно стопански субјекти, ќе немаат можност адекватно да се запознаат со содржината на новите закони што Владата ги предлага. Дополнително владејачкото мнозинство дополнително работи на заобиколување на процедурите во Собранието. Покрај скратената постапка, и кога треба и кога не треба го вметнува и знаменцето на Европската Унија со што трпи сериозни критики и од амбасадорите на европските држави во Македонија. Исто така, сведоци сме на голем броја избрзани и неквалитетно изработени закони коишто потоа самата Влада или парламентарното мнозинство ги враќа во процедура, а имаат далекусежни последици за целокупното општество.
Затоа апелираме уште еднаш до парламентарното мнозинство предводено од СДСМ да не го злоупотребува овој период од преостанати дваесетина дена до истекот на мандатот на оваа Влада, да не ја силува работата во Собранието и да дозволи сите процедури и сите постапки да се движат во нормален тек. Да има простор и за јавна расправа, да има простор и за консултација со стручната јавност“, изјави Димовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари од централниот митинг во Струга: Зголемување на минималната плата до 800 евра за борба против имиграцијата
Кандидатот за претседател од редовите на ВЛЕН, Арбен Таравари, ја изрази својата заложба за борба против имиграцијата преку зголемување на минималната плата во нашата земја. Во рамките на идната влада се планира зголемување на платите и до 800 евра, со што ќе се создадат нови можности младите мажи и жени да останат и да придонесат за развојот на државата.
Преку грантови за технологија и иновации, Таравари рече дека владата има за цел да ги поддржи нивните креативни идеи, фокусирајќи се на развојот на земјата како атрактивна алтернатива за младите.
„Иселувањето кај нас е над секоја норма, бројките се алармантни. Не можеме да останеме рамнодушни на оваа ситуација. Така како следна влада на ВЛЕН ќе донесеме одлука за покачување на платите. Ќе се заложиме минималната плата до крајот на нашиот прв владејачки мандат да биде 800 евра. Преку грантови за технологија и иновации, ќе ги поддржиме младите мажи и жени со нивните креативни идеи, кои првенствено служат за нашиот развој како држава. Ова ќе биде дополнителна причина да ја гледаат иднината овде со нас, недалеку од нивните домови, недалеку од нивниот роден град“, рече Арбен Таравари на централниот митинг во Струга.
Македонија
(Видео) Силјановска -Давкова: На 9 мај ќе го славиме Денот на победата над фашизмот и Денот на Европа, но ќе славиме и за Македонија
„На 9-ти мај ќе го прославуваме Денот на победата над фашизмот и Денот на Европа! На 9-ти мај, ќе ја славиме Македонија како твоја и Македонија како горда! Ви ветуваме дека ќе докажеме дека нема да ве срамиме, дека нема да ги заборавиме државните и нациолнални интереси, кои тие не само што ги заборавија, туку и ги погазија! Молам за доверба!“, рече Горданa Силјановска -Давкова, кандидат за претседател на Македонија.
„Верувајте ми, има моменти во историјата! А таков е овој, кога мора да сме заедно! Кога како никогаш досега, потребна ни е вашата поддршка! Без вас не може да направиме единство! Без вас Македонија не може да биде ниту твоја, ниту горда! Без вас не може да дојдеме до победа! Вие го имате првиот и последниот збор! Ви веруваме!
Денес е Денот на светското културно наследство. Охрид е незаменлив и ценет, драгоцен дел од него. Охрид е споменик и дом на европското христијанство! Да го чуваме! Не заборавајте: Без Охрид, Македонија нема да биде почитувана!
Час поскоро, активирајте го универизтетот на Плаошник! Оваа власт не знае што е култура, за неа културата е бизнис. Ако започна изградбата во времето на ВМРО-ДПМНЕ, мора да доврши.
Во насока на јакнење на културниот туризам ќе покренам организирање на меѓународен форум – Плаошник форум, на кој ќе се дискутира соработката на цивилизациите, религиите и културите. Сето ова во соработка со УНЕСКО и Министерството за култура! Упатувам порака дека: Плаошник може да биде центар на дијалог на цивилизациите! Дијалог на религиите! Центар на културен дијалог! Затоа сум горда на него!“, додаде Горданa Силјановска -Давкова.
Македонија
Мицкоски: Повикувам на обезбедување на македонско национално единство, обзнанувам мораториум и запирање на сите напади кон партиите Левица и ЗНАМ
Нашето име е ВМРО-ДПМНЕ, ВМРО – демократска партија за македонско национално единство. Тоа е многу силно име, кое не само заради историското ВМРО и континуитетот на кој се повикуваме како идеја и организација која ја славиме и која е нераскинлив дел од македонското национално движење и можеби најзначајна за македонскиот национален идентитет, туку истовремено и поради обврската и одговорноста која и вториот дел од името ја носи со себе, рече претседателот на ВМРО-ДПМНЕ, Христијан Мицкоски од големиот народен митинг во Охрид, од каде што традиционално ВМРО-ДПМНЕ ја почнува кампањата за парламентарните избори.
Мицкоски посочи дека долго време таа обврска и одговорност како да се одбегнуваше, а понекогаш и се занемаруваше и никогаш како сега не било важно како сега да се случи обединување, да се обезбеди национално единство.
„Мојата прва иницијатива за обезбедување на македонско национално единство ќе ја започнам со тоа што сакам да обзнанам мораториум во нападите кон партиите Левица и ЗНАМ. Ова го чувствувам како потреба на македонскиот народ но, и како моја обврска да се обидам да ја реализирам идејата за национално единство во моменти кога таа и е најпотребна на Македонија“, рече Мицкоски.
Додаде дека со Левица и ЗНАМ, ВМРО-ДПМНЕ има свои разлики по повеќе прашања и од идеолошка но и од принципиелна природа, но смета дека во моментов, најважно за Македонија е да се фокусираат на оние кои што ја киднапираа државата од граѓаните.
„Но, ценам дека во моментов најклучно за иднината на земјата е да се фокусираме на оние кои ја киднапираа Македонија од рацете на граѓаните. Разидувањата сигурно ќе продолжат, но мора да наоѓаме заеднички јазик без разлика на лични и партиски суети и интереси. Од нив не очекувам да го направат истото. Дури можеби и ќе ме нападнат за овој гест, можеби некои оправдано ќе кажат дека задоцнет, но и покрај тоа, како и да се однесуваат споменатите партии, ние како партија ќе опстоиме на нашиот збор“, порача Мицкоски.