Македонија
Западен Балкан во заедничка акција за животната средина и климата
Министерството за животна средина и просторно планирање беше домаќин на третиот министерски панел за животна средина и климатска акција во Западен Балкан, кој денес се одржа во Скопје како заедничка активност на Советот за регионална соработка и Министерството за животна средина и просторно планирање на Македонија.
„Ние го сметаме одржувањето на овој состанок на регионалната работна група како круцијален во остварување резултати во полето на одржливиот развој на ниво на сите економии од Западен Балкан, генерално преку имплементирање на целите за одржлив развој во линија со националните и регионалните приоритети и Стратегијата на Југоисточна Европа 2020“, истакна министерот за животна средина и просторно планирање, Садула Дураку, во своето обраќање на панелот, нагласувајќи дека многу значајно го смета зајакнувањето на политиките и оперативните врски помеѓу животната средина и другите сектори, како што се климатските промени, но и подобрувањето на врските помеѓу министерствата одговорни за животна средина и министерствата одговорни за енергетика, земјоделство, води, транспорт и други ресори.
Дураку во своето излагање ги потенцира резултатите од работната група за биодиверзитет, која се одржа во текот на вчерашниот ден, и најави нивна презентација во текот на конференцијата, потоа прогресот на двата проекта: Clima Proof, климатска отпорност за развој на инфраструктура за транспорт, и Nexus%, за критичните поврзаности помеѓу водите, енергија и сигурност на храна, за кои е веќе воспоставено финансирање од Австриската развојна агенција и фактот дека на оваа регионална средба ќе се иницира имплементација на акции на димензијата за животна средина на Стратегијата 2020 на Југоисточна Европа поврзана за прекугранично управување со водните ресурси.
На конференцијата свое обраќање имаше и заменик-министерот за животна средина и просторно планирање, Јани Макрадули, кој во своето обраќање истакна дека во земјата се одвиваат неколку важни активности, а тоа се изработка на заедничка стратегија за енергетика и клима, имплементација на законот за енергетика, кој е во потполност усогласен со препораките на Енергетската заедница, а меѓу другото, тој исто така изјави дека почнала и изработката на 4. национален план и третиот БУР за климатски промени, со што Македонија е во напредна фаза во однос на другите земји од регионот.
„Донесена е стратешка одлука намалувањето на аерозагдувањето да е стратешка програма на Владата. Бидејќи постои цврста врска помеѓу аерозагадувањето и климатските промени, активностите во рамките на стратешката програма на Владата ќе придонесат и за постигнување на барањата од парискиот договор и ЕУ-таргетите за климатските промени“, истакна Макрадули, меѓу другото, во својот говор.
Обраќања имаа и Горан Свилановиќ, генералниот секретар на Советот за регионална соработка, и Никола Бертолини, раководител за соработка во Делегацијата на Европската Унија во Скопје, по што следуваше клучната белешка од Јанез Копач, директор на Секретаријатот на Енергетската заедница. На средбата е усвоена декларација на државите од Западен Балкан за животната средина и климатската акција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ќе се основа Медицински факултет во Битола, усвоени се законските измени
Со усвоениот Закон предложен од пратениците на СДСМ основаме Медицински факултет во Битола, изјави пратеничката Жаклина Лазаревска.
Медицинскиот факултет ќе биде во состав на Универзитетот ,,Св. Климент Охридски” – Битола а ќе ги има отсеците за општа медицина, стоматологија, фармација и Висока медицинска школа.
Како што објави Лазаревска, наставните бази на Факултетот ќе бидат Клиничката болница Битола, Специјалната болница за кардиолошки заболувања „Свети Стефан“ Охрид, Специјалната болница за ортопедија и трауматологија „Свети Еразмо“ Охрид , Специјалната болница за нефрологија Струга и болницата со проширена дејност во Прилеп.
„Обезбедуваме висок степен на образование и обука за студенти кои ке станат идни лекари, со потребни знаења и вештини. Со основањето на Медицинскиот факултет Битола ќе го утврди своето место како регионален образовен центар и ќе даде можност на средношколците од градот и околните населени места, да студираат во своето место. Значително ќе допринесе во создавањето на нов стручен кадар, подобрување на здравствениот систем и одржување на високи стандарди за образованието, етиката и праксата во областа на медицината“, изјави Лазаревска.
Како што рече, ова ќе влијае на зголемување на квалитетот на здравствени услуги преку обучени и компетентни лекари за подобрување на здравјето на населението.
Скопје
Герасимовски: Конечно, Работнички се враќа на шампионските патеки
Градоначалникот на Општина Центар Горан Герасимовски вчера вечер присуствуваше на тренингот на КК Работнички во салата Кале. Со кошаркарите разговараа за издигнувањето на тимот и потребите за достигнување на високи резултати и на следните натпревари.
„Сакам да се заблагодарам пред се и на тренерот на цел стручен тим но и на сите играчи за одличните резултати коишто ги имаме годинава. Успеавме со клубот од невозможно да направиме возможно. Клубот којшто го начекавме пред две години на 10то место со 4-5 неисплатени плати и долг од 600 000 евра да го вратиме на победничките патеки. Важно е што во моментов табелата трепка што сме на прво место и се надевам дека тоа така ќе остане и до крај. Јас верувам дека ќе имаме успех оваа сезона и уште поголем успех следната“, им порача Герасимовски на кошаркарите.
При средбата Герасимовски ги извести играчите дека општина Центар го има имотниот лист на салата и успеа да го исполни ветувањето дека ќе ја врати сопственоста на салата под ингеренции на општината.
Општина Центар на крајот на минатата година доби финансиски средства од Владата во вредност од 30 милиони денари наменети за реконструкција на салата, при што Герасимовски ги информираше играчите со процесот и проект планот кој е веќе во изработка за реновирање на матичната сала на Работнички. Конечно Работнички се враќа на шампионските патеки, ви благодарам за тоа, порача Герасимовски.
Македонија
Петровска: Судот донесе одлука дека Ковачки неправедно ме клеветел
Министерката за одбрана, Славјанка Петровска објави дека судот донел одлука со која се утврува дека пратеникот од ВМРО-ДПМНЕ, Драган Ковачки, неправедно ја клеветел.
„Основниот граѓански суд во Скопје по сите прикажани докази од моја страна донесе одлука со која се утврдува дека тужениот Драган Ковачки искажал невистини и лаги односно неправедно ме клеветел во јавност со цел да ми го наруши угледот и честа во очите на јавноста, Овој е само еден од низата примери на неодговорно, нечесно и валкано однесување на политичката сцена од страна на Ковачки“, пишува Петровска.
Во продолжение таа додава дека не сака пари од нечесник и се откажува од паричниот надомест.
„Секој го прави тоа што најдобро го знае, тие со лагите, јас со труд и одговорна и чесна работа“, додава Петровска.