Daily news
Договорот со Бугарија ќе биде објавен пред да биде потпишан
Премиерот Зоран Заев најави денес дека договорот со Бугарија ќе биде објавен пред да биде потпишан и дека последен збор околу него ќе даде македонскиот Парламент, кој ќе треба да го ратификува.
„Следи средба на министрите и на нивните кабинети кои треба да најдат решение за едно мало, техничко прашање што мора да го решиме за да имаме официјално заокружен дел. Некаде пред потпишувањето имаме намера да го објавиме договорот, да го отвориме за дебата, да го видат сите и дадат свои коментари. За мене тоа што ќе биде потпишано, надевајќи се дека тоа отворено прашање ќе биде решено, навистина отвара сериозни врати кон убави евроатлантски перспективи на Македонија“, рече Заев.
Запрашан во кој дел ќе се менува историјата Заев одговори:
„Тоа што е наша посебна историја е само наша посебна историја. Тоа што е заедничка историја е и европска историја, но и балканска историја. Не прејудицираме да менуваме нешто од историјата, но ние може да ја промениме иднината и тоа зависи од нас. Ако бидеме мудри ќе отвариме блескава иднина за нашите граѓани, а со тоа ќе влијаеме и за подобра иднина на граѓаните на Република Бугарија. Јас на целиот овој процес гледам повеќе како шанса да ги наоѓаме начините како да се зближиме и да соработуваме. Затоа, апелирам на позитивниот аспект на гледање на работите, но и на транспарентниот и одговорниот аспект кадео и граѓаните и институциите се тие кои на крајот ги носат самите одлуки“.
Околу тоа дали ќе има промени во учебниците за историја Заев одговори дека експерти и историчари од двете земји ќе седнат околу тоа прашање и, доколку постои нешто проблематично, тие треба да го разјаснуваат.Генерално за договорот Заев одговори дека ни тој ни Борисов немаат предрасуди да зборуваат за него, за делот на народите, за делот на заедничката историја, за формулациите, за определбата за заокружувањето на процесот…
„Апсолутно нема потреба од драматизирањата за предавство, за лоши позиции на Македонија.Ниту Бугарија има предрасуди, ниту ние во овој дел. Да бидеме храбри, време е за лидерство, да ги отвараме процесите и да изнаоѓаме решенија за проблемите кои ги кочеа Македонија и перспективите на граѓаните. Апсолутно неплашејќи се од дебати, критика и различни ставови по ова прашање. Јас сум убеден дека овој договор треба да биде ратификуван во Парламентот, кој ќе биде институција која ќе се изјасни за конечноста на евентуалното потпишување на договорот“, најави Заев.
Околу поклопувањето на посетата на бугарска државна делегација и состанокот во Црна гора со потпретседателот на САД, Мајкл Пенс, Заев одговори дека за време и во очи на празникот ќе ги изменаџира двата настани.
„Македонија има огромна чест да биде прв домаќин заедно со Црна Гора на потпретседателот на САД, што за нас значи силна поддршка на севкупниот регион. Тој состанок почнува во Црна Гора некаде попладне. Јас сум убеден дека можеме дел од активностите при официјалната државна посета на Бугарија на Македонија да ги завршиме во очи на празникот, на први август, секако да го одбележиме празникот рано наутро колку е тоа возможно, да се поклониме пред еден споменик од заедничката историја и веднаш да стигнеме во Подгорица. Но, тоа е наша замисла, се надевам дека и бугарската страна ќе прифати, за да можеме да ги движиме двете агенди паралелно,“ соопшти премиерот Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.