Македонија
Кој ги штити новинарите, работилница на Google News Lab, истражувачкото новинарство во Германија – темите на 3. ден на ИФФС
„Безбедноста на новинарите во Европа – Кој го штити новинарството“ е тема на дебатата што ќе се одржи денеска во 12.30 часот во Кино Култура, во рамките на Истражувачкиот филмски фестивал Скопје. Само во една година се случија повеќе убиства на новинари во Европа, со сомнежи дека мотивите на убиствата може да се бараат токму во нивната работа. Безбедноста на новинарите станува сѐ поголема грижа во многу земји, велат од фестивалот во образложението на дебатата.
Ќе дискутираат: Карло Бонини, новинар на Ла Република, Мет Сарнецки од Проектот за организиран криминал и корупција и Кристина Озимец, претседател на Платформата за истражувачко новинарство и анализи и координатор на ИФФС.
Веднаш по дебатата, гостин на фестивалот ќе биде Ивор Фука, основачот на хрватскиот портал „Лупига“. Тој ќе и сподели на публиката како независните медиуми можат да постигнат успех со кампања за crowd-funding, односно со поддршка на читателите.
Една од најголемите глобални измами „Рајските документи“ на филм ќе биде прикажана во 17 часот во Кино Култура. „Рајски документи: Вистинската приказна позади тајната деветмесечна истрага“ на Ерик Вајнриб ќе овозможат увид во тајната истрага од првиот ден на протекувањето.
Гостинот од Google News Lab, Даниел Жонса во 18.30 часот ќе одржи работилница за новите онлајн-базирани алатки и како да се искористат во новинарството.
„Истражувачкото новинарство во Германија: Предизвици и моментална состојба“ е темата на дискусијата што е закажана за 19.45 часот. Гости се врвни новинари од Германија, земјата која ги има едни од најдобрите истражувачки медиуми во светот. Ќе дискутираат: Анете Довидајт, Оливер Шрем, Фолкер Штајнхоф, а модератор ќе биде Владимир Мирчески.
Со филмот „Убивањето на Павел“ во 21 часот ќе биде затворено второто издание на Истражувачкиот филмски фестивал Скопје.
Филмот е посветен на Павел Шеремет, наградуваниот белоруски новинар кој живееше во Украина, на 20 јули 2016 година беше убиен од автомобил-бомба во Киев.
Интересни и конструктивни дебати се случија вчера на вториот ден на ИФФС. Се дискутираше за тоа владиниот пиар и социјалните медиуми и за тоа до каде е границата за користењето на социјалните медиуми за промоција на владината агенда. Бранко Героски, Бојан Кордалов, Божидар Божиновски, Васко Малгешов и Марјан Забрчанец ги споделија своите мислења на темата. Дебатата предизвика и бројни прашања од публиката.
Голем интерес покажа публиката и за дебатата на тема „Истражувачкото новинарство во Македонија – предизвици и како понатаму“. За ова новинарство треба пари и време, се согласија учесниците – Васко Попетрески, Александра Денковска, Фуркан Салиу, Елiда Зулбеари и Петар Клинчарски.
Истражувачкото новинарство треба да се изучува уште на факултет, меинтрим-медиумите да го сфатат сериозно и да вложуваат, новинарите меѓу себе да се инспирираат кога еден медиум ќе започне приказна, други да ја продолжат, а пред сѐ, да постои солидарност во професијата, тоа беа дел од заклучоците на дебатата.
Гостин на вториот ден беше Карло Бонини, кој го претстави неговиот филм „Дафне: Егзекуцијата“. Тој ја импресионираше публиката со неговиот филм за убиството на новинарката од Малта, Дафне Каруана Галиција и сподели како е работен филмот. Два македонски документарци беа прикажани – „Случајот Дрисла: Не смрди само ѓубрето“ и „Водомила“.
Истражувачкиот филмски фестивал Скопје го организира Платформата за истражувачко новинарство – ПИНА, во соработка со ФЕС – Скопје. Сите детали за фестивалот може да ги следите на веб-страниците: www.pina.mk и www.iffs.mk, како и на Фејсбук, Твитер и Инстаграм.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левицата: Проблеми со фингерпринтот во Куманово, Ѓорче Петров, Аеродром, доцнење на гласачкиот процес и нерегуларности во избирачкиот список
Од Претседателскиот изборен штаб на кандидатот за претседател Билјана Ванковска информираат дека денешниот изборен ден поминal мирно во фер и демократска атмосфера, но нагласуваат дека сепак се случиле некои помали проблеми на изборните места.
Како што информираше Моника Маневска, портпаролот на Ванковска, забележани се помали проблеми со фингерпринтот на повеќе гласачки места како Куманово, Ѓорче Петров, Аеродром и др.
Истакна дека од терен добиваат информации дека во Куманово се правеле редици заради проблемите со фингерпринт, а во некои изборни места гласањето почнало со доцнење.
Исто така беше кажано дека и на овие избори се појавуваат нерегуларности во избирачкиот список па така во некои изборни места има запишано почонати гласачи, а некои гласачи кои се со постојано место на живеење и без промена на адреса ги нема во изборниот список.
Македонија
Ромите за Демократија: Членови на СДСМ се закануваa на Ромите набљудувачи на изборите
Денес, додека Северна Македонија ги организира своите претседателски избори, се појави голема загриженост за безбедноста и интегритетот на изборниот процес. Членовите на фондацијата „Ромите за Демократија“, кои се набљудувачи на изборите, беа изложени на сериозни закани и заплашувања од членови поврзани со партијата СДСМ, се истакнува во соопштението на оваа фондација.
Додаваат дека како одговор на овие алармантни случувања, фондацијата „Ромите за Демократија“ испратила официјално писмо до лидерот на партијата СДСМ, во кое бараат итна акција.
Во писмото, како што појаснуваат, се повикува на итна истрага за заканите кон ромските изборни набљудувачи и се нагласува потребата од брзи и соодветни санкции против сите вклучени членови на партијата.
Фондацијата „Ромите за Демократија“ најостро го осудува овој чин на заплашување што се применува врз ромските набљудувачи на изборите“, изјави Селвије Мустафи Алкан, извршен директор на Фондацијата.
„Безбедноста на сите набљудувачи на изборите мора да бидат гарантирани за да се обезбеди интегритет на изборниот процес и да се поддржуваат принципите на демократијата“.
Во писмото дополнително се бара одговор од лидерот на партијата СДСМ до крајот на денот, во кој се наведени чекорите преземени за решавање на ситуацијата и спречување какви било дополнителни инциденти. Непочитувањето, како што велат, ќе резултира со информирање на меѓународната заедница, нагласувајќи ја одговорноста на партијата за безбедноста на набљудувачите на изборите.
„Нема да толерираме никакви закани или насилство врз оние кои се посветени на обезбедување слободни и фер избори“, продолжи Алкан. „Партијата СДСМ мора да ги почитува принципите на демократијата и да преземе итни активности за да ја обезбеди безбедноста на ромските набљудувачи на изборите“, истакнуваат од оваа фондација.
Македонија
Две лица од Скопје го искинале гласачкото ливче, неколкумина го фотографирале
Во 14 часот е пријавено дека на избирачко место во Штип М.Ш. (23) го фотографирал гласачкото ливче. Се преземаат мерки за расчистување на случајот, по што ќе следи соодветен поднесок, соопшти МВР.
Полициски службеници од СВР Штип го привеле Г.Ј. (34) од с. Тработивиште затоа што го фотографирал гласачкото ливче. Според полицијата по документирање на случајот ќе следи соодветен поднесок.
„Во 15.30 часот е пријавено дека на избирачко место бр. 1680 во с. Сопот Р.А. од с. Сопот го фотографирал гласачкото ливче. Се преземаат мерки за расчистување на случајот, по што ќе следи соодветен поднесок.
Во 15.40 часот е пријавено дека на избирачко место бр. 2880 во Скопје Р.Х. (72) го скинал гласачкото ливче. Р.Х. е приведен и по документирање на случајот ќе следи соодветен поднесок.
Во 15.50 часот е пријавено дека во избирачкото место бр.2783 во Скопје Б. С. (48) го скинала гласачкото ливче. Се преземаат мерки за расчистување на случајот, по што ќе следи соодветен поднесок“, информираат од МВР.