Македонија
Заев од Пеленица: Работиме со срце и одговорност за државата, повикувам на совесно и одговорно однесување од сите
Доаѓам наваму, ме застана еден наш другар и ми вели, претседателе, не ви се чини ли некако Пеленица најубава досега?! Погледнав наоколу, му одговорив – Да, а си помислив, изгледа зашто во душата ни е убаво. Има и зошто да ни е убаво во душата другари – затоа што нашата убава, признаена, осигурана, слободна, перспективна земја ни е во неа.
Еве ја Република Северна Македонија пред позитивната одлука за датум за почеток на преговорите со Европската унија. Еве сме на заокружувањето на интеграциите, како 30-та земја членка на НАТО. Еве сме во процес на економски развој – растат плати, детски додатоци, социјална помош, растат странски инвестиции. Имаме, и тоа какви причини, денес посебно, во три децениската независност, да се чувствуваме и достоинствено, и среќно, и мотивирано – убаво.
Нека ни е честит и вековит на сите, почитувани граѓани, 8-ми септември, денот на независноста на нашата заедничка Македонија, денешна Република Северна Македонија!
Оваа наша држава, за две години, на затекнатите рушевини успеа да ги обнови: мостовите дома, мостовите со соседите, со регионот, мостовите кон светот. После децениска изолација и сиромаштија, почнавме интеграциско развојно темпо што не можеше ни да се замисли! Се случуваат, и интеграции и развој.
Придонесот за напредокот на нашата држава е на сите граѓани, на сите влади, на сите партии од осамостојувањето на државата – нечии придонеси поголеми, нечии помали. Но, едно нешто е факт. Овој напредок, на нашата земја, го поведе и предводи социјалдемократска партија – нашиот, твој, мој, заеднички, Социјалдемократски сојуз. Овој историски напредок, што го живее денешна Република Северна Македонија, поставен на аманетот на претците, што со гордост ќе го предадеме во аманет на идните генерации, е можен само со државотворна партија, каква што е Социјалдемократскиот сојуз. И не фалба, реалност е, државата успева кога Владата ја води или е дел од неа, СДСМ.
Затоа што, едно е да си голема партија, а друго е да си државотворна партија. Првото значи бројки. Второто значи и срце и одговорност. Тоа што државата успева кога СДСМ успева не е само поради бројноста на приврзаниците, туку поради срцето и одговорноста со коишто работиме за нашата родна земја. Тоа е вистински патриотизам, на дело.
Така беше кога носевме одлука за независноста на Македонија во 1991 година. Нашиот прв претседател Киро Глигоров пред нас, и премиерот Никола Кљусев, го дадоа патоказот како се работи заедно за државните интереси. Тоа требаше некој да го види и испочитува. Го направивме тоа и еве ги денес успесите.
Со срце и одговорност работевме и кога ја спасивме државата од војна 2001-та година. Така беше и кога почнавме да го градиме патот кон ЕУ, во 2005-тата година. Така беше сите овие години кога стоевме на браникот на демократијата, посебно во 2011-тата година и во 2016-тата година кога беа загрозени државниот поредок и демократските права.
И важниот пресвртен момент, со срце и одговорност кон нашата држава, СДСМ се отвори целосно кон граѓаните во 2017-та година, кога го препозна крикот за обединување за да го победиме режимот. Се здруживме сите, без задршка, Македонци, Албанци, Турци, Срби, Власи, Роми, Бошњаци, други, од какви било политички определби и различности и на нашата држава ѝ создадовме граѓанска, демократска, проевропска Влада. Исто како што пред 28 години, во 1991-та година граѓаните, здружено, масовно и по сопствена волја, избраа слободна, суверена, самостојна и независна држава.
И така работиме и денес – интересите на државата пред `се. Промените во СДСМ се слух за потребите на граѓаните и државата. Со консензус ги носиме важните државни реформи. Низ политики на наоѓање решенија, наместо оправдувања, ги затворивме сите прашања со соседите. Во европски дух на почитување и разбирање ги градиме меѓународните односи и со нашите стратешки партнери, НАТО и Европската унија, а отворени сме за економска соработка со сите држави со цел да ги обезбедиме економските придобивки за секој наш граѓанин.
