Македонија
Екоакција на жителите на село Чајле, се чисти дивата депонија кај Рудина
Веќе четири дена тече големата еколошка акција во местото наречено Рудина, во периферијата на село Чајле. Акцијата иницирана од страна на Месната заедница на село Чајле наиде на широка поддршка меѓу жителите, бизнисмените и иселениците од село Чајле, како и од Општина Гостивар и локалните еколошки здруженија, информира Општина Гостивар.
Камиони, трактори и соодветна механизација за чистење на теренот од селаните и бизнисмените ставени се на располагање за реализација на акцијата, најголема досега во селото и веќе меноста Рудина почна да го добива посакуваниот изглед. Во поддршка на акцијата на самото место денеска отиде и градоначалникот на Гостивар, Арбен Таравари. Во изјава за медиумите тој информира дека има најави за слични активности и во други населени места, а Општина Гостивар ќе ги поддржи и ќе иницира акции за чистење диви депонии на секој викенд. „Чајле и Чегране, а во иднина верувам и други села прават извонредна работа со вакви еколошки акции. Им се заблагодарувам на сите граѓани кои на разни начини даваат придонес за реализација на ваквите акции. Би сакал да нагласам дека Општина Гостивар во буџетот има предвидено по две илјади евра за секоја месна заедница за вакви и слични трошоци. Ние како Општина, заедно со двете јавни претпријатија, ќе ги поддржиме сите екоакции и се надевам дека секој викенд ќе имаме по една акција“, истакна Таравари.
Претседателот на Месната заедница на село Чајле, Синан Елези, објаснува дека теренот што се чисти, ќе се огради, ќе се постави табла за предупредување да не се фрла отпад, ќе се воведе дежурство и местото ќе се засади со дрвца.
„Им благодарам на сите оние што придонесуваат за остварување на оваа акција, жителите во општо, членовите на раководството на Месната заедница, бизнисмените, иселениците и нормално Општина Гостивар и градоначалникот Таравари. Како што можете да видите, во првите три дена направивме многу работа и продолжуваме со исто темпо. Местото ќе го огради и ќе се погрижиме да го одржуваме, а ќе засадиме и дрвца за да имаме чист воздух и да го зачувмае нашето здравје и здравјето на нашите деца“, истакна Елези.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.