Македонија
Дурловски со видеопорака му се заблагодари на Мицкоски
Оперскиот пејач Игор Дурловски преку социјалните мрежи изрази благодарност до претседателот на ВМРО-ДПМНЕ, Христијан Мицкоски, за, како што вели, укажаната чест и одговорност како натпартиски кандидат да биде носител на листа во изборна единица 5. Тој преку видеообраќање побара поддршка за претстојните избори преку достоинствена борба, гласачите да бидат на страната на победниците.
„Ги бранев нашите принципелни ставови, борејќи се за Македонија, за вистинските вредности, без отстапки. Доаѓам од средина каде секогаш се работи тимски. Заедничкиот труд на тимот на крајот се вреднува и наградува со аплауз. Во тој свет нема противници. На сцената немам непријатели. Ве повикувам на достинствена борба, уверен дека ќе ја одберете вистинската страна, страната на праведните, страната на победниците. Јас немам противник, немам ни непријател. Се борам за вистината, а вистината е само една“, вели Дуловски.
Носителот на листата во изборна единица 5 од ВМРО-ДПМНЕ, Дурловски, вели дека народот ќе бил повторно слободен, иако борбата ќе биде тешка. Тој кажува дека ќе се бори да го врати достоинството на Македонецот.
„Периодот кој следи ќе биде уште една потврда на нашата решеност, сплотени сите ние да се избориме за доброто на нашата Македонија, за доброто на нашите деца и идеалите на нашите претци. Ќе се потрудам да стигнам до секој од вас, да стегнам сечија дланка, да ве погледнам во очи, да ве охрабрам, да го вратиме оптимизмот што ни го одзедоа. Слободата е блиску, илузијата е скршена. Народот ќе биде повторно слободен, борбата ќе биде тешка, но овој пат, пред вас имате луѓе кои нема да отстапат и кои имаат визија, знаење, енергија. Се борам и ќе се борам со сета сила да се врати достоинството на Македонецот, од сите национални понижувања кои ги доживеавме заедно. Да го обновиме системот кој свесно и во континуитет е рушен. Да ги поддржиме најдобрите да водат и да го употребат сето свое знаење, мотивација и храброст. Свесно, со политички средства да им ја покажеме нашата сила и мудрост. Да завршат маките, да дојде подобро утре. Ве поканувам да бидете со мене, да бидете со нас, бидејќи заедно сме уште посилни. Македонија слободна, слободно ќе живее, секогаш и засекогаш“, додава Дурловски во обраќањето.
За пратеничко место во изборната единица на Дурловски, од ВМРО-ДПМНЕ ќе се борат и Антонијо Милошоски, Силвана Ангелевска, Кирил Пецаков од Охрид, претседателот на УМС, Јован Јаулески од Струга, Олга Лозановска од Битола, Ѓорѓија Сајковски од Кичево, Лидија Петкоска од Охрид, Мирче Аџиовски од Струга, Грација Бакрачевска од Охрид, Бајрам Требишки од Маврово-Ростуше, Бобан Бојковски од Битола, Билјана Проеска од Крушево, Тасин Ибраим.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Македонски концепт: Ја поздравуваме одлуката на кандидатот Пендаровски да го истрча и вториот круг
Колку беше важна победата на кандидатката Гордана Силјановска Давкова во првиот круг, толку е важна одлуката на кандидатот Стево Пендаровски да го истрча и вториот круг и да не ги бојкотира претседателските избори, велат од Македонски концепт.
„Бојкот никогаш не бил решение, ниту на Референдуми, ниту на Попис на население, ниту пак на Избори. Мора да се почитува волјата на народот и да биде мирно предадена власта на победничката Коалиција „Твоја Македонија“, предводена од ВМРО ДПМНЕ, а чиј дел е и нашата партија Македонски Концепт.
Партијата Македонски Концепт честита на огромното водство на кандидатката Гордана Силјановска Давкова, што е резултат на нашите политики за обединување на опозицијата, нешто што го депласираше и детронизирање ДУИ и нивните сдса измеќари, а со цел уште поголема победа во вториот круг на 8ми Мај, повикуваме на уште поголемо обединување и окрупнување на Коалицијата „Твоја Македонија“ со останати добронамерни политички партии и членови и симпатизери на останати партии, чии водства се платеници на ДУИ, но нивните поддржувачи се искрени Македонци и искрено се радуваат на оваа голема македонска победа.
Македонски Концепт го реафирмира својот став за граѓански концепт на Уставот на државата и ги повикува сите македонски граѓани, без разлика на етничка, верска, партиска или друга припадност, да се вклучите во нашите активности и на 8ми Мај да дадете поддршка на Коалицијата „Твоја Македонија“ и број 2 на гласачкото ливче и за претседателски и за парламентарни избори“, велат од партијата.
Македонија
ВМРО-ДПМНЕ: Народот избра промени, да излеземе уште помасовно на 8. мај
Огромната поддршка обврзува за промени и брзи резултати, да излеземе уште помасовно на 8-ми мај, а потоа следува економска трансформација на Македонија, порача ВМРО-ДПМНЕ по првиот круг од претседателските избори.
„Народот избра промени. Македонија повторно ќе биде горда и твоја.
Огромната поддршка на народот обврзува за промени и брзи резултати, работата не е завршена, црвениот картон граѓаните ќе го дадат на 8-ми мај.
На 8-ми мај СДС ќе доживеат уште поголем пораз, затоа што народот сака промени, и просперитет за Македонија.
ВМРО-ДПМНЕ се обврзува на напорна работа и експресни резултати по 8-ми мај, народот мора брзо да ги почувствува промените и Македонија да тргне напред.
По 8-ми мај Македонија ќе тргне по патот на економска обнова, поголеми плати и пензии, развиена инфраструктура, квалитетно образование, здравство какво што заслужува секој човек. По 8-ми мај следува економска трансформација на Македонија.
Ги повикуваме граѓаните уште помасовно да излезат во вториот круг и да ги потврдиме промените. Народот ќе си ја врати Македонија.
Македонија повторно твоја“, се вели во соопштението на ВМРО-ДПМНЕ.
Македонија
Силјановска убедливо пред Пендаровски во првиот круг со 40 наспроти 19,93 отсто од гласовите
Кандидатката за претседател поддржана од ВМРО-ДПМНЕ и коалицијата, Гордана Силјановска со убедливо водство влегува во вториот круг од претседателските избори, каде како и во 2019 година ќе се соочи со нејзиниот опонент Стево Пендаровски.
Според пребројани 99,85 отсто од гласовите, Силјановска освои 362.682 гласа, или 40,08 отсто, додека Пендаровски првиот изборен круг го завршува со 180.306 гласа, односно 19,93 отсто.
Зад нив е Бујар Османи од Европскиот фронт со освоени 120.903 гласа (13,36 отсто), потоа Максим Димириевски од ЗНАМ со 83.787 гласа (9,26 отсто), Арвен Таравари од ВРЕДИ со 83.356 гласови (9,21 отсто). Следна е Билјана Ванковска од Левица со освоени 41.172 гласа (4,55 отсто) и Стевчо Јакимовски од ГРОМ со 0,90 отсто, односно 8.103 гласови.
Вториот круг од претседателските избори ќе се одржи на 8 мај, заедно со парламентарните.