Македонија
ИЈЗ: Во последните три недели намален е бројот на новозаболени и починати од коронавирус
Во последните три недели постои тренд на намалување на бројот на новозаболени и починати од коронавирус, како и процентот на позитивни од тестирани лица, соопшти Институтот за јавно здравје.
Во извештајот за изминатата недела, од 14 до 20 декември, се наведува дека се тестирани 15.607 лица, што е намалување од 1,6 % во однос на минатата недела.
Регистрирани сe 4.585 нови позитивни случаи од 35 града во државата со намалување од 16,9 % во однос на минатата недела. Најголем дел од регистрираните случаи и натаму е од Скопје.
Во периодот од 14 до 20 декември процентот на позитивни од тестирани случаи изнесува 29,3 %, намалување од 5,5 % во однос на минатата недела.
Минатата недела се регистрирани заболени лица во сите возрасни групи. Најзастапена е возрасната група на лица на возраст над 60 години (29,3 %). Голем број заболени се регистрира и кај лицата во возрасните групи од 50 до 59 години (19,3 %), 30-39 (17,7 %), 40-49 (17,5 %) и 20-29 (11,1 %). Најмал број е регистриран кај децата од 0 до 9 години (1,3 %) и од 10 до 19 години (3,9 %).
По добиени два негативни теста или со употреба на новиот алгоритам, како оздравени се водат 4.513 лица што биле хоспитализирани или на домашно лекување, 15,1 % помалку во споредба со минатата недела.
Пријавени се 159 смртни случаи од 25 града, со намалување од 8,6 % во однос на минатата недела. Во однос на возраста, 131 лице биле над 60 години, 17 лица на возраст од 50 до 59 години, 8 смртни случаи се пријавени од возрасната група 40-49 години и три случаи од возрасната група од 30 до 39 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово не се гласа на три избирачки места, на едното се изгубил печатот
Прекин на гласањето има на три места во Куманово, информираше претседателот на Државната изборна комисија (ДИК), Александар Даштевски.
Како што појасни, на едното бил изгубен печатот. На останатите две, биле направени обиди да се замени уредот за биометриска верификација, пришто гласањето во едниот случај продолжило па прекинало, а во вториот не продолжило.
„Тоа се трите места за коишто имаме добиено писмено известување. Ќе видиме вечер за што точно се работи и ќе одлучиме“, рече Даштевски, одговарајќи на новинарски прашања.
Од ДИК појаснуваат дека се работи за прекин за повеќе од три часа, додека онаму каде што имало помали прекини, гласањето ќе се продолжи за онолку време колку што било прекинато.
На сите останати гласачки места, гласањето тече нормално и мирно, додаваат.
Пред полноќ се очекува да бидат обработени над 50 отсто од гласовите и ДИК да ги објави првичните неофицијани резултати.
Во однос на информациите за починати луѓе на избирачкиот список од ДИК обазложија дека оние коишто ќе починат 30 дена пред гласњето ги има на избирачкиот список, бидејќи тој е веќе заклучен. Велат дека списокот се ажурира неколкупати годишно во координација со Управа за водење на матични книги.
Македонија
Одѕивот до 17 часот изнесува 44,18 отсто – за околу 9 проценти повеќе во споредба со претходните претседателски избори
До 17 часот во првиот круг од претседателските избори, своето право на глас го оствариле 397.612 избирачи, или 44,18 отсто.
Како што соопшти претседателот на Државната изборна комисија (ДИК), Александар Даштевски, засега најголема е излезноста во Новаци, каде гласале 67,19 отсто, а најмала во Пласница – 15,5 отсто.
Засклучокот е дека гласањето се одвива мирно.
Во споредба со првиот круг од претседателските избори во 2019 година, до 17 часот, излезноста е поголема за околу 9 отсто.
Досега до ДИК се доставени 308 приговори, од кои 85 се усвоени, 27 отфрлени како неуредни, а 38 се одбиени. Останатите се во процес на обработка.
Македонија
Петмина си ги фотографирале гласачките ливчиња, полицијата ги фати
Пет лица во периодот од 11 до 14 часот, биле фатени од страна на полицијата оти ги фотографирале своите гласачки ливчиња додека го остварувале своето право на глас, објави МВР.
-Во 11.10 часот е пријавено дека во село Коџалија, општина Радовиш на избирачко место број 1602 С.А. од с.Коџалија го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека на избирачко место број 2683/1 во Скопје А.С. (40) од Скопје го фотографирал гласачкото ливче. Се преземаат мерки за расчистување на случајот, по што ќе биде поднесен соодветен поднесок.
-Околу 12.15 часот е пријавено дека А.И.(48) од Охрид на избирачко место број 1271 во Охрид го фотографирал гласачкото ливче. А.И. е приведен во полициска станица и по документирање на на случајот ќе биде поднесен соодветен поднесок.
-Во 12.35 часот е пријавено дека на избирачко место бр.0006 во Берово, Д.Т.(42) го фотографирал гласачкото ливче. Д.Т. е приведен во полициска станица и по документирање на на случајот ќе биде поднесен соодветен поднесок.
-Во 13.57 часот е пријавено дека на избирачко место 2555 во Скопје С.С. го фотографирала гласачкото ливче. Се преземаат мерки за расчистување на случајот, по што ќе биде поднесен соодветен поднесок, се наведува во извештајот на МВР.