Македонија
„Жените во надворешната политика“ – втора меѓународна конференција на МНР
Почна втората меѓународна конференција на Министерството за надворешни работи со наслов „Жените во надворешната политика“, под покровителство на Владата, а домаќин е заменик-министерката за надворешни работи, Фатмире Исаки.
На конференцијата се обрати министерот за надворешни работи, Бујар Османи, кој, меѓу другото, истакна дека конференцијата полека, но сигурно, станува традиционален настан како во регионот на Западен Балкан така и пошироко во светот како уникатна платформа за размена на мислења и идеи за улогата на жените во одлучувачки позиции.
„Северна Македонија како земја членка на НАТО и дел од меѓународното семејство на Обединетите нации, земја чија стратешка цел е членство во ЕУ и која ќе претседава со ОБСЕ во 2023 година, постојано вложува напори во застапувањето на родовата еднаквост и зајакнувањето на позицијата на жените во одлучувачките позиции бидејќи овој напредок е тесно поврзан со просперитетот, стабилноста и со благосостојбата на земјата“ истакна Османи.
Како домаќин на конференцијата, заменик-министерката за надворешни работи, Фатмире Исаки, во својот говор на официјалното обраќање се осврна на потребата од поголемо учество на жените во сите сфери во општеството нагласувајќи дека треба да се изнајде начин мажите и жените да го надминат родовиот јаз во јавниот живот.
„Ќе се залагам за секоја успешна жена дипломат во Министерството за надворешни работи да добие можност да извршува значајна позиција, за секоја жена амбасадор надвор, како и за сите други жени што имаат визија да го променат светот доминиран од мажите, за доброто на сите. Женските права се човекови права. Затоа, истакнувам дека не станува збор за опција, туку за нужност“, рече Исаки.
Како претставник на Владата, која е официјален покровител на овој настан, заменик-претседателката на Владата задолжена за политики на добро владеење, Славица Грковска, нагласи дека „на светот му се потребни упорноста, трпението, разбирањето и љубовта преку кои жените им пристапуваат на проблемите и носат одлуки. Неопходен ни е ваков приод имајќи го предвид актуелниот глобален политички и безбедносен контекст во светот“.
На официјалното отворање свои обраќања имаа високи политички претставници од земјите од Западен Балкан, кои споделија свои гледишта, видувања, лични искуства и мислења за политиките што треба да се преземат за унапредување на родовата димензија во надворешната политика, особено во однос на застапеноста на жените на одлучувачки позиции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Османи: Европскиот фронт е голема идеја чие време е дојдено
Кандидатот на Европскиот фронт, Бујар Османи, вечерва на митинг пред граѓаните на Кичeво изрази благодарност до лидерите на Европскиот фронт и коалицијата која, како што вели Османи, е продолжение на битките во континуитет една по една, за разбивање на замоците на етничките монополи.
„Европскиот фронт не е политичка партија. Европскиот фронт не е ни коалиција на политички партии, Европскиот фронт е голема идеја. Тоа е одлична идеја чие време дојде, лавина што ги собра соништата на секој граѓанин на оваа земја, за еднаквост, за правда и просперитетен живот во ЕУ. И ова го гледам како ентузијазам, како насмевка во секое населено место каде што одам, бидејќи Европскиот фронт е трета унија, но сега со малку поинаква димензија“, истакна Османи.
Кандидатот на Европскиот фронт, Османи понатаму истакна дека останува уште едена последна тврдина на етничкиот монопол.
„Тврдината која нè загрижува сите и секогаш ни го дава тој сигнал дека се уште не е сè како што треба, сè уште нема еднакви можности за сите, таа е тврдината на првиот претседател. Значи, браќа и сестри, се натпреварувам, на 24 април да ја разберете тежината на оваа мисија, дека вашиот глас не е само за мојата кандидатура, вашиот глас, вашата поддршка е за да ја разбиете последната тврдина на етничкиот монопол и за заокружување на еднаквоста на сите заедници во нашата заедничка држава“, заклучи Османи.
Македонија
Таравари: Ќе ја вратиме некогашната репутација на Куманово и Липково
Ќе ја вратиме некогашната репутација на Куманово и Липково. Ќе го поврземе Куманово со Гњилане и Прешево, ќе инвестираме во агробизнис, грантови и земјоделци Ќе ги поврземе Куманово со Гњилане и Прешево, ќе инвестираме повеќе во агробизнисот, во грантови за земјоделците и во економски развој за да ја вратиме некогашната репутација на земјоделството и производството на регионот на Липково и Куманово. Ова беа дел од пораките кои претседателскиот кандидат Арбен Таравари ги испрати вечерва од општина Липково. Оваа општина ја донесе ДУИ на власт а како награда добива само штета, неправда и лошо владеење.
„Наместо да се привилегира и развива овој регион кој некогаш важеше за кризен регион, лошото владеење на ДУИ го втурна во повеќекратни кризи. Економска и земјоделска криза, невработеност и миграциска криза, но и безбедносна криза и монтирани случаи. Никој повеќе од жителите на овој крај не ги почувствувал последиците од лошото владеење на ДУИ“, нагласи Таравари во својот говор.
Но, според него, оваа состојба ќе заврши со гласот на самите граѓани, кој ВРЕДИ и ќе ја донесе долгоочекуваната промена.
„Ќе донесеме повеќе правда, прво за политичките монтирани случаи, каде што ќе се заложиме за правда и обештетување за оние Албанци кои неправедно се држат во затвор. Никогаш не го забораваме војникот на слободата и жител на овој крај, Реџаил Ќерими, кој неправедно беше држен во затвор 13 години и почина во ќелијата кога отворено се знаеше дека нема врска со она за што го обвинуваа, изјави Таравари.
Меѓу другото, Таравари од Липково повтори дека со доаѓањето на ВРЕДИ на власт ќе се забрани коцкањето, а ќе се простат и долговите од фирмите за брзи кредити кои исто така рече дека ќе се затворат.
Македонија
Кои се седнатите на софра со најголемите криминалци од Грчец, Шиша бар, со оние од убиствата во Ханиоти, прашува Силјановска-Давкова
Ги нема сликите низ весниците кои се најдобар доказ, бидејќи сликите понекогаш повеќе кажуваат од зборовите, за тоа кој е кој во ова корупциско и криминално гнездо, вели професорката Горданa Силјановска -Давкова вечерва од Велес.
„Колку претседатели сте виделе, колку премиери сте виделе, колку министри за внатрешни работи сте виделе седнати на софра со најголемите криминалци од Грчец, Шиша бар, со оние од убиствата во Ханиоти? Може да се сликате со некого на улица, ама на софра да бидете тоа значи дека сте во спрега. Значи, во право е претседалот на ВМРО-ДМПНЕ кога вели дека, не само со чинење, не само со криминални активности, туку и со замижување пред криминалот и корупцијата вие сте соучесник во нив, посочи Силјановска Давкова и додаде:
„Во овие избори има нешто специфично, до ѕидот сме доведени. Вие заслужувате власт соодветна на вашето достоинство, власт од којашто нема да се плашите и срамите, туку ќе се гордеете“, порача вечерва од Свети Николе, кандидатката за претседател на државата, поддржана од ВМРО – ДПМНЕ и коалициските партнери