Македонија
(Видео) Заев го повика Мицкоски да учествуваат во кампањата за референдумот
Коалиција од стотина партии, здруженија на граѓани, невладини и независни пратеници ќе ја водат кампањата „Излези ‘за’ европска Македонија“, чиј почеток официјално го означи премиерот Зоран Заев. Тој во својот говор потсети на референдумот од 1991 година и порача дека и со овој референдум се потврди независноста на државата.
„Постои една директна линија што ги поврзува 8 септмеври 1991 година и 30 септември 2018 година. Тоа се два големи настана и чекори што ги преземаме како одговорни граѓани со кои ја обезбедуваме иднината на земјата. Ова е уште еден референдум за зацрстување и потврдување на нашата независност со што ќе добиеме сигурна перспектива како членки на НАТО и ЕУ“, рече премиерот.
Според него, значајно е што овој нов референдум за иднината на Македонија ќе се оствари со консензус. „Сите граѓани ќе бидат заедно за европска Македонија, време е земјава да тргне уште побргу по вистинскиот пат кој е над дневните расправии, политиката и жестоките полемики во општеството. Исправени сме пред прашање што е поголемо и поважно од сите политички партии – иднината на нашите деца е поважна од сите политички партии заедно. Ова е историска шанса за иднината, ни помага да се обединиме и да тргнеме заедно на последната етапа, марш кон Европа“, вели Заев истакнувајќи дека коалицијата е отворена за сите што сакаат да им се придружат.
Тој упати повторно повик кон опозицијата да бидат единствени кон ова прашање. „Убеден сум дека ВМРО-ДПМНЕ има силни причини да се приклучи, таа е за европска Македонија. Критикувајте нè за договорот со Грција, но не пропуштајте ја оваа шанса Македонија да стане дел од ЕУ и НАТО. Отсекогаш сум ја поздравувал конструктивната критика, но за иднината на Македонија мораме сите да бидеме едногласни“, рече Заев.
Тој ги повика Мицкоски и ВМРО-ДПМНЕ да се приклучат во позитивна кампања за референдумот бидејќи иднината на Македонија е над дневната политика.
Заев најави дека почнуваат кампања со која ќе ги информираат граѓаните за придобивките од влезот во ЕУ и НАТО, но и да ги објаснат придобивките од договорот со Грција.
Лидерот на ДУИ, Али Ахмети, порача дека референдумот на 30 септември е референдум за влез во НАТО и ЕУ, за една подемократска Македонија и за борба против корупцијата и криминалот.
„Во континутитет сме посветени да го исполниме барањето на речиси 90 отсто од граѓаните за целосна интеграција во ЕУ и НАТО како заокружување на многуте напори направени во текот на годините. Затоа, на 30 септември има само две опциии – ‘за’ или ‘против’ европска Македонија. Нема место за калкулации и противење, сите од власта и од опозицијата треба да му се приклучиме на карванот за подобра иднина“, рече Ахмети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Албанското тло е распарчено, потребно е да се засилиме а Русија не треба да се запостави: Ахмети формира „Евроспки фронт“ со Реџепи
Договор за заеднички настап на изборите потпишаа денеска претседателот на ДУИ, Али Ахмети и претседателот на Народното движење, Скендер Реџепи Зејд.
„Ние секогаш сме сонувале како Албанците ќе бидат обединети во еден фронт. Зошто сега се враќам на историја? Затоа што ги знам моите соништа. Големите нешта не се прават сами. Ова обединување на Албанците во Македонија е бидејќи нештата во глобалната политика одат лошо. Ова обединување е повеќе од потребно – треба да се поддржи од сите заедници во државата. Овој фронт ќе им излезе во пресрет на секој дел од општеството. Сите треба да ги поддржиме овие обиди кои произлегуваат затоа што Албанците историски изгубиле во одлучни моменти кога не биле обединети. Албанското тло е распарчено – затоа да се засилиме. Од денеска сме еден народ и едно тело и треба да ги реализираме соништата на нашите претци. Да не паѓаме во заседа на малите партии, туку да ја гледаме нашата историска мисија и да ја држиме во живот“, рече Ахмети по потпишувањето на договорот со Реџепи Зејд.
Лидерот на ДУИ го повтори постојаниот став дека само со членство во ЕУ ќе се спречат луѓето да бегаат од државатта.
„Русија не треба да се запостави. Веќе е во нашата земја и основала партија, има медиуми овде, основала милитанти овде кои сакаат да ни го попречат патот, за кој сме силно определени. Сакаме мирен и чист Балкан, регион кој што ќе се зачлени во ЕУ, како што влезе во НАТО“, додаде Ахмети.
Додаде дека е во преговори и со други партии за приклучување. Според него, тоа е процес кој е отворен подолго време.