Посветени кон државните интереси во значајниот период што претстои, очекувам да бидат и сите државни институции и политички партии. Убеден сум дека имаме капацитет како држава, со двотретинско мнозинство да го донесеме и Законот за јавно обвинителство. И сите случаи и евентуални случаи на криминал и корупција, како во развиените земји, мора да добијат ефикасна, праведна и правична разврска. Тоа го очекуваат граѓаните и со тоа ќе дадеме дополнителни аргументи на ЕУ, дека сме и ние цврсто определени кон правдата и изградбата правна држава. На прашањето која Влада е најдобра, Гете рекол: Онаа која што не учи како да владееме сами со себе. Затоа што, нема поголема власт од онаа над самите себе и своите предизвици.
Сите сме луѓе. И не смееме да се делиме на луѓе на позиции и без позиции. Секој е на позиција да го подаде она што го носи во себе за доброто на државата и тоа е најважната позиција. Оној на кого му е доверена државничка позиција, има обврска повеќе да го препознае, почитува и да му даде шанса на тоа добро од граѓаните што ги претставува и на кои им служи.
Почитувани присутни, членови на СДСМ, граѓани кои сте дел од позитивните процеси во државата – Благодарам за влогот и и за вашето разбирање на победничките подвизи. Дека тие бараат совест и храброст. Дека успесите се можни без калкулации. Дека секој во овој процес е важен. И дека сечие време и сечии шанси доаѓаат, кога се работи искрено и трпеливо. Чекориме напред. И само така е можно да продолжиме напред, бидејќи сега е јасно: На прав пат сме.
Успесите во евроатлантските интеграции овозможија над 54.000 нови реални вработувања за само две години. Внесоа рекордни, над 625 милиони евра странски директни инвестиции во 2018 година. Платите пораснаа и државата ќе ги помогне приватните фирми, со плаќање на придонесите за оние што ќе ги качат платите на работниците до 100 евра, со што уште повеќе ќе растат. Приливот на пари во Пензискиот фонд ќе овозможи и раст на пензиите. Ќе следува ново покачување и на минималната плата, што веќе ја покачивме на 12.000 денари. Детскиот додаток им се исплатува на 20.300 дечиња, што е за три пати повеќе од претходно. И образовен додаток им се исплатува на над 8.000 деца, што е за повеќе од три пати, од претходно. Се гради и обновува во државава, со најсилно темпо од независноста досега. Проектирани се 1 милијарда во патишта, над 1 милијарда во железница, над 1 милијарда во енергетика, инвестираме во здравството, водоводите, животната средина.
Затоа, ќе порачам. Ние работиме, знаеме од каде сме почнале и знаеме што сме постигнале од таа, некаде нулта, некаде минусна точка од којашто тргнавме. Но ги знаеме и потребите на граѓаните што не можат да чекаат. Имаме многу да сработиме. Немаме простор да сме комотни. Барам фокус кон обврските за коишто како партија и како Влада, добивме мандат од граѓаните. Потребни ни се способностите на секој поединец, на секој од вас! СДСМ ѝ е потребна на Република Северна Македонија, зашто покажа историјата, покажа 8-ми септември, покажа три децениската независност на Македонија, Социјалдемократскиот сојуз е таа државотворна партија со којашто се безбедни и државата и граѓаните.
Повикувам, посебно во значајниот период пред нас, на совесно и одговорно, државотворно однесување од страна на секој граѓанин, на сите политички партии, организации, во името на добрата иднина на сите нас, во име на доброто на Република Северна Македонија и на сегашните и идните генерации. Да ни е среќен денешниот голем државен празник, денот на независноста на нашата Република!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Властите во Бугарија продолжија да негираат регистрација на етничко-македонски активистички групи“, се наведува во извештајот на Стејт департментот
Министерот за правда ги затвори бугарските културни клубови „Цар Борис Трети“ и „Иван (Ванчо) Михајлов“, повикувајќи се на законот од 2022 година, со кој се бара од организациите именувани по поддржувачи или соработници на фашизмот да ги променат своите имиња, се наведува во извештајот на Стејт департментот.
„Во февруари, по препорака на Комисијата за антидискриминација, обвинителството во Битола отвори прелиминарна истрага за клубот „Иван (Ванчо) Михајлов“ поради говор на омраза. Претседателот на клубот беше обвинет за поттикнување етничка и расна омраза и нетолеранција и ширење расизам и ксенофобија. Две лица се обвинети за нанесување тешки телесни повреди на Христијан Пендиков, кој се саморегистрирал како Бугарин, по национална и етничка основа на омраза“, се вели во извештајот.
Во однос на слобода на здружување во Бугарија, во извештајот се наведува дека Законот предвидува право на слобода на здружување и владата генерално го почитувала.
„Властите продолжија да негираат регистрација на етничко-македонски активистички групи како што се Обединета македонска организација-Илинден, Друштвото на угнетените Македонци во Бугарија-жртви на комунистичкиот терор, Здружението за заштита на основните индивидуални човекови права 2023 година и Македонскиот културен клуб „Никола Вапцаров“ и покрај бројните претходни одлуки на Европскиот суд за човекови права дека негирањето ја нарушува слободата на здружување на групите.
Во февруари, Окружниот суд во Пловдив ја потврди одлуката на Агенцијата за регистрација со која се одбива регистрацијата на Обединетата македонска организација Илинден-Пловдив со образложение дека целите на групата, вклучително и официјалното признавање на македонското етничко малцинство, биле насочени кон поделба на нацијата и ќе создадат услови за етнички конфликт. Во мај, Апелацискиот суд во Пловдив ја потврди одлуката на понискиот суд“, нотира извештајот.
Македонија
Недоверба кон судството, насилства кон ЛГБТ-и заедницата и поткопана слобода на изразување, забележа Стејт департментот во извештајот за човекови права во Македонија
Сериозна владина корупција, сериозни ограничувања на слободата на изразување и слободата на медиумите, насилство и закани за насилство насочени кон ЛГБТ-и заедницата се само дел од забелешките во извештајот на Стејт департментот за состојбата со човековите права во Северна Македонија во 2023 година.
Извештајот меѓудругото нотира значителни „одложувања во судењата кои вклучуваат сериозна корупција, при што само неколку беа завршени до септември, вклучително и оние против поранешни владини функционери. Уставот предвидува независно судство, но владата не секогаш ја почитувала судската независност и непристрасност, вели извештајот.
„Веродостојните извештаи за неоправдано судско несоодветно однесување, непотребен политички и деловен притисок врз судиите, непотизам, клиентелизам, долготрајна правда, несоодветно финансирање, отпор кон користење на законски задолжителна технологија и недоволен кадар, ја попречија судската ефикасност и влијаеше на довербата на јавноста во владеењето на правото“.
Анкетите покажале силна недоверба на јавноста кон судството.
„Унапредување под политичко влијание без заслуга или транспарентност се случи во судството и обвинителството. Во јануари, Судскиот совет утврди дека двајца судии на Апелациониот суд во Скопје свесно ги одложиле одлуките за да ги истуркаат обвинетите да го поминат рокот на застареност. На 26 април, Судскиот совет го разреши својот претседател, потег што критичарите тврдеа дека укажува на политичко мешање. Двајца членови поднесоа оставки од Судскиот совет како одговор, а неколку истакнати граѓански организации побараа целосна оставка на Советот“.
Слободата на изразување била поткопана од неефикасноста на правосудниот систем, недостатокот на транспарентност во однос на медиумското рекламирање од страна на државните институции, несоодветното однесување во име на јавните службеници во нивната интеракција со новинарите, притисокот врз новинарите кои истражуваат корупција, дезинформациите, говорот на омраза во онлајн и социјалните медиуми, и самоцензура.
Македонија
Одрони на неколку патни правци
ЦУК извести дека преку единствениот број за Итни повици Е-112 добиена е дојава за одрон на патот кај Калиманци, на регионалниот пат Македонска Каменица-Виница, 5 километри пред влезот на Македонска Каменица.
За настанатата состојба известени се ЈП за оддржување на регионалните и магистралните патни правец и екипите се излезени на терен за да го саниррат одронот, додаваат од ЦУК.
Исто така добиена е дојава за одрон на патен правец село Удово-Демир Капија.
„Точната локација е 2-3 километри после село Удово во правец спрема Демир Капија. За настанатата состојба известени се ЈП за оддржување на регионалните и магистралните патни правец и екипите се излезени на терен за да го санираат одронот“, соопшти ЦУК.