Македонија
Заев: СДСМ нема да прифати ултиматум од ДУИ за премиер Албанец
СДСМ нема да прифати ултиматум за премиер Албанец од ДУИ дури и ако тие се клучни за формирање нова влада по изборите, рече Заев, посочувајќи дека ултиматуми не треба да прифатат ниту Мицкоски и Ахмети.
Лидерот на СДСМ, Зоран Заев, посочува дека ВМРО-ДПМНЕ и ДУИ ќе бидат опозиција по изборите. Тој им порача на двете партии да соберат гласови од другите етнички заедници во Македонија, како што тоа го прави СДСМ, а луѓето да ги делат на добри и лоши, квалитетни и неквалитетни.
„ВМРО-ДПМНЕ и ДУИ остануваат заедно во опозиција. Тие си помагаат како ДУИ со ваквиот наратив да поминат во опозиција. Навистина по 17 години власт, здраво е и за државата ДУИ да отиде во опозиција. Тоа е здраво и за нив, во опозиција партиите се подобруваат, реформираат. Тоа е наш став, како СДСМ, а граѓаните определуваат на изборите. ДУИ нека се помачат малку да добијат македонски, босански, бошњачки, турски гласови во државата. Или ВМРО-ДПМНЕ, исто е тоа. Идниот премиер ќе биде од СДСМ“, рече Заев.
Барањето и кампањата на ДУИ за премиер Албанец, лидерот Заев ја нарече национал-популистички концепт, поради кој тие ќе изгубат гласови.
„Преговори во партиите постоеле и постојат. Првпат изнедривме мултиетничка коалиција со сите етникуми внатре, а тоа е сериозна гаранција за граѓанскиот концепт и нашата идна победа која ја очекуваме како пренесена одговорност од граѓаните. Јас себеси и мојот СДСМ го сметам за основоположник на концептот едно општество за сите. Ние покажавме дека сме растоварени од етничката припадност на граѓаните. Имате добри и лоши луѓе, квалитетни и способни граѓани и неквалитетни и неспособни граѓани кои не можете да ги номинирате за која било функција. Ние имаме потпретседатели на СДСМ, имаме министри, пратеници во Собранието, директори на јавни институции од СДСМ, од сите етнички заедници. Ова што денес се пласира од ДУИ е само национал-популистички концепт и ништо друго. Верувам дека и ДУИ ќе изгуби поради тоа. Граѓаните треба да ги гледаме како кандидати во политиката, а по тоа како кадарни, квалитетни, посветени, луѓе со квалитет“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.