Македонија
Ковачевски го повика Милошоски да не го блокира законот за рестриктивни мерки откога на црната листа на САД се најдоа Јакимовски и Јанева
Одлуката да ги стават на црната листа градоначалникот на Карпош, Стевчо Јакимовски, и поранешната специјална јавна обвинителка, Катица Јанева, САД ја носат врз основа на информации со кои располагаат, смета експремиерот Димитар Ковачевски. Тој денес јавно го повика патеникот Антонијо Милошоски да не го блокира предложениот закон за рестриктивни мерки, со кој лицата од црните листи на земјите што ни се стратешки партнери ќе може да бидат процесирани преку домашното законодавство.
„Се работи за одлука што ја носат американските институции врз основа на информации со кои тие располагаат. Со оглед на тоа што САД се наш стратешки партнер, исто како и Европската Унија и Обединетите нации, Владата подготви закон за рестриктивни мерки. Поднесен е до Собранието. Ги повикуваме пратеникот Антонијо Милошски и неговата партија ВМРО-ДПМНЕ да не го блокираат законот и да го пуштат во собраниска процедура. Очигледно е дека тој од некаква причина го блокира тој закон да не биде ставен на комисиска расправа и да не биде донесен. Доколку не планираат да го стават, тогаш треба да кажат од кои причини тој закон не сакаат да биде донесен во Собранието“, рече Ковачевски.
Неговата партија вчера и преку соопштение до медиумите го повика Милошоски, кој е претседател на Комисијата за надворешна политика во Собранието, да го стави на дневен ред предложениот закон и да го поддржат за да биде изгласан.
СДСМ јавно побара поддршка за предложениот закон за рестриктивни мерки откога Стејт департментот вчера соопшти дека на црната листа се ставени Јакимовски и Јанева. Јакимовски оти како градоначалник бил вмешан во коруптивни дејства, користење на положбата за мешање и попречување на урбаното планирање, набавки во негова корист и во корист на неговите соработници, а Јанева оти е вмешана во коруптивни дела, вклучително и користење на нејзиното политичко влијание и службена моќ за лична корист.
Македонија
Милошоски: Владата се плаши да ги искористи законските основи и да отвори истрага против Мерко, Јанева и другите меѓународни пријатели
Владата на ДУИ и СДСМ се плаши да ги искористи законските основи за меѓународна кривична соработка со САД и да отвори истраги против Рамиз Мерко, Катица Јанева и другите владини пријатели, кои се дел од црната листа на официјален Вашингтон, реагира на социјaлните мрежи пратеникот на ВМРО-ДПМНЕ, Антонијо Милошоски.
Потсетува дека Македонија веќе има усвоено Закон за меѓународна соработка во кривичната материја.
Во овој закон, како што појаснува, предвидена е можноста домашен надлежен орган (Министерството за правда или Јавното обвинителство) да испрати замолница за соработка во кривичната материја до надлежна институција на странска држава (чл.16).
„Со замолницата, која се доставува преку министерството за правда, од странската надлежна институција се бара достава на списи, информации и материјални докази за одредена предистрага, истрага или тековен судски предмет за физичко и/или правно лице. Овој закон (чл.35) овозможува и формирање на заеднички истражни тимови за истражување и гонење на кривични дела, а договорот за заеднички истражен тим го склучува државниот обвинител на Македонија. Во чл.39 од Законот за меѓународна кривична соработка дури е предвидено и секое истражно дејствие што го превземал надлежен орган на странската држава да биде изедначено со соодветно дејствие во кривичната постапка пред домашните институции.
Сумарно: Владата, министерот за правда и ЈО, доколу имаат политичка воља за сериозна борба против корупцијата, имаат важечки законски основ без одолговлекување преку Министерството за правда веднаш да испратат замолница до надлежните органи на САД за достава на сите документи, списи, докази и информации за Рамиз Мерко, Катица Јанева, Стевчо Јакимовски и другите лица на “црната листа”.
Државниот јавен обвинител може веднаш да оформи заеднички македонско-американски истражен тим и да поведе самостојна или заедничка истражна постапка и да оформи/ да процесуира кривично-правни предмети пред надлежните институции во Македонија“, истакнува во напишаното Милошоски.
Според него, овој закон добро е да се надгради и синхронизира со дополнителен закон за рестриктивни мерки, за што претставниците на стручната фела ценат дека е потребна квалитетна јавна расправа.
Оценува дека Собранието треба да биде организатор и домаќин на една таква јавна расправа, на која главниот збор ќе го имаат претставниците на судската фела, претставници на Обвинителството, адвокати и професори по кривично право. На ваквата јавна расправа, како што додава, многу ќе користи и присуството на експерти за рестрикции и санкции од САД и ЕУ за да имаме одржливо унапредување на позитивните норми во оваа регулирана област за меѓународна соработка во кривичната материја.