Економија
(Видео) За борба против аерозагадувањето предвидени 1,6 милион евра во буџетот за 2020
Растот на платите и пензиите, растот на вработеноста, намалувањето на невработеноста и големата социјална заштита на ранливите категории в година треба да придонесат за раст на приватната потрошувача, која е проектирана на 3,3 отсто, рече денес премиерот Зоран Заев образложувајќи го буџетот за в година.
Растот на нето-платата во 2020 година е проектиран на 6,3 отсто.
„Растот ќе биде дополнително предизвикан од покачувањето на минималната плата, која ќе порасне 2.000 денари од декември годинава, но и од поддршката во вид на субвенции што ја обезбедуваме за приватните компании што ќе ја покачат платата на своите вработени од 600 до 6.000 денари“, рече премиерот Заев.
Растот на економијата за 2020 година е проектиран на ниво од 3,8 отсто, а најголемо учество во овој раст е очекуван од домашната потрошувачка.
Во 2020 година премиерот очекува да опаѓа стапката на невработеност и да се симне на нов историски минимум, пониско од 16 отсто – и очекува и процентот на вработеност да се придвижи нагоре до 48,2 отсто.
Бруто-инвестициите во 2020 година е предвидено да се зголемат 8,0 отсто. Позитивен придонес врз растот на инвестициите се очекува да имаат планираните инвестиции на јавниот сектор, како и континуираната поддршка на инвестициската активност на домашните и странските претпријатија.
Стапката на инфлација во 2020 година се очекува да остане ниска во износ од 1,7 отсто.
„Ова значи дека пред нас останува периодот со стабилни цени“, објасни премиерот Заев.
Во здравството предвидено е покачување на платите на целокупниот медицински персонал почнувајќи од февруарската плата: 25 отсто раст кај специјалистите, 15 отсто кај лекарите од општа пракса, а 10 отсто ќе им пораснат платите на медицинските сестри.
„Специјалистите во терцијарното здравство ќе ја достигнат висината на платата од 100.000 денари со февруарската плата во 2020 година. Ова следува по покачувањето на платите од 10 отсто од јануари 2019 година за лекарите и зголемувањето од 5 отсто во септември 2019 за сите кадри во здравството, што е трето зголемување на платите по доаѓањето на власт на оваа Влада по првото зголемување на платите во септември 2018 од 5 отсто“, рече Заев.
Во буџетот за 2020 година се издвоени 1,5 милијарда денари за капитални инвестиции во здравството – за изградба и реконструкција на болници и за нова современа медицинска опрема.
В година се очекува да почне изградбата на новиот клинички центар во Скопје и да продолжи обновувањето на Клиничката болница во Штип и на болницата во Кичево, како и завршните работи во болниците во Струмица и Тетово.
За образованието се обезбедени средства за зголемување на платите на просветните работници од 10 отсто, почнувајќи од 1 јануари 2020 година, и 1,4 милијарда денари за капитални инвестиции за реконструкција и изградба на училишни згради и спортски училишни сали, на студентските домови, како и за опремување и реконструкција на универзитетите.
Буџетот за 2020 предвидува и зголемување на пензиите.
„Пензиите ќе пораснат 700 денари и заедно со веќе постојното усогласување со растот на трошоците за живот ќе пораснат вкупно од 850 до 900 денари“, рече премиерот и најави дека повеќе за покачувањето на пензиите ќе објасни министерката за труд и социјална политика, Мила Царовска, на одвоена прес-конференција.
Во буџетот за 2020 се издвоени 7,3 милијарди денари за субвенции во земјоделството и 1,1 милијарда денари за регионален рамномерен развој.
Во 2020 година буџетот на Министерството за одбрана ќе изнесува 10 милијарди денари за реформи во одбранбениот сектор во согласност со НАТО-стандардите, модернизирање и опремување на Армијата, професионална подготовка на припадниците на Армијата и за долгорочен развој на одбрана.
За борба против аерозагадувањето предвидени се 1,6 милион евра.
„Ќе продолжиме со политиките и мерките за борба против аерозагадувањето и за таа намена во буџетот за наредната година се определени 100 милиони денари. Но, тоа се само некои од вкупните средства затоа што еден сериозен дел е вклучен во буџетите на одделни министерства што имаат програми за оваа намена. Дополнително, вложуваме 10 милиони евра од буџетот на ЕСМ, за набавка на еколошки инвертери за 10.000 домаќинства“, рече премиерот Заев.
Капиталните расходи за в година се на ниво од 23 милијарди денари. Инвестициите се наменети за интензивирање на инфраструктурните проекти, односно за вложувања во патната и железничката инфраструктура, енергетската и комуналната инфраструктура, како и капитални инвестиции за подобрување на условите во здравствениот, образовниот и социјалниот систем, земјоделството, културата, спортот, заштитата на животната средина и правосудството. Во оваа сума не е вклучен буџетот на Јавното претпријатие за државни патишта, кој се формира независно.
5 милијарди денари се планирани за вложување во енергетската и комуналната инфраструктура и управувањето со отпадот. Планирано е да продолжи изградбата на гасоводната инфраструктура, како и изградба на водоводни и канализациски системи.
За инвестиции во приоритетите на локалните самоуправи ќе бидат насочени и оние 35 милиони евра на ТАВ, кои требаше да бидат инвестирани во карго-аеродромот, а преку разни фондови ќе продолжи рехабилитацијата на патната мрежа и на железничката инфраструктура.
Одвоени се и 1,5 милијарда денари за рурален развој, за изградба на хидросистеми и инвестиции за подобрување на конкурентноста и модернизација на земјоделските стопанства.
Премиерот Заев објасни дека буџетот се разгледувал на повеќе владини седници оти воделе сметка секој денар на граѓаните да биде најпродуктивно искористен.
Министерката за финансии, Нина Ангеловска, објасни дека буџетот од 3,9 милијарди евра е реален и со вложување во човечкиот капитал има цел да ги задржи граѓаните во земјата. Буџетот денес го усвои Владата, од каде што најавија дека ќе го испратат на усвојување во Собранието.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.