Македонија
Кривична за претседателката на Институтот на сметководителите, плаќала обуки што не се одржале
Кривична пријава од Управата за финансиска полиција доби Ленче Папазовска, претседателката на Институтот на сметководителите и овластените сметководители (ИСОС), оти од сметката на Институтот префрлала пари што завршувале на сметки на физички лица кои не извршиле никакви услуги за Институтот. Управата, кривична пријава до Основното јавно обвинителство поднесе и против С.М., овластено лице во Стопанската интересна заедница Национален комитет на Интернационална стопанска комора во Република Македонија (ИСК Македонија), лице што помагало во извлекувањето на парите од сметката. Финансиската полиција влезе во Институтот еден ден по објавите на „Макфакс“ за низа злоупотреби кај сметководителите.
„Л.П., искористувајќи ја својата службена положба како претседател на ИСОС, потпомогната од второпријавениот С.М., во својство на овластено лице во Стопанската интересна заедница Национален комитет на ИСК Македонија, со цел да стекне противправна имотна корист за себе и за други физички лица, на 2.1.2017 година склучила договор, број 0307/001 со ИСК Македонија, врз основа на кој во повеќе наврати од банкарската сметка на Институтот префрлила парични средства на сметката на ИСК Македонија по основ на фактури во вкупен износ од 9.777.300,00 денари, кои потоа им се исплатуваат како надомест на поголем број физички лица (сите членови на Управниот одбор, Надзорниот одбор и комисиите формирани при Институтот за сметководителите и овластените сметководители), без тие лица да извршат какви било услуги за потребите на Институтот или ИСК Македонија. На споменатиот начин во текот на 2017 година, од страна на ИСК Македонија, исплатени им се 7.994.000,00 денари на поголем број физички лица на име надомест за подготовка на обуки, надомест за консултанти ангажирани за експертиза од областа на даноците и сметководството, како и презентациски способности, за кој износ пријавените го оштетиле Институтот на сметководителите и овластените сметководители на Република Македонија“, соопшти Управата.
Договорот за експертиза пријавените го склучиле на подолг временски период, односно до 2021 година, сметајќи дека интересот за посетување обуки од страна на сметководителите е голем и задолжителен и со тоа постојано ќе може да се црпат средства од Институтот и тие ќе се префрлаат на сметките на експертите, кои ниту подготвувале, ниту консултирале ниту презентирале каков било вид обуки за сметководители, утврдила Финансиската полиција.
Папазовска вели дека одлуката да се склучи таков договор била донесена пред таа да стане претседателка. Најави дека на суд ќе ги изнесе сите закани, уцени и притисоци поради кои била принудена да го склучи договорот што бил изгласан од Собранието пред таа да дојде на функцијата.
Утрово Папзовска кај министерот за финасии и фромално поднела оставка од функцијата откако четири месеци се води тивка војна во Институтот за претседателското место. Во спорна постапка, на крајот од минатата година, без мислење од Министерстовото за финасии, Папзовска беше разрешена од функцијата и од тогаш траат превирањата во Институтот.
Денес сметководителите во тензична атмосфера има нов обид за распуштање на Собранието токму поради утврдениот непотизам во органите.
Финансиската полиција влезе во Институтот на сметководителите
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Петровска: Судот донесе одлука дека Ковачки неправедно ме клеветел
Министерката за одбрана, Славјанка Петровска објави дека судот донел одлука со која се утврува дека пратеникот од ВМРО-ДПМНЕ, Драган Ковачки, неправедно ја клеветел.
„Основниот граѓански суд во Скопје по сите прикажани докази од моја страна донесе одлука со која се утврдува дека тужениот Драган Ковачки искажал невистини и лаги односно неправедно ме клеветел во јавност со цел да ми го наруши угледот и честа во очите на јавноста, Овој е само еден од низата примери на неодговорно, нечесно и валкано однесување на политичката сцена од страна на Ковачки“, пишува Петровска.
Во продолжение таа додава дека не сака пари од нечесник и се откажува од паричниот надомест.
„Секој го прави тоа што најдобро го знае, тие со лагите, јас со труд и одговорна и чесна работа“, додава Петровска.
Македонија
Манолева: По 43 години, болницата во Отешево доби комплетно нов лик, современи услови за третман и медицинска опрема
Заменик министерката за здравство д-р Маја Манолева, вчера беше во посета на ЈЗУ Специјализирана болница за превенција лекување и рехабилитација на хронични респираторни неспецифични и алергиски заболувања ОТЕШЕВО. Оваа јавно-здравствена установа минатата година доби комплетно нов лик со реновиран болнички објект финансиски поддржан од Министерството за локална самоуправа и Владата на Швајцарија во висина од 20 милиони денари.
„Со имплементацијата на овој проект подобрени се болнички услови за третман на пациенти, поставен е нов мебел како донација од Луксембург, а собите се наместени со нов инвентар. Сите амбуланти, лабораторија, дневна соба, ехо кабинет, соба за спирометрија и алерго тестови се позиционирани во реновираниот објект. Како што можевме да видиме од посетата амбулантите веќе функционираат во реновираните простории. Специјализираната болница Отешево нуди современи услови за третман на пациенти и достоинствени услови за работа на здравствените работници“, рече Манолева.
Болницата во Отешево опстојува повеќе од 43 години и ова е прво реновирање кадешто значително се унапредени болничките услови. Во изминатиот период, установата се зајакна и со два апарати за физикална медицина и рехабилитација во склоп на проектот во вредност од 270 илјади денари.
Македонија
Притвор од 48 часа за две лица кои се задржани по убиството на лекарот во Железара
Со оглед на тоа што се уште се преземаат дејствија за обезбедување докази, јавен обвинител од Основното јавно обвинителство Скопје синоќа до судијата на претходна постапка од Основниот кривичен суд Скопје достави предлог за определување мерка краткотраен куќен притвор во траење од 48 часа за две од лицата кои беа задржани во врска со убиството на лекар во скопската населба Железара, извести Обвинителството.
Како што велат од Обвинителството, предлогот е прифатен и бараната мерка е определена.