Македонија
ДУИ: Ги покачивме платите во образованието 21 отсто и тоа останува наш приоритет
Се грижиме за наставниците – ја поттикнуваме мотивацијата за работа преку повисоки плати, подобри услови за работа и можности за кариерен развој. Наставниците се најважната алка во образовниот процес на учениците. Од нив, односно од нивната заложба, мотивираност за работа и креативност при извршување на работните обврски, најмногу зависи квалитетот на генерациите што се создаваат, изјави на прес-конференција министерот за образование, Арбер Адеми, од седиштетот на ДУИ во Скопје.
Според него, без задоволни наставници, нема квалитетно образование.
„Ние сме свесни за оваа работа и затоа во изминатите две години силно се заложивме да ги вратиме дигнитетот и достоинството на наставничката професија. Се заложивме наставниците да го добијат местото во општеството, но и почитта што, всушност, и ја заслужуваат.
Нашиот првичен план за поддршка на наставниците е веќе целосно реализиран. Но, во следниот период ќе работиме на негова надградба и понуда на нови можности за наставниците и стручните соработници. За период од две години, платите на наставниците во основните и средните училишта се зголемени повеќе од 21 процент. Историско покачување со кое се гордееме. Првото покачување на платите на наставниците беше во септември 2018 година, и тоа 5 отсто, второто во септември 2019 година, исто така 5 отсто, а третото, кое изнесува нови 10 отсто, е реализирано во јануари 2020 година. Кумулативно заедно со годишните порамнувања имаме зголемување на платите на наставниците и стручните соработници повеќе од 21 отсто.
Во меѓувреме, пораснаа и платите на вработените во високообразовните установи – 5 отсто, а набргу, по изнаоѓање правно решение, ќе ги добијат и новите 10 отсто, кои се веќе договорени. Пораснаа и платите на вработените во научните институти, и тоа дури повеќе од 30 отсто.
Изразено во конкретни бројки, покачување на платата добиваат вкупно 32.400 граѓани, од кои 19.500 вработени во основните училишта, 8.200 во средните училишта, 4.500 во високо образовните установи и 220 во јавните научни институти.
Во овој контекст, дозволете да потсетиме дека е усвоен и Законот за наставниците и стручните соработници во училиштата и тој силно влијае врз мотивацијата за работа. Првпат обезбедува можност за кариерен напредок во звања ментор и советник по исполнувањето одредени услови и за тоа исто така наставникот, односно стручниот соработник, добива повисок личен приход. Еднакво важна е и гарантираната можност во рамките на законот за континуиран професионален развој и усовршување преку обуки дефинирани во акредитирани програми.
Ако на ова ги додадеме и интензивните заложби за унапредување на условите за работа во училиштата преку подобрување на инфраструктурата, преку набавката на опрема и така натаму, убедени сме дека мотивираноста кај наставниците за работа континуирано ќе продолжи да се зголемува, а тоа ќе придонесе за создавање генерации, при што секоја ќе биде барем за нијанса подобра од претходните. Оваа наша посветеност и овие резултати се гаранција за заложбите на кои ќе бидеме фокусирани и ќе ги реализираме во периодот што следува“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Позитивна оценка за првиот круг од претседателските избори, забелешки за острата и негативна реторика од страна на ОБСЕ/ОДИХР
Првиот круг од претседателските избори беше конкурентен и гласачите можеа да направат информиран избор. Меѓународната набљудувачка мисија на ОБСЕ/ОДИХР во своите прелиминарни заклучоци со позитивна оценка, но со забелешка за острата и негативна реторика.
Шефицата на мисијата на ОБСЕ, Џилијан Стирк, на денешната прес-конференција посочи дека во кампањата биле почитувани основните слободи, процедурите во гласањето биле испочитувани во голема мера, додека, пак, во некои случаи избирачките одбори не ги завршиле целосно пропишаните процедури при пребројувањето.
„Основните слободи беа почитувани во кампањата, но како што се приближуваше денот на изборите, а границите помеѓу претседателската и парламентарната трка почнаа да се замаглуваат, реториката стануваше сè понегативна и во некои случаи дискриминаторска, одразувајќи ја политичката фрагментација и етничките поделби“, истакна Стирк.
Околу измените во Изборниот законик, истакна дека тие биле воведени преку процес на кој му недостасувало транспарентност и консултации со јавноста.
Беше потенцирана и недоволната застапеност на жените во кампањата, како и ограничениот ангажман на жените гласачи што, како што е посочено, ја покажува потребата од поголема посветеност на обезбедување нивна вклученост во политичкиот живот.
Во врска со распределбата на средствата за кампања беше нагласено:
„Поврзаноста на распределбата на средствата за кампања и медиумските можности со партиската припадност несразмерно ги фаворизираше кандидатите кои се поврзани со големите политички партии“, наведе Стирк.
Набљудувачката мисија ќе го проследи и вториот круг на претседателските избори заедно со парламентарните избори на 8 мај.
Македонија
(Видео) Николоски: Како носител на ИЕ 4 за мене најдрага е победата на ВМРО-ДПМНЕ во Струмица, во следните две недели ќе продолжиме да работиме уште поинтензивно
Денес продолжуваме со кампањата за парламентарните и претседателските избори, денеска се спојуваат повторно двете кампањи. Продолжуваме тука од Струмица каде што планираме големи проекти по формирање на влада предводена од ВМРО-ДПМНЕ. Повикувам сите граѓани да ја прочитаат нашата програма Платформа 1198 каде што нудиме решенија за најкрупните проблеми на граѓаните, пред се во делот на владеење на правото и воспоставување на функционален систем на владеење на правото и правна држава, понатаму економскиот развој, решенија за состојбите во образованието и во здравството, поддршка за пензионерите, но и за најмладите преку проектот „Купи куќа“ и бројни други проекти кои што ги имаме во Платформата 1198, порача Александар Николоски, потпретседател на ВМРО-ДПМНЕ и носител на изборна единица 4.
„За нас е огромна привилегија поддршката која што ја добивме вчера, сметаме дека резултатот кој што вчера го постигна Гордана Силјановска Давкова и ВМРО-ДПМНЕ е обврска во следните две недели уште поинтензивно да се среќаваме со сите кои што сакаат да се сретнат со нас, да го објасниме нашиот концепт и визија и да ја побараме поддршката. Очекувам на 8 мај да има убедлива победа за Гордана Силјановска Давкова и најмногу пратеници за ВМРО-ДПМНЕ кој што ќе овозможат стабилна влада која што нема да биде уценува од никого и кој што ќе овозможат во опозиција да одат и СДСМ, но и политичката партија ДУИ“, кажа тој.
Додаде дека е среќен како носител во ИЕ 4 што имаат победа во Струмица.
„Тоа мислам дека е голем сигнал не само за Струмица, не само за струмичката околија туку за цела Македонија. Победата за Струмица за мене е најдрага од сите победи вчера, сакам да се заблагодарам на тимот позади мене, во следните две недели ќе работиме уште поинтензивно за да имаме уште поубедлива победа и Струмица конечно да го добие она што го заслужува, а тоа е економски развој и воведување на функционална правна држава каде што ќе има јасно владеење на правото, а не она што се случуваше во годините наназад“, рече Николоски.
Македонија
Стојчевски: Родена е третата политичка сила во македонскиот политички блок
Даниел Стојчевски, носителот на листата на Движењето ЗНАМ за Наша Македонија во ИЕ 2 истакна дека е родена третата политичка сила во македонскиот политички блок.
„Граѓаните испратија јасна порака. Изборното востание со својата незапирлива позитивна енергија се шири низ цела Македонија. На граѓаните им е доста од неказнета корупција,неправда,сиромаштија,лажни ветувања и криминална власт. Ние од Движењето ЗНАМ за Наша Македонија,искрено и чесно сме посветени на идејата нашата татковина да ја иградиме како просперитена држава во која обединето живеат среќни граѓани ,и никогаш нема да дозволиме граѓаните да бидат поделени по политичка, етничка или верска припадност“, истакна Стојчевски.
Се заблагодари на подршката на граѓаните и гласот кој го дале за како што рече, просперитетна Македонија.
„Ви благодариме за довербата која ни ја давате, да стигнеме до нашата заедничка цел, да ја видиме Македонија таму каде што заслужува да биде“, посочи тој.