Македонија
Единствена Македонија: СЈО да не го крие предметот за фалсификуваниот попис во 2002-та година
Заменик претседателот на Единствена Македонија, Стефан Влахов Мицов денеска на прес-конференција обвини дека Специјалното обвинителство го крие кривичниот предмет за пописот во 2002-та година.
„Специјалната обвинителка Катица Јанева најави обвинение против Никола Груевски и Али Ахмети за кривично дело со кое го оштетиле државниот буџет за три милиони евра во врска со прекинатиот попис во 2011 година. Меѓутоа, Катица Јанева го крие клучниот кривичен предмет за фалсификуваниот попис од 2002-та година, со кој Албанците лажно беа прикажани дека се 25,17 отсто. Оттука и прашањето, како е можно едно кривично дело, па макар биле потрошени и три милиони евра, да биде повредно за Катица Јанева од фалсификуваниот попис со кој беа осакатени Македонија и Македонците“, праша Влахов Мицов.
Тој посети дека Народното движење за Македонија како правен претходник на Единствена Македонија, во 2009-та година, до Јавното обвинителство поднело кривична пријава за пописот во 2002, меѓутоа, но кривичната пријава останала закочена во обвинителските фиоки на тогашниот државен обвинител Марко Зврлевски. Потоа, во декември 2015-та година, партијата на Јанко Бачев до Специјалното јавно обвинителство поднела предлог за преземање на кривичниот предмет.
„Се работи за доста содржајна кривична пријава поткрепена со факти и докази кои побудуваат сериозно сомнение дека носители на највисоки јавни и државни функции во тоа време преземале активности за да влијаат при извршеното пребројување на прашалниците од страна на 160 лица кои во тоа време биле подготвени за кодирање и обработка на податоците со намера невистинито да прикажат дека бројноста на албанското малцинство во државата изнесува 25,17 проценти, со цел да ги задоволи потребите на Рамковниот договор кој предвидува албанската заедница да ги добие правата ако учествува со над 20 отсто од населението“, тврди Единствена Македонија.
При прибирањето на доказите, тие велат дека дошле до сознанија дека албанското малцинство во земјата изнесува околу 14 отсто.
„Расчистувањето со фалсификуваниот попис од 2002 е прашање од највисок национален и државен интерес за Македонија и Македонците.Фалсификуваниот попис во 2002 е случај над сите случаи и е неспоредлив по свето значење со сите предмети на Специјалното обвинителство. Оттука и прашањето, зошто Катица Јанева молчи и го крие предметот за фалсификуваниот попис од 2002“, праша Влахов Мицов.
Единствена Македонија ја повика Јанева да го испита случајот и изрази сомнеж дека одлуките на Специјалното обвинителство се пишуваат во американската амбасада во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Беќаровски навести дека си оди од Токсикологија: Дон Кихот конечно го напушта оклопот
Доктор Нико Беќаровски навести дека ќе си замине од Клиниката за Токсикологија.
Во статус на социјалните мрежи, Беќаровски порача дека е време на приватните клиники да се отвори Одделение за детоксикација и Клиничка токсикологија.
„35 години бев најголем борец за здрав јавен здравствен сектор. Дон Кохот конечно го напушта оклопот. Време е во некоја од приватните болници да се отвори Одделение за детоксикација и клиничка токсикологија. Бројот на консументи на психоактивни супстанции секојдневно расте“, пишува Беќаровски.
Ова се случува откако вчера на прес-конференција заедно со уште пет докторки од Стручниот колегиум на Клиниката за токсикологија јавно ја прозваа економската директорка на Клиниката за токсикологија Бесија Иљази, дека не дозволува вработување на двајца дипломирани биолози и еден болничар. Наместо, тоа, таа инсистира да се вработат осумнаесетмина на кои им истекле договорите за дело, а меѓу нив има лица кои немаат соодветно образование.
Беќаровски кој е раководител на Одделението за интензивна нега на Клиниката рече дека едниот од нив, болничар, вршел притисок врз лаборант- барал урина во која имало наркотици, да биде сменета со урина која е чиста, ама лаборантот не прифатил.
За образованието на Иљази, лекарите не знаат ништо, ниту за познавањето на јазици – со оглед на тоа што македонскиот не го зборува, а Беќаровски се обидел да комуницира со неа на англиски јазик.
Министерот за здравство Илир Демири најави разрешување на медицинскиот директор на Клиниката за токсикологија, д-р Данил Петровски, но не и економската директорка бидејќи немал сознанија за прекршок.
Македонија
Дожд и снег на повисоките места: ЦУК апелира на внимателност поради најавените метеоролошки промени
ЦУК апелира за внимателност заради најавените метеоролошки промени со дожд, со доумерен ветер и со снег на повисоките места.
Кога се оди со возило на планините е препорачливо да се има полн резервоар гориво и да се внимава на лизгавоста и проодноста на патот, велат од ЦУК.
„Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации“, се наведува во соопштението.
Истовремено, ЦУК информира дека е потребно и корисно да се следат препораките и информациите од медиумите за превенција, а и за реагирање при итни случаи.
„Во реонот на автопатот A2 Кичево-Охрид, што е во изградба, во период од 12 до 16 часот ако се слушнат силни детонации, граѓаните да не се вознемируваат, во повеќе наврати ќе се извршат минирања на теренот“, информираат од ЦУК.
Македонија
Странски новинари, преведувачи: вкупно 942 набљудувачи ќе ги следат претседателските избори
Вкупно 942 набљудувачи, странски новинари и преведувачи се акредитирани за следење на Претседателските избори на 24 април.
Како што е објавено на веб страницата на ДИК, заклучно до 19 април, акредитирани се 342 домашни и 568 странски набљудувачи и преведувачи, од кои најбројни се од ОБСЕ/ОДИХР.
Парламентраните избори во земјава ќе ги следат над 2000 домашни и странски набљудувачи.
Изборите за шеф на државата ќе ги следат и странски новинари.
Седмите претседателски избори во земјава ќе се одржат на 24 април, а евентуалниот втор круг заедно со парламентарните на 8 мај